Home Comentario Carta dirigi na atencion di Oficina di Cultura

Carta dirigi na atencion di Oficina di Cultura

10
0
SHARE
- Advertisement -

Remitido

Part 1

Señor Redactor, permiti mi un espacio den DIARIO pa mi trece padilanti lo siguiente. Mane e Grandinan di Edad na San Nicolas sa bisa ; “Well my Father”!

Pa mi sorpresa ATROBE, dia 27 di Nov. 2017 den edition di Diario pagina 36, a sali publica un relato referente na 12 musiconan Arubano cual-nan biografia a keda documenta pa pueblo por conoce mas detayenan di e trayectoria musical di e personahenan aki y pa nan legado por keda conserva pa e generation cu lo sigui etc.

Un iniciativa bao auspicio di e Departamento di Cultura cual mester worde aplaudi fuertemente y duna elogio tambe di buena fe na dicho oficina y e Ministerio di Cultura y demas instancia- personahe(nan) envolvi pasobra di e modo aki ta percura cu e memoria y trayectoria extenso di e musiconan aki NO cai nunca den e abismo di olvido y ta eleva nan spirito di entusiasmo pa nan sinti honra di e muestra di aprecio pa cu reconocimento pa nan debut riba tereno di entretenimento musical, Bendicion na tur!

Den un frase firme; e documentacion di biografia di musiconan ta Merecidamente y e hecho cu Departamento di Cultura ta keda pending pa ricibi mas information di OTRO musiconan pa worde documenta tambe, ta Excellente!

Loke si a decepcionami lamentablemente y apesar cu kizas tin e plan pending pa cu esaki tog, ta e hecho cu ATROBE a laga afor, lubida, keda sin menciona, haci mane cos cu no tin mas espacio pa agrega, pretende di no sa nada al respecto, haci cos di mala fe di NI purba na recorda riba memoria sikiera (corda awor na duna reconocimento oficial) di e banda musical Arubano di integrantenan color scur esta: “San Fernando Brothers”!

Djis pa informa tur hende; “San Fernando Brothers” no solamente ta e prome banda musical local cu a entretene (durante transcurso di 35 aña gratuitamente porcierto) e turistanan di crusero na Waf cu ambiente musical, sino tambe ta e prome banda musical local cu a debuta pa e Apertura di e Prome Hotel na Aruba!

“San Fernando Brothers” ta e prome banda pa toca pa e prome Eleccion di Reina Carnavalesco di Aruba! Prome banda di integrantenan color scur pa toca pa e prome Tumba contest di Aruba! Prome banda cu a subi caya cu truck durante Parada Carnavalesco di Aruba! Prome banda pa toca na Aeropuerto pa yegada di Mama di y su Majestad La Reina! Un banda cu a toca pa diferente Eventonan Social, Malls, Casino’s, Fiesta Rotaria, Actividad pa Recauda Fondo, Marinierse Kazerne, Cas di Parientenan di algun Gobernantenan mes cualnan nunca a honra “San Fernando Brothers” porcierto!

Dia cu Esso Golf Club a ser rehabri back, ta “San Fernando Brothers a toca Mi a wak ex Gobernantenan a traha un “Wall of Fame”, un Welcome Plaza, Honra varios musiconan algun luna nan atras durante un edicion di Carubbian Fest., diseña Scultura den mall, Develo Monumental, extende Plakkaat di Reconocimento, nombra Caya na Nomber di Musico, entrega certificado di Honor al Merito pero a EXCLUI “San Fernando Brothers” for di tur e faranduleo aki!

Pret ainda ta e hecho cu durante maneho di e ex Gobernantenan di e GREEN people tabatatin un meneer consehero man drechi y tambe un dama parlamentaria cualnan porcierto a lanta mesun tempo cu “San Fernando Brothers” anto cualnan sa bon bon di tur e legado musical di e banda aki pero a prefera/pretende di haci cos di mala fe di no papia nada positivo na fabor di e banda di “San Fernando Brothers”!

