ORANJESTAD (AAN): E Waf di Barcadera ta suficiente grandi pa atende barconan importante cu ta trece comestible semanalmente pa Aruba?
Esey ta algo cu hopi hende ta puntra nan mes e siman aki, ora cu un monton di berdura a bira scars riba Aruba. Varios Fast Food Restaurant a haya nan ta sirbi cuminda sin e.o. lechuga y otro berdura.
Ta trata di berduranan cu semanalmente ta yega Aruba for di Miami.
Y e biaha aki loke a causa e tardanza ta e hecho cu ora e barco a yega Aruba riba Diamars, e no por a drenta mara na Waf di Barcadera. Esey pasobra no tabatin espacio disponible pa e barco di carga.
E barco e ora a keda mara na anker un tiki pazuid di Waf. Pero Diaranzon a pasa y nada. Keto bay mara na anker. E contesta cu nan a ricibi ta cu tin “Congestion” den Waf di Barcadera.
Mirando e delay aki, y como cu e tin di sali bay Curaçao despues, e compania a dicidi pa manda e barco pa Willemstad pa hiba container aya, y despues ta regresa Aruba.
Awe Diabierna madruga el a sali bek for di Willemstad rumbo pa Aruba. Pero ora el a yega Barcadera awemainta, atrobe no tin lugar pa e barco mara. Esey nifica cu e barco a bolbe pone anker na awa, y ta para pazuid di Aruba.
Te cu 4:20 pm di Diabierna atardi, ainda e barco cu tur berdura, demas containernan pa Aruba, ta riba lama sperando di por haya un lugar pa drenta.
Y e chens ta cu si acaso nan pone mara awetardi mes pa anochi, e chens ta grandi cu trahadornan di Waf lo no ta laborando mas y e carga no por wordo baha. Pues Aruba lo por keda cu mas scarcedad di berdura henter weekend aki.
Un suplica ta bay na Ministro pa por fabor tuma nota di e caso urgente aki. Tin un barco yena cu berdura riba lama ta sperando pa drenta Aruba, y ainda nada.
LAST UPDATED: 4:35 PM
