Home Deporte Bun Bu Itchi/Kendo Aruba den 2018 lo purba crece mas y popularisa...

Bun Bu Itchi/Kendo Aruba den 2018 lo purba crece mas y popularisa arte di spada Hapones na Aruba

39
0
SHARE
- Advertisement -

Cu un cremento enorme den 2017

ORANJESTAD (AAN) – Aña 2017 tabata un bon aña pa Bun Bu Itchi/Kendo Aruba. Despues di un par di aña dificil, resultadonan concreto a drenta pa casi tur miembro. Ademas, e club a cuminsa crece bek, danki mas tanto na dos curso pa principiante.

De hecho, nan racha di exitonan a cuminsa caba na December 2016. Durante e VI Campeonato Latinoamericano de Kendo, na Chile, Elton Vrolijk a slaag pa su di 2 dan di Kendo, tanten cu Eun Jung Kim a logra pasa su examen dificil pa di 6 dan di Kendo. Cu e rango aki, el a cuminsa forma parti un grupito chikito di damas na America (Norte y Sur) cu e rango aki. Pa Elton Vrolijk su di 2 dan tabata e premio pa su reentrada den Kendo, despues di varios aña di ausencia.

Algun luna despues, na Hulanda, Pim Willems tambe a logra e rango di di 2 dan. Kendo su sistema di graduacion ta bay te na di 8 dan, pero e rango aki ta hopi raro y ta weita e rango aki casi unicamente entre profesional den Kendo, manera polis specialisa pa train agente policial na Hapon y Korea. P’esey pafo di Hapon e rango di di 7 dan ta wordo considera como e rango di mas halto. Durante su estadia na Europa, e sensei di Bun Bu Itchi/Kendo Aruba, Sergio Velásquez, a biaha pa Hungria y a logra obtene su di 7 dan. Esey tabata despues di 14 aña cu e rango di di 6 dan y mas cu 35 aña di training non-stop.

E exito di e miembronan menciona probablemente a inspira e resto di e miembronan ora di haci nan examen. Saskia Kole y Angela Lie-A-Lien a biaha te na Argentina, pa participa den VII Campeonato Latinoamericano y pa haci examen di di 4 dan. Esaki ta e prome grado di ‘black belt’ di nivel intermedio y cu ta wordo considera di ta di ‘Sensei’. Tur dos dama tabata exitoso – despues di varios intento infructifero den pasado – y a obtene nan di 4 dan tan anhela.

Na e mesun ocasion na Corrientes, Argentina, Danbi Velásquez a obtene su prome dan (‘faha preto’). Ya cu el a caba di cumpli 13 aña di edad, e ta probablemente e black belt di mas hoben den Kendo mundialmente. Practicamente for di tempo di peuter Danbi ta bin ta train Kendo cu su mayornan Eun Jung y Sergio, y el a slaag merecidamente.

Localmente a organiza examen di grado pa principiante. James Lu y Vincent van Lindert ambos a logra pasa examen pa di prome kyu, locual kiermen cu pronto nan lo ta cla pa haci examen di faha preto, esta di prome dan di Kendo.

Bun Bu Itchi/Kendo Aruba tambe a organiza dos curso pa principiante durante 2017. Esaki ta curso di 10 siman, pa cursista por cera conoci cu Kendo y despues dicidi si nan kier bira miembro regular. Di e dos cursonan a resta 5 persona cu a dicidi di sigui cu Kendo despues di curso.

Na luna di November a tene Campeonato Arubano 2017, cu pelea den diferente categoria. Pim Willems, recientemente bini bek for di Hulanda, a logra su prome titulo nacional di Aruba, tanten cu James Lu a sali Campeon Hubenil. Den categoria principiante, e señorita Metis Delany (9 aña) a gana oro y a mustra di ta un gran talento, mescos cu su ruman muhe Isis Delany (11 aña) cu a corona subcampeon principiante.

Na 2018 Bun Bu Itchi/Kendo Aruba lo purba crece mas y popularisa arte di spada Hapones na Aruba.

- Advertisement -

DUNA COMENTARIO

Please enter your comment!
Please enter your name here