Awor pa colmo di remate aparentemente e Gobernantenan actual (cualnan porcierto a ser sostene pa famia di “San Fernando Brothers” durante 36 aria porcierto) ta Documenta Biografia di Musiconan sinembargo ta laga “San Fernando” AFO? Pero pakico? Paso San Fernando ta di San Nicolas? Paso nan ta color scur? Paso tin “algun” hende(nan) color scur mes cualnan ta traha den gobierno cu no kier wak nan propio hende color scur bay dilanti? Of ta reina e tendencia cu no tin interes algun pa sa di e Historia di pasado di nos priopio Hendenan !? Of ta asina cu e dicho universal cuenti : “burico ta traha duro pa cabay come” ta e motibo?

Paso si haci un analisis previo, dia cu e ex Gobernantenan a drecha entrada di Waf y a dicidi pa traha un Plaza Nobo y cu lo nombra esaki , nan NI por a corda riba nomber di “San Fernando” ya cu ta “San Fernando” ta esnan cu a traha duro mane burico pa entretene e turistanan crusero di e tempo aya cu ambiente musical.

Nan a percura pa e bishitantenan turistico cu ta drenta nos Isla via Waf keda cu un impresion tremendo pa cu entretenimento musical ! Dus sikiera lo mi a imagina cu nan a nombra e plaza nobo dilanti entrada di Waf na nomber di “San Fernando” pero a opta pa yame “Paardenbaai Plaza” na lugar.

Pues aki ta caminda cu “burico a traha duro pa cabay come”!  Pues atrobe, foei Gobernantenan, foei Oficina di Cultura y Turismo! Foei na esnan cu ta pretende y ignora y cu ta traha bao gobernantenan y cualnan tambe porcierto a lanta for di infancia cu “San Fernando” pero door di capricho di conducta di mala fe, ta prefera di no saca cara!  Ojo, unabes naci aki riba, cria, lanta, educa y no importa for di cual barrio bo a bin anto bay residencia despues, no ta importa bo color di cuero y respetando opinion di tur y sin ofende hende, bo ta y lo bo keda un Arubiano!!

Awor lo mi kier a desvia un tiki asina racialmente; Pero shon nan laga di ta nek, si ta asina cu nos por a ricibi cordialmente hendenan procedente for di OTRO parti rond mundo cualnan a pasa den un desaster di naturalesa anto nos a strecha y habri man di ayudo pa brinda nan un hogar, mihor porvenir, duna nan un pida pan bati/funchi anto conchi di sopi yuwana to cu nan a wak nos muhernan rubiano y nan a bira loco enamora anto kier keda aki pa semper awor anto nos ta draai bisa cu esaki ta un Arubiano, pakico e ora ey tambe no lo kier yama un hende color scur cu legitimamente a nace aki riba pa Arubiano?

Bayendo back riba e origen di mi articulo, mi a dirigi e articulo directamente na Departamento di Cultura pero indirectamente na e Ministerio di Cultura pasobra na hopi ocasion nos gusta punta den direccion di Gobernantenan pero tin biaha ta asina cu netamente esnan cu ta fungi bao nan, ta esnan cu sa suministra informacion pa traspasa esaki na un stap mas ariba anto no pa crea un perception pa critica trabao di hende, pero tin biaha ta falta di conocimento of sa tin algun datos y informacion den “pipe line” tranca of ta asina cu info. erroneo a ser duna etc.

No obstante tur esaki, nos mester duna oido y reconocimento na hendenan cu a haci bon debut. Dus mi ta keda cu e enthousiasmo di positivismo cu e persona-, instancianan envolvi, lo busca mas drechi di information di “San Fernando Brothers” pa docurrienta nan Biografia musical y cu nan lo tuma nota di e articulo aki, un cordial saludos, di parti Nieto y Subrino di “San Fernando Brothers”,

 

Junior Rivas.

(Adres conoci

Pa Redaccion).

- Advertisement -

DUNA COMENTARIO

Please enter your comment!
Please enter your name here