Home Hudicial Castigo entre 1 y 6 aña di prison pa grupo cu a...

Castigo entre 1 y 6 aña di prison pa grupo cu a haci asalto arma na La Estrella

197
0
SHARE
- Advertisement -

Un muher cu tabata liber a cuminsa yora ora el a wordo deteni pa bay KIA

ORANJESTAD(AAN)  – E sospechosonan E.M., H.D.B., O.C.T., R.R.V., E.C.A., A.O.F., B.B., y e muher M.B. a presenta dilanti Hues pa scucha nan sentencia. Ta asina cu E.M. ta encarcela na Hulanda y ta via computer cu screen grandi, Hues a lesa e sentencia pa E.M. Esaki a sosode te na ultimo. E sospechoso R.R.V. y e muher M.B. tabata liber. Despues di e sentencia, e muher M.B. a wordo deteni y geboei den sala di Corte. El a cuminsa grita yora. Su abogado a bay cun’e patras den un cuarto pa calm’e.

ACUSACIONNAN

Dia 1 December 2017 tratamento di e caso a tuma lugar caminda Fiscal a bisa cu E.M.G., O.C.T., E.C.A., A.F. y B.B. ta complice di e asalto arma La Estrella na Certified riba 14 Januari 2017.

E.M.G., A.F. y un tal K. ta sospecha di a haci e asalto arma riba Gemstones dia 30 November 2016.

Dia 17 Januari 2017, E.M.G. a wordo deteni cu arma di candela. E muher M.B. a wordo deteni despues cu a haya un cantidad di mas o menos 27 kilo di marihuana na su cas y diferente arma di candela.

Fiscal a bay hopi detaya riba con un grupo di Venezolano hunto cu algun Arubiano ta sera cabez pa bay haci asaltonan arma.

Na opinion di Fiscal, hendenan cu pasa e experiencia aki, hopi biaha ta keda afecta pa hopi tempo. El a condena totalmente e hecho cu e grupo a bay haci asalto arma pa yega na placa pa nan por yuda nan famia na Venezuela. Fiscal ta haya tur culpable y cu mester manda un señal bon cla cu no ta tolera esaki na Aruba.

CASTIGO EXIGI PA FISCAL

Fiscal ta considera E.M.G. como un di e organisadornan pa e asalto arma riba Gemstones y La Estrella. El a exigi 9 aña di prison p’e.

E sospechoso A.F., kende ta nenga retundamente di tabata envolvi den e asalto arma riba Gemstones, Fiscal ta haya cu e tambe ta hinca den e planeamento di e asaltonan y a exigi 9 aña di prison.

Pa e sospechoso O.C.T., kende a admiti tambe di a haci e asalto arma, el a exigi 5 aña y 6 luna di prison. Pa B.B., kende ta nenga di ta envolvi den e asalto na La Estrella, Fiscal ta consider’e un coordinador y a exigi 5 aña di prison.

Pa e sospechoso E.C.A., kende tabata un di e asaltantenan riba La Estrella, Fiscal a exigi 4 aña y 6 luna di prison.

Pa H.D.B., kende tabata den e apartamento cu e dos armanan y ta bisa di no sa nada di asalto arma, Fiscal a exigi 2 aña di prison.

Pa e muher M.B., kende tabatin armanan y un lote grandi di marihuana scondi na su cas, Fiscal a exigi 24 luna di prison di cual 8 luna ta condicional.

Pa R.R.V., kende a bisa cu e no sa nada di e armanan ora cu Polis a yega pa haci razia, Fiscal ta hay’e culpable y a exigi 18 luna di prison.

SENTENCIA

Hues a bisa den su sentencia:

  • R.R.V., acusa di posecion di armanan. Hues no ta haya legalmente proba cu R.R.V. realmente tabata den posecion di armanan y pesey ta declar’e liber. Hues a duna orden pa e armanan wordo destrui.
  • E acusado H.D.B., Hues ta haya legalmente proba cu e ta culpable complice di posecion di arma y incubrimento di cosnan horta. Hues a condena H.D.B. na 24 luna (2 aña) di prison kitando e tempo cu e ta sera den KIA.
  • E acusado O.C.T., Hues ta haya legalmente proba cu e ta complice di e asalto arma riba 14 Januari 2017 na La Estrella. Tambe Hues ta haya O.C.T. culpable di posecion di arma y balanan. Hues a condena O.C.T. na 4 aña y 6 luna di prison kitando e tempo cu e ta sera den KIA. Tambe Hues a ordena pa destrui e arma y balanan. E 949 dollar cu a haya O.C.T. cun’e, lo keda confisca.
  • E acusado E.C.A., Hues ta haya legalmente proba cu E.C.A. ta complice di e asalto arma riba 14 Januari 2017 na La Estrella. Hues a condena E.C.A. na 48 luna (4 aña) di prison kitando e tempo cu e ta sera den KIA. E 2813 dollar cu a haya E.C.A. cun’e ta keda confisca. Hues a ordena cu E.C.A. lo mester duna bek algo mas di 5 mil dollar na esnan cu a sali perhudica.
  • E acusado A.O.F., Hues ta haya legalmente proba cu A.O.F. ta complice di e asalto na Gem Stones y La Estrella. Hues a condena A.O.F. na 5 aña di prison kitando e tempo cu e ta sera den KIA. E auto cu cual a haya A.O.F. lo keda confisca. Hues a ordena cu A.O.F. lo mester paga 6128 florin na diferente persona cu a sali perhudica door di e asaltonan aki. Pa loke ta e asalto arma na Gem Stone, Hues a ordena A.O.F. pa paga 50 mil florin. Hues a pone e medida cu si A.O.F. no paga Gem Stones, e lo mester bay 285 dia sera y si e no paga e otro personanan, e lo mester bay 65 dia sera.
  • E acusado B.B., Hues ta haya legalmente proba cu B.B. ta complice di e asalto na La Estrella riba 14 Januari 2017. Hues a condena B.B. na 30 luna (2 aña y 6 luna) di prison, kitando e tempo cu e ta sera na KIA. E auto cu cual B.B. tabata, lo keda confisca.
  • E muher M.B., Hues ta haya legalmente proba cu entre December 2016 – Februari 2017, e tabatin armanan y balanan y un cantidad di marihuana scondi na su cas. Hues a condena M.B. na 20 luna di prison di cual 8 luna ta condicional cu un tempo di prueba di 2 aña. Hues a bisa cu e armanan y balanan y droga lo mester wordo destrui. Hues a duna orden di detencion di biaha. M.B. a cuminsa grita y yora ora cu miembro di CEA a bisti boei. Su abogado mester a bay cun’e patras den un cuarto pa papia cun’e.
  • E acusado E.M.G. na Hulanda sera, Hues a bisa cu a keda legalmente proba cu E.M.G. ta culpable di complice di e asalto arma na La Estrella y posecion di arma y balanan. Tambe E.M.G. ta complice di e asalto arma na Gem Stones.

Hues a condena E.M.G. na 6 aña y 6 luna di prison. Ademas Hues a ordena cu E.M.G. tambe mester paga 6128 florin na e 6 personanan na Gemstone. Tambe cu E.M.G. mester paga 50 mil florin na Gem Stones. Hues a fiha e medida di pago pa si E.M.G. no paga e personanan, 65 dia di prison y si e no paga Gem Stones, 285 dia di prison.

 

- Advertisement -

DUNA COMENTARIO

Please enter your comment!
Please enter your name here