Home Hudicial C 1 aña y mey y 9 aña di prison exigi pa...

C 1 aña y mey y 9 aña di prison exigi pa grupo cu a haci asalto arma riba Gemstones y La Estrella

81
0
SHARE
- Advertisement -

ORANJESTAD – Ayera mainta te den oranan di atardi, Corte den Promer Instancia a trata e casonan di asalto arma riba Gemstones dia 30 November 2016 y La Estrella riba 14 Januari 2017. Loke a capta hopi atencion ta cu e grupo di e Venezolanonan basicamente a haci e asaltonan arma pa haya placa pa nan situacion financiero malo na Venezuela. Fiscal a condena esaki pisa. E castigonan exigi pa Fiscal tabata varia entre 1 aña y 6 luna di prison y 9 aña di prison.

E sospechosonan cu a presenta den sala di Corte ta e Venezolanonan E.M.G., H.D.B., O.C.T., E.C.A., e Colombiano R.R.V., e Arubianonan B.B., A.F. y e muher M.B.

ACUSACIONNAN

Fiscal a bisa cu E.M.G., O.C.T., E.C.A., A.F. y B.B. ta complice di e asalto arma La Estrella na Certified riba 14 Januari 2017.

E.M.G., A.F. y un tal K. ta sospecha di a haci e asalto arma riba Gemstones dia 30 November 2016.

Dia 17 Januari 2017, E.M.G. a wordo deteni cu arma di candela. E muher M.B. a wordo deteni despues cu a haya un cantidad di mas o menos 27 kilo di marihuana na su cas y diferente arma di candela.

ASALTO ARMA

Hues a cuminsa cu e Venezolano E.M.G. y puntra si ta berdad cu dia 30 November 2016 el a forma parti di e asalto arma riba Gemstones. El a admiti di a participa den e asalto arma. El a bisa cu e tabata arma y tabata para na porta. Despues el a bay paden. El a bisa cu e tabata hunto cu un tal K. y A.F. Segun E.M.G., K. y A.F. a bin cu e plan. Segun E.M.G. el a bin Aruba pa traha na dado momento el a perde trabou y nan a ofrece pa haci asalto y lo paga pa cada asalto arma 10 mil florin. El a acepta pa haya placa pa su situacion na Venezuela. E mesun anochi despues di asalto arma na Gemstones, el a haya mil dollar y na December 2016 el a haya 1500 dollar. El a bisa cu for di Gemstones el a haya mas cu 1 kilo di oro. Despues el a wordo acerca pa un muher pa otro asalto arma. E no tabata kier y a bisa cu el a pidi pa ta observador. E ora ey el a conoce O.C.T. (El Flaco) y B.B.

Hues a bisa cu E.M.G. ta wordo mira como e organisador di e asalto arma. Nan a purba haci asalto arma un biaha pero no a sigui pasobra La Estrella tabata sera. E.M.G. a bisa cu ta asina y cu e tabata e momento ey cu A.F. Di dos biaha e tabata cu B.B. den auto. Esnan cu a haci e asalto a bay riba brommer. Hues a puntra pakico E.M.G. tabata den auto. Segun E.M.G., nan a bis’e cu e mester tabata den auto hunto cu B.B. El a haya mey kilo di oro for di e botin di La Estrella. Segun E.M.G., esey ta loke e otronan a haya. Hues remarca cu si E.M.G. no a haci nada, pakico el a haya parti di e botin. Hues a sigui bisa, cu si E.M.G. ta forma parti di e organisacion pasobra el a haya e mesun parti cu e otronan cu si a haci e asalto arma a haya. 17 Januari 2017, Polis a detene E.M.G. pasobra e tabatin arma. Hues a puntra kico e tabata haci cu arma. Segun E.M.G. e arma ta di B.B. kende a dun’e pa warda.

Fiscal a remarca cu E.M.G. ta bisa cu e no a keda cu nada di Gemstones pero tin potret cu E.M.G. cu cadena grandi di oro bisti y cu esey ta procedente di Gemstones. Segun E.M.G. el a saca un potret ora nan a habri e botin pa despues wordo pisa. El a bisa cu el a haya 3 cadena y un armband cual a wordo desconta for di loke e mester a haya.

