Home Gobierno Comision lo supervisa e calidad di e trabaonan cu falta pa entrega...

Comision lo supervisa e calidad di e trabaonan cu falta pa entrega Green Corridor

127
0
SHARE
- Advertisement -

Minister Otmar Oduber ta splica:

ORANJESTAD (AAN) — Den entrevista cu Matutino DIARIO, Minister Otmar Oduber, titular di Infrastructura, el a referi na e proyecto di Green Corridor y Watty Vos Boulevard, cu ta dos Proyecto di Sector Publico y Priva.

E dignatario a elabora riba un presentacion cu el a caba di haya di ambos PPP, unda el a wordo informa con leu nan ta, den ki fase ta awor y ki tipo di problemanan nan a confronta y cual e lesnan cu e desaroyadornan a siña for di esaki.

Green Corridor ta 95 porciento cla, e mandatario a subraya, pero e otro 5 porciento ta den disputa riba diferente aspecto cu mester wordo atendi.

E mandatario a splica cu e parti meymey den e separacion di e dos diferente direccionnan riba e caminda ta un di e discusionnan cu tin.

Minister Oduber a agrega cu el a pidi cierto documentonan adicional encuanto calidad, pasobra no tin un discusion si e proyecto ta necesario of no, of si mester a bay den tal magnitud of o.

E dignatario a subraya cu tin basta critica tocante e calidad no solamente riba e pida meymey, pero diferente caminda unda ya caba a duna e ordo necesario pa locual no ta bon wordo drecha y tur e gastonan cu esaki ta encera ta core pa cuenta di e compania mes.

E mandatario a remarca cu esaki no ta un producto sino un servicio cu ta wordo brinda na nos pais pa un periodo di 18 aña y den esey tin algun discusion tambe riba cierto aspectonan cu a wordo inclui den e destaho cual den tres luna mester yega na un conclusion definitivo riba e aspecto aki tambe.

Encuanto e parti meymey cu ta e area di problema mester yega na un acuerdo entre tur e partnernan envolvi, manera e companianan di utilidad cu ta responsible pa e lineanan cu ta core eybou den e pida meymey, y eynan decisionnan mester wordo tuma. Pero infrastructuralmente mayoria di e trabao ta cla.

E mandatario a bisa cu no obstante banda di caminda hasta a traha acera cu a cuminza kibra caba y no ta den su condicion optimo. En todo caso lo pone condicion pa e aspecto di seguridad ta na prome lugar.

E titular a subraya cu el a papia cu e director y su team y a bise cu gobierno lo nombra un comision pa supervisa e trabao aki hopi skerpi, pa sigura cu Aruba no ta paga un florin extra di e costo cu inicialmente e proyecto aki mester a encera. Tur e problemanan cu a surgi mester keda soluciona prome cu entrega e proyecto na man di gobierno, y cada un punto lo wordo bon studia y discuti na beneficio di nos comunidad.

 

 

 

- Advertisement -

DUNA COMENTARIO

Please enter your comment!
Please enter your name here