Minister Chris Romero:
ORANJESTAD (AAN) – Minister di Transporte sr. Chris Romero y Minister di Turismo sr. Dangui Oduber, recientemente, a biaha pa Miami, unda nan a reuni cu dos compania di Cruisero.
Den entrevista cu Minister Romero el a duna di conoce cu nan a reuni cu Carnival Cruise Lines y Royal Caribbean Cruise Lines.
E dignatario a indica cu tabata hopi importe cu su persona como titular di Transporte a realiza e viahe aki, pasobra tin cierto preocupacionnan cu tin na Aruba, cu a wordo verifica durante e bishita aki.
Carnival Cruise Lines, por ehemplo, a trece dilanti su preocupacion relaciona cu nos waf, y cu nan ta hayando keho for di e turistanan. Esaki ta aspectonan cu no solamente a wordo confirma, pero nan kier pa bin cu solucionnan riba e situacion mas pronto posible.
E mandatario a menciona algun punto, manera cu cierto verguningnan cu tin paden no ta wordo uza manera mester ta y asina tin diferente cambio cu ta necesario pa haci.
Ambos compania di crusero a duna indicacion cu tin e posibilidad pa amplia mes. E minister a menciona cu actualmente ta wordo bisa cu 97% di e turistanan ta baha for di e barco y 43% so ta haci uso di e tours, y esey kiermen cu tin un gap basta grandi ainda cu por saca negoshi afo pa nos pais. Nan a bisa tambe cu nan kier mas calidad di e producto, den sentido cu por brinda e turista experencianan nobo unda nan por conoce algo nobo.
Minister Romero a subraya cu varios di e tours ya ta conoci y nan ta haya turistanan di ripiticion pasobra nan a bay den dje caba. Tin di e turistanan aki cu ta biniendo Aruba pa diez aña caba y ya no ta bay un tour di e facil ey. No obstante, e espacio tey pa crece y e aña aki ta bay cera cu mas di 700 mil turista crusero, di cual 45% a haci uso di e toursnan aki y si Aruba brinda nan algo nobo, di mas calidad nan por amplia e espacio.
E compania Royal Caribbean a expresa aspectonan similar, sinembargo e satisfaccion di e turista cu destino Aruba a score halto. E mandatario a subraya cu gobierno ta bay evalua esaki pa wak den ki direccion nan ta bay.
E companian tin e expectativa cu pa 2018 nan ta bay sobrepasa e 700 mil turistanan te 800 mil. E mandatario a expresa cu tin e posibilidad di duna mas vergunning pa tours, pero no cu ta bay tin nobo sino cu lo amplia e posibilidad pa esnan existente. E dignatario a subraya cu aunke e situacion di horcan cu a afecta Isla Ariba, por ehemplo, ta lamentable tog el a faborece e turismo crusero pa Aruba, pero esey a sosode e aña aki y no kiermen cu algo asina lo ripiti, pesey mester evalua mas kico ta bay haci.
Di parti di e operadornan di tours nan a acerca e mandatario y bise cu nan kier haci inversionnan grandi pa aumenta e calidad di nan servicio.
Un di e aspectonan cu e mandatarionan a ricibi for di afo ta cu esnan encarga cu tours na Aruba no ta asina representable manera mester ta, por ehemplo den nan manera di actua contra otro dilanti di e turistanan.