** E Arubiano A.F. a desmenti di tabata envolvi den asalto arma na Gemstones. Hues a mustra cu E.M.G. a ripiti den Corte loke el a declara na Polis caminda e ta mustra cu A.F. ta envolvi. Segun A.F. por mira claramente cu E.M.G. ta gaña. Segun A.F., nunca el a drenta Gemstones. Segun A.F. ta puramente gañamento di parti di E.M.G. El a bisa cu E.M.G. tabata su amigo y tabata conoce su cas. Pero e no tin nada di haci cu e asalto arma. Segun A.F. dia 17 Januari 2017 e y B.B. tabata hunto cu E.M.G. den bar ora el a wordo deteni cu arma di candela. A.F. a desmenti di tabata envolvi den asalto arma na La Estrella. Hues remarca cu tin otronan cu ta menciona su nomber di ta envolvi.

** E Arubiano B.B.a desmenti di tabata envolvi den e asalto arma na La Estrella riba 14 Januari 2017. Hues a mustra cu E.M.G. ta bisa cu e tabata cu B.B. Segun B.B., E.M.G. ta gaña riba dje. Hues a puntra pakico. Segun B.B., E.M.G. ta kere cu el a laga Polis detene. B.B. ta kere cu E.M.G. a horta e otronan y e ta tira culpa riba dje. B.B. a bisa Hues cu Polis a investiga su cas y no a haya nada. El a bisa cu E.M.G. a huur su auto y por bien ta cu el a haci e asalto arma cu su auto. Segun B.B. el a pone su auto riba social media pa bende y e ora ey Polis a bin riba dje. B.B. a bisa Hues cu si e tabata envolvi, e lo no bay cu su auto y tampoco lo bay pone su auto pa bende.

** E Venezolano E.C.A. tabata un di e asaltantenan riba La Estrella. El a bisa cu e tabata keda den un cas caminda un tal Darwin ta huur cu algun paisano. Nan a bay den auto y E.M.G. a dun’e un arma di plastic y e lo mester a baha cu O.C.T. Nan a bis’e pa coy tur joyas y pone den saco y bay riba brommer. El a ricibi su siguiente dia 3 mil dollar for di E.M.G. Segun E.C.A. e tabata nervioso y a bay aeropuerto pa viaha bay bek Venezuela. Na aeropuerto el a wordo deteni.

** E Venezolano O.C.T. a admiti di a haci e asalto arma na La Estrella. Segun O.C.T., E.C.A. a bis’e pa haci e asalto y cu tur cos lo bay ta facil. Su funcion tabata cu e ta drenta promer, controla tur cos y despues E.C.A. ta drenta y bay cu tur cos. E tabatin 4 dia na Aruba promer cu el a haci e asalto. O.C.T. a bisa Hues cu el a bin for di Venezuela ilegal mescos cu e otronan caminda su situacion financiero tabata hopi dificil y no por a mantene su famia. El a bisa cu el a bin Aruba pa haya un trabou pero door cu no por a haya trabou. E tabata anda cu hendenan cu a hink’e den e asunto aki. Hues a mustra cu a detene O.C.T. cu algun arma. Segun O.T.C. e revolver tabata di dje y e pistol tabata di E.C.A. El a bisa cu ora Polis a yega, el a kita nan for di mesa y sconde nan. El a bisa cu e revolver a wordo usa pa e asalto arma. El a bisa cu el a cumpra e revolver for di un persona pero no kier menciona nomber pa evita problema. E persona ta ilegal na Aruba y ta kere cu el a bay for di e isla.

Fiscal a remarca cu O.C.T. a declara na Polis cu el a puntra un conoci con e situacion tabata na Aruba y si pa haci asalto arma ta facil

** E Venezolano H.D.B. acusa di posecion di dos arma. Segun H.D.B. e armanan no tabata di dje. Un arma tabata di O.T.C. pero no sa di kende e otro ta. El a bisa cu e tabata den baño y ora el a Sali, Polis tabata den e cas. El a bisa cu si e tabatin arma e lo bende esaki pa manda placa pa su famia na Venezuela pa su yiu cu ta malo. El a bisa Hues cu door di no a manda placa, su yiu a muri. El a bisa cu e no a mira e armanan aki. El a bisa cu e no tin nada di haci cu e caso. Awor nan ta tira culpa riba dje. Segun H.D.B., e no tin nada di haci cu asalto arma. Hues a remarca pero H.D.B. tabata anda cu personanan cu tabata envolvi den asalto arma. El a bisa cu e tabata cushina pa nan y nan a bis’e cu nan lo dun’e algo.

