Home Hudicial Corte a duna WEB rason di kita su director

Corte a duna WEB rason di kita su director

290
0
SHARE
- Advertisement -

ORANJESTAD(AAN): — Durante su di tres apariencia dilanti Corte buscando rason den e disputa cu a presenta y cu a conduci na su retiro de inmediato, Oslin Julian (OJ) Boekhoudt a haya di tende e siman aki cu atrobe e no tin rason y cu WEB tabatin motibo pa a kit’e for di trabou.

Asina mes e tres Hueznan den Corte Comun di Husticia di Caribe Hulandes a admiti si cu WEB no a actua elegante y no semper corecto den e proceso. Asina mes, nan ta haya cu e interes di WEB ta pisa mas cu esun di O.J. Boekhoudt y como tal a confirma e decision di Corte den Prome Instancia.

Carera di O.J. Boekhoudt

Oslin J. Boekhoudt ta naci dia 19 di januari 1959 y desde dia 1 di september 2009 tabata den funcion na WEB Aruba NV como Director General. E ta den e funcion di “Statutair Directeur” cu un acuerdo di trabou pa tempo indefini. Su ultimo salario tabata Afl. 22.000,= pa luna bruto. Banda di su salario e tin un “Vakantie Toeslag” di Afl. 25.080,= pa aña y fin di aña ta cobra un “Bonus” di no menos cu Afl. 44.000,= pa aña.

Kico a pasa

E doño di WEB, esta e compania Utilities Aruba NV a haya presion di nan doño, Gobierno di Aruba, cu tabatin critica pisa pa e forma di maneha di O.J. Boekhoudt, su forma di comunica cu e Hunta di Comisarionan, cu Gobierno y cu otro partnernan den e industria. Relaciona cu esaki, a yama un reunion “Buitengewone Algemene Vergadering van Aandeelhouders” di Utilities Aruba NV. Dia 27 di mei 2015 den cual Minister Ing. Mike de Meza tambe tabata presente den representacion di “aandeelhouders” (lesa Gobierno) y na final a conclui cu nan no tin confiansa mas den O.J. Boekhoudt. Consecuentemente Utilities Aruba NV a yama un reunion di “Raad van Commissarissen van Utilities Aruba NV” dia 5 di juni 2015 den cual a instrui e director di Utilities Aruba NV pa comunica cu e Hunta di Comisarionan di WEB y pa instrui nan cu mirando e decision di e doño, Gobierno di Aruba, pa kibra confiansa cu O.J. Boekhoudt, cu ta bira masha dificil pa want’e den su funcion.

Dia 11 di juni a tuma luga un reunion di “Algemene Vergadering van Aandeelhouders van WEB Aruba NV” na oficina di Utilities Aruba N.V. den cual e director O.J. Boekhoudt tambe tabata invita. Ey a informe di e situacion pa cu su posicion, e kehonan riba su maneho, comunicacion malo, falta di comparti informacionnan financiero di e compania, cu consecuencia cu e compania a perde placa na aña 2014, ta conduci cu ta dune retiro mesora. Como cu nan tin un acuerdo di trabou den cual a fiha un termino di 6 luna di aviso ora di retiro (opzeggingstermijn), a informe cu inmediatamente dia 11 di juni 2015 e ta perde su trabou, ta prohibi’e di drenta oficinanan di WEB pero ta sigui pag’e te 31 di december 2015.

O.J. Boekhoudt a protesta contra retiro

Den un caso civil di dia 21 di juni 2016, abogadonan mr. J. Swaen y mr. D. Passchier a defende e ex-Director di WEB Aruba NV y a demanda e compania nacional di produccion di energia pa hala ambos decision aden, tanto su retiro como tambe su prohibicion di entrada. Tambe ta pidi Huez, den caso cu e haya cu su retiro ta bon, pa e obliga WEB pa pag’e un suma di daño y perhuicio. El a pidi Hues pa tene cuenta cu su edad, 56 aña, ora di e disputa laboral, y cu ta dificil pa haya un trabou den e mesun funcion na Aruba. Tambe cu dor di e retiro inmediato, ta strob’e haya un otro trabou na Aruba, door cu nos ta un isla chikito.

Corte den Prome Instancia: Directornan semper ta core mas risico

Den su evaluacion, Huez mr. Y. Vanwersch a tene cuenta cu e funcion di un Director ta pa percura pa e compania haci ganashi. Pa esey e doñonan ta deposita hopi confiansa den dje. Ta pag’e extra y mas cu tur otro, pa e por eherce e funcion delicado aki. Pero, e salario halto y beneficionan ta mara na e realidad cu na cualkier momento, tin ora sin previo aviso y sin un motibo valido, por kibra e confiansa den e Director y como tal ta perde su trabou. Ta cu e realidad aki den mente, Corte den Prome Instancia a dicta cu:

“HET ONTSLAG VAN EEN DIRