Home Salud Compara cu Curacao y otro paisnan Aruba a keda atras den cuido...

Compara cu Curacao y otro paisnan Aruba a keda atras den cuido di salud mental

36
0
SHARE
- Advertisement -

Dr. van Gaalen director Fundacion Respaldo:

ORANJESTAD (AAN) – Director Medico di Fundacion Respaldo, Instituto Psikiatrico Aruba, sr. Hendricus van Gaalen, a hiba palabra den conferencia di prensa, relaciona cu e traspaso di PAAZ Afdeling di HOH pa e Fundacion.

E docter a gradici e presencia di Minister di Salud ya cu Gobierno a traha un documento masha largo pa formula e Respaldo cual ta e prome Fundacion di Salud Mental na Aruba, y nan ta para tras di e fundacion y esaki tras di gobierno.

Dr. van Gaalen a expresa cu e ta hopi feliz cu e logro aki, den cual Aruba ta central. El a acentua cu Aruba compara cu Curacao y otro partinan di mundo, a keda hopi atras encuanto cuido di salud mental y esaki mester cambia lihe si no Aruba ta bay cambia pero pa malo, pasobra e problema ta grandi riba nos Isla.

“Nos ta willing pa traha duro pa cambia nos problemanan psikiatrico den nos pais, y esey Respaldo ta bay haci. Kiermen, Respaldo ta sosten: kiermen ‘bo por conta riba mi’. ‘Bo sa kico ta respaldo?’ ‘Sosten, ta e contesta cu un enfermero a gana den un contest pa duna nomber na e Fundacion. Bo por conta riba mi ta nos meta”, dr. van Gaalen a subraya.

Structura di PAAZ ta keda y nan ta bay mehora e parti ambulatorio, y esaki kiermen cu nan ta bay traha riba informacion, prevencion, yuda docternan di cas, traha cu policlinica di San Nicolas y na Playa. “Nos ta cuminza cu dos fast team, mescos cu prome pero cu mas hende, mas profesional den dje y nos mester di mas. Nos tin aworaki 50 profesional pero nos ta bay yega te 90, loke no ta hopi ainda pero si suficiente pa traha un bon psikiatria na Aruba”, dr. van Gaalen a subraya.

El a expresa palabra di pabien na Gobierno, cu ta brinda Respaldo apoyo, tambe na Hospital ya cu nan ta keda traha hopi cu otro y nan lo sigui reuni dos biaha pa siman. Tambe a menciona drs. L de Jong ken tabata traha pa AZV y tin hopi experiencia y nan Office Management cu a traha hopi duro.

“No lubida cu na PAAZ tin hopi bon profesional, pero nan tin cu haya mas tools y mihor calidad di onderwijs. Pues, tin hopi cos pa haci. Mi ta kere cu durante e prome lunanan di aña cu ta bini nos no ta bay wak mucho cos, pero den e transcurso di aña nos ta bay haya mas hende y ya pa fin di aña boso lo wak un diferencia hopi grandi di con nos ta anda cu psikiatria na Aruba y pa Aruba”, dr. van Gaalen a expresa.

Dr. van Gaalen no a descarta e posibilidad di un edificio nobo pa PAAZ, loke e sa cu mester bin den futuro y si no renovacion di e edificio. Pero e decision lo wordo tuma aki un par di luna. Docter van Gaalen a señala cu PAAZ no mester bira hopi mas grandi, pero un tiki mas amplio si, pasobra nan ta bay pone hopi enfasis riba tratamento ambulatorio, tanto na San Nicolas como na Playa, y tambe e fast team ta bay bishita pacientnan na cas, riba caya, of na unda nan ta.

Un di e motibonan ta cu PAAZ ta caro y e camanan tambe y e Fundacion tin cu wak bon con ta distribui su recursonan financiero. Ademas mester defini hopi bon, hunto cu gobierno, kico nan tarea ta: kico verslavingszorg ta haci, na unda e limitenan di Respaldo ta, unda e medionan di Verlavingszorg y di otro fundacionnan ta, pues mester dividi bon e tareanan aki na bienestar di Aruba.

 

 

 

- Advertisement -

DUNA COMENTARIO

Please enter your comment!
Please enter your name here