Home Salud Conflicto na pia di trabao ta e prome causa di malesa psicosomatico...

Conflicto na pia di trabao ta e prome causa di malesa psicosomatico na Aruba

22
0
SHARE
- Advertisement -

Docter di control na SVb Myron Genser:

ORANJESTAD (AAN) – Un di e causanan di malesa psicosomatico bao trahadornan ta conflicto na trabao, por ehemplo (esfera hostil na pia di trabao) cu ta e causa mas relevante, sigui pa dificultadnan economico-financiero, relacion amoroso instabil, ademas violencia domestico y abuso sexual cu ultimo tempo ta bin mas y mas dilanti, den e comunicacion cu docter, sin laga afo e pacientnan cu ta wordo diagnostica cu cancer, entre otro, cancer na pecho.

Atmosfera laboral como causa:

Director di SVb Ir. Edwin Jacobs a menciona e asunto di problema na pia di trabao como un causa di malesa y dr. Genser, como medico di control, a confirma su palabranan y a pone como ehemplo, loke ta sosode den sector publico.

“Hopi bez ta conflictonan na nivel di trabao, den departamentonan di gobierno, unda cu pa motibo di politica un ta guli otro. Tur dia ocho ora di trabao unda ‘ami ta un color, abo ta otro color y mi ta bay castiga bo…’ etc”.

Factornan economico, amoroso y abuso:

“Tambe e problema emocional di tur hende ta esun economico, tin hende tin hopi debe: cas no por wordo paga, hipoteca, ta bay kita cas for di hende pasobra e ta logra mas, etc. Y problema amoroso; problema di curazon, no cardiologico, pero emocional; violencia domestico y abuso sexual”.

“Incluso, aworaki e problema di abuso sexual cu den e dianan aki ta saliendo mas na cla. E familiar ta puntra mi kico e tin cu haci y mi ta dirigi nan na Buro Sostenemi, of DAS, pa wak si acaso nan tambe ta sinti cu un of otro cos no a bay mucho bon. Aworaki, cinco biaha mas cu aña pasa, e hendenan ta sinti nan mes mas confortable y menos intimida pa papia cu nos tocante violencia domestico y abuso sexual”, dr. Genser a subraya.

Genser a acentua cu di tur e factornan aki esun di conflicto na trabao ta esun di mas grandi, sigui pa e problemanan economico y di indole  amoroso. Pesey nan ta bay traha cu un psicologo experto den salud ocupacional.

E hoben docter a comenta tambe cu hopi ta depende di e edad di e pacient. Por ehemplo, personanan di mas edad cu ta mira cu edad ta pasa nan sin cu nan a logra di completa loke nan kier a logra den bida ora yega na e edad ey.

E problemanan economico ta mas general. Den edad un tiki mas cu 30 aña hopi kier traha nan mesun cas, ta busca hipoteca, y tin biaha nan ta yega fin di luna y ta dificil pa nan cumpli cu e obligacion aki.

Pacientnan diagnostica cu cancer:

“Problema psicologico tambe ta surgi ora un persona wordo diagnostica cu un malesa, cancer por ehemplo y cu unico cos cu e tin cu percura ta pa ricibi tratamento pa wak si e por cura. Pero pa e lucha psicologico, e conflicto cu su mes, e no ta haya ayudo di Psicologo. Pa un tratamento integral e persona aki tambe mester di un cariño, un ayudo mental. Pero generalmente nan ta bay Psikiatra ken ta receta remedi, mientras cu si e haya ayudo psicologico e por papia mas y expresa su mes, kizas haya un tiki mas speranza, loke no kiermen speranza falso tampoco, pero tools y tips pa yude den locual e tin cu enfrenta”, dr. Genser a subraya.

SALUD OCUPACIONAL: Opleiding

Dr. Myron Genser a comparti un bon noticia cu nos, tocante otro proyecto cu su persona y un par di colega mas, ta bay cuminza na Januari, sigur na beneficio di comunidad.

“Den e proximo dos añanan ami y un par di colega mas ta bay ta bezig cu un opleiding cu ta bay cuminza awor, via Hulanda unda nos ta bay specializa tambe den salud ocupacional, y e idea ta pa aplike na pia di trabao. Esey lo ta conhuntamente cu SVb cu ta duna nos espacio pa haci esaki. Si tur cos ta bon na comienzo di e otro aña nos ta cuminza cune”, dr. Genser a conclui.

 

- Advertisement -

DUNA COMENTARIO

Please enter your comment!
Please enter your name here