Home Economia Confiansa di consumidor ta mehora pero ta permanece pesimista

Confiansa di consumidor ta mehora pero ta permanece pesimista

5
0
SHARE
- Advertisement -

ORANJESTAD (AAN) —  Sentimento di e consumidor a mehora un poco den e di tres trimester di 2017 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor a sera na 95,6 compara cu 94,4 den e trimester anterior, indicando sinembargo ainda sentimentonan relativamente pesimista (Grafiek 1) [1].

Apesar di sentimentonan negativo en general, consumidornan tabata positivo riba nan situacion financiero personal, cu un indice cu a yega na 102,2, esta relativamente optimista. Consumidornan tabata mustra hopi mas confiansa riba nan situacion financiero pa futuro (102,7). Sinembargo, mayoria di e otro componentenan di e situacion actual di e consumidor tabatin resultado mas pesimista compara cu e encuesta anterior, causando un bahada den e Indice di Situacion Actual for di 95,5 te na 94,8 (Grafiek 2).

E expectativanan di e consumidor a subi di 94,7 pa 97,3, causa pa gran parti pa un sentimento positivo riba e situacion financiero personal pa futuro cual a wordo mitiga pa  e expectativanan di trabou  y tambe e posicion financiero di gobierno.

E Indice di Habito di Consumo a mehora un poco den e trimester bou di revision. Esaki ta debi na sentimentonan positivo relaciona cu baymento cu vakantie (Grafiek 2). Sinembargo, e mayoria di consumidornan a indica cu no tabata apropia pa cumpra un auto (60,4 porciento), ni pa haci un prestamo (70,0 porciento) of tuma un hipoteca (74,0 porciento). E gran mayoria di respondientenan (63,1 percent) ta anticipa cu prijsnan lo subi den e siguiente 6 luna resultando na un  Indice di Expectativa di Prijs di 90,9.

Resumiendo, e mehoracion den confiansa di consumidor ta atribui principalmente na sentimentonan positivo di consumidornan relata na nan situacion financiero personal actual y pa futuro y sentimentonan rond di vakantie ( Tabel 1).

[1] E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidornan no ta ni optimista, tampoco pesimista, pero ta neutral den nan pensamento di desaroyo na Aruba. Entre 100 y 110, e indice ta mustra un situacion di optimismo den pensamento di consumidornan.

- Advertisement -

DUNA COMENTARIO

Please enter your comment!
Please enter your name here