Home Hudicial Caso di baby Lunah ta sigui na Januari den corte di apelacion

Caso di baby Lunah ta sigui na Januari den corte di apelacion

103
0
SHARE
- Advertisement -

ORANJESTAD  (AAN): Corte a obliga AZV pa cubri gastonan di por ehempel baby Lunah. Un caso cu toch a capta basta atencion y ta hopi comenta pa algun tempo caba desde cu e mucha a nace.

Anko Ringeling, director di AZV a conta cu manera cu por a tuma nota den medionan di comunicacion, medionan social tambe, e ta asina cu ora cu a haya un peticion pa paga e tratamento di baby Lunah di e mayornan, a wak kico tin para regla den ley.

E ley di AZV ta bisa cu locual ta wordo cubri ta tratamentonan cu ta comun y coriente den e specialismo relevante. Den e caso aki, muy en particular, ta bay pa operacion di curason (open heart surgery) di baby Lunah.

Ta custumber di AZV, ta busca opinion di expertonan riba e tereno aki. Den e caso aki, no solamente wak e expertonan local, pero tambe internacional. Es decir, ta acerca expertonan na Hulanda, na Colombia y na Merca.

A base di e opinion di expertonan, a yega na e conclusion cu e tipo di operacion pa pashentnan manera baby Lunah, no ta comun y coriente. A base di esey AZV a rechasa e peticion di e mayornan pa cubri e gastonan di e operacion.

E mayornan a apela e decision di AZV na prome instante cerca LAR, cu ta un comision cu ta reevalua tur e decisionnan cu ta wordo tuma door di un organo publico manera AZV ta y LAR a mantene e decision di AZV, cu e tratamento pidi pa baby Lunah no ta cay bao di cubrimento di AZV.

E ora ey e mayornan a apela e decision di LAR na corte den prome instancia y e apelacion ey lo bay tuma luga na Januari awo. Anticipando e proceso eynan, nan a cuminsa tambe un caso sumario (kortgeding). Mientras tanto, dia 29 di November, hues a duna un sentencia den e kortgeding.

Kico e sentencia di hues ta bisa?

Pa cuminsa hues a bisa cu un kortgeding, caso sumario, ta un caso cu mester tuma luga den un lapso di tempo cortico y mirando e circunstancianan ey, no tin suficiente tempo pa bay duna un veredicto si e decision cu AZV a tuma si e ta un decision corecto, cu ta un decision segun ley cu a wordo aplica na un manera corecto. Hues no a duna un veredicto pa esey, esta e decision di AZV.

Si hues a bisa, cu si mira e situacion, ta ripara cu toch tin cierto emergencia pa e operacion, pa baby Lunah. Baby Lunah tin un malesa progresivo y si wak e banda di baby Lunah, poni banda di interes cu AZV tin, organo cu mester sigui ley, den e situacion eynan ta duna toch mas peso na e interes di baby Lunah. Hues a bisa cu e por of e ta haci esey, pasobra su decision pa duna mas peso na baby Lunah, no ta ireversibel pa AZV.

 

Kico e kiermen cu esey

Hues a bisa cu pasobra cu den e caso di apelacion na Januari, cu e hues e ora ey ta dicidi cu e decision di AZV tabata corecto, ainda AZV por cobra bek e gastonan di e tratamento. Mirando tur esey, hues a ordena AZV pa cubri e gastonan di e tratamento di baby Lunah. Es decir mas specificamente, e caterisacion y e operacion cu ta wordo basa riba e caterisacion di baby Lunah.

 

Gasto

Segun Ringeling, nan a cuminsa actua. A tuma contacto cu specialistanan na Merca unda cu e mayornan y baby Lunah ta y a pidi nan con e procedura lo cana. Naturalmente e gastonan tambe.

 

Control

Si bay di acuerdo pa haci cierto tratamento, ta cumbini tambe cu e specialistanan cu ta trata e pashent, cu nan mester raporta na mediconan di AZV, pa asina nan sigui monitorea e caso tambe. Den e caso di baby Lunah, esey tambe lo sosode sigur.

 

Presedente

Tin biaha ta como sifuera cu ta AZV of hasta Ringeling mes a cuminsa inventa e criteria ey, di comun y coriente. Pero esey no ta e caso. E ta para den ley. Pakico esunnan cu a traha ley a haci esey? Si bo no haci esey, cu mester ta un tratamento comun y coriente, e ora ey cualkier tratamento den un di e paisnan cu e ley ta menciona, por ehempel Merca, cu un specialista ta bisa cu e por haci’e asina, na un manera hopi special, mester wordo cubri door di AZV. Ta pesey esnan cu a traha e ley a bisa cu no ta cualkier tratamento mester wordo cubri. E ta bay pa un tratamento cu ta comun y coriente. No un tratamento cu ta experimental por ehempel. E mester ta un tratamento cu a wordo suficientemente accepta door di e comunidad di profesionalnan concerni. Esey ta e background di e criteria cu ta ancra den ley di comun y coriente.

 

- Advertisement -

DUNA COMENTARIO

Please enter your comment!
Please enter your name here