Home Actividad Especial Awe lo tin “Ambiente di Fin di Aña” nunca antes bisto den...

Awe lo tin “Ambiente di Fin di Aña” nunca antes bisto den Caya Grandi

298
0
SHARE
- Advertisement -

ORANJESTAD (AAN): Pa celebra temporada di fin di aña, Gobierno di Aruba a dicidi di organiza un evento special pa asina yuda trece bida bek den centro di Oranjestad.

Segun Lindy Croes, representante di Prome Minister, Evelyn Wever-Croes, a haci un invitacion na pueblo di Aruba pa bin e weekend aki, pasobra nan a prepara un tremendo evento yama ‘Ambiente di Fin di Aña’, cu ta cuminsa riba diabierna 22 di December cu un shopping night te cu 8’or di anochi. Diasabra 23 tambe tin un shopping night te cu 8’or di anochi, y diadomingo caya lo ta habri di 10’or di mainta te cu 2’or di atardi.

Croes a bisa cu artistanan local lo ta presente pa entretene tur hende y cu nan ta conta cu apoyo di Cuerpo Policial pa asina tur cos bay na ordo.

Edjean Semeleer a splica cu nan tin varios siman caba trahando pa trece algo spectacular pa pueblo, pa esaki no solamente incentiva pueblo pa bishita Caya Grandi, mientras bo ta haci bo compras pa fin di aña, por tin entretenimento di artistanan local den henter Caya Grandi.

Semeleer a menciona cu nan lo conta cu presentacion di Etty Toppenberg, Gaita Autentico, Grupo Las Unicas, Los Paranderos, Gaita Muchanan di Mama Rosa, Niro, Jeon, y hopi mas. El a splica cu e mes, hunto cu un grupo hopi grandi di amigo den mundo di musica, riba 23 di December cuminsando for di 6’or di atardi riba plaza dilanti di Djiespi’s Place lo presenta un tremendo concierto di Pasco, completamente gratis, kiermen no solamente bo por disfruta di bo shopping, cu ta idea primordial tras di evento, pa asina trece pueblo bek den Caya Grandi, pero tambe entretene esnan presente.

El a agrega cu otro siman nan tambe tin un lista di actividad prepara cu mas gruponan musical pa asina cera e aña y un manera tremendo y habri aña 2018 cu speranza di rebiba Caya Grandi.

Por haya mas informacion riba nan Facebook, Aruba mainstreet events.

Sra. Lindy Croes a bisa cu algun comerciante a dicidi di duna premio pa esnan cu ta cumpra cerca nan riba suma di 50 florin, bo ta haya un ticket pa yena bo informacionnan, y asina haya chens di gana hopi premio. Pa e weekend aki, tin un premio di 2.500 florin di un shopping spree, danki na CMB; tin 50 mountain bikes pa rifa y tambe un weekend stay na Renaissance Hotel.

Croes a indica cu den fin di siman, danki na Aruparking, parkeer geel y blanco lo a accesible, y diadomingo normalmente e ta gratis. Pero ta di remarca pa hende no para nan auto riba trottoir, pasobra nan lo tow bo auto.

Cuerpo Policial a bisa cu asina e comision a acerca nan cu e plannan pa e evento, nan tambe a sinta cabez pa planea seguridad riba e dianan aki. Lo tin un ploeg special, na unda un parti lo cana den caya y otro parti lo patruya pafor di caya. E comision mes a percura pa tin hopi luz pa asina, evita cu criminalnan por haci nan fechorianan.

- Advertisement -

DUNA COMENTARIO

Please enter your comment!
Please enter your name here