** E Colombiano R.V. biba na Aruba, ta wordo acusa di posecion di dos arma den e apartamento hunto cu H.D.B. y O.C.T. R.V. a bisa Hues cu e no tin nada di haci cu e caso. E tabata traha cu real estate y a bay cobra huur. E tabata mas o menos 10 minuut na e cas y Polis a presenta. El a bisa cu regularmente e tabata bay cobra huur. Hues a puntra si R.V. sa di unda e placa ta bin. Segun R.V. e tabata djis pa cobra e huur. El a bisa cu e no a mira e armanan. El a bisa cu e tabata sinta na un mesa pero e armanan tabata poni bou di e mesa.

** E muher Arubiano M.B. ta wordo acusa cu entre Augustus 2016 – Februari 2017, e tabata den posecion di armanan y balanan. M.B. a desmenti e periodo. El a bisa cu ta 29 Januari 2017 un persona Darwin a trece e armanan. E persona a bis’e cu door cu e ta un persona bieu, Polis lo no pensa cu e tabatin arma. El a bisa cu e tabatin 2 rifle, un saco cu balanan cu no ta di berdad y un cantidad di marihuana. Hues a mustra cu na December 2016 tambe M.B. a warda armanan cu tabata den un tas preto. El a bisa cu e no a mira nan. El a bisa cu e tabatin 9 bloki di marihuana. Ta tres biaha a warda 9 bloki cu ta suma 27 kilo di marihuana cu el a warda pa Darwin.

EXIGENCIA DI FISCAL

Ta asina cu Hues a tene un pausa un rato, mirando cu a dura oranan largo cu e interogacion di e sospechosonan. Despues di e pausa a sigui cu e parti di situacion personal di cada sospechoso y despues Fiscal a bin cu su parti. Fiscal a bay hopi detaya riba con un grupo di Venezolano hunto cu algun Arubiano ta sera cabez pa bay haci asaltonan arma.

Na opinion di Fiscal, hendenan cu pasa e experiencia aki, hopi biaha ta keda afecta pa hopi tempo. El a condena totalmente e hecho cu e grupo a bay haci asalto arma pa yega na placa pa nan por yuda nan famia na Venezuela. Fiscal ta haya tur culpable y cu mester manda un señal bon cla cu no ta tolera esaki na Aruba.

CASTIGO

Fiscal ta considera E.M.G. como un di e organisadornan pa e asalto arma riba Gemstones y La Estrella. El a exigi 9 aña di prison p’e.

E sospechoso A.F., kende ta nenga retundamente di tabata envolvi den e asalto arma riba Gemstones, Fiscal ta haya cu e tambe ta hinca den e planeamento di e asaltonan y a exigi 9 aña di prison.

Pa e sospechoso O.C.T., kende a admiti tambe di a haci e asalto arma, el a exigi 5 aña y 6 luna di prison. Pa B.B., kende ta nenga di ta envolvi den e asalto na La Estrella, Fiscal ta consider’e un coordinador y a exigi 5 aña di prison.

Pa e sospechoso E.C.A., kende tabata un di e asaltantenan riba La Estrella, Fiscal a exigi 4 aña y 6 luna di prison.

Pa H.D.B., kende tabata den e apartamento cu e dos armanan y ta bisa di no sa nada di asalto arma, Fiscal a exigi 2 aña di prison.

Pa e muher M.B., kende tabatin armanan y un lote grandi di marihuana scondi na su cas, Fiscal a exigi 24 luna di prison di cual 8 luna ta condicional.

Pa R.R.V., kende a bisa cu e no sa nada di e armanan ora cu Polis a yega pa haci razia, Fiscal ta hay’e culpable y a exigi 18 luna di prison.

Ta asina cu tanto M.B. y R.R.V. actualmente ta liber. Aki tres siman ora cu sentencia cay lo haya sa si nan ta keda liber of nan ta wordo deteni den sala di Corte despues di sentencia.

 

- Advertisement -

DUNA COMENTARIO

Please enter your comment!
Please enter your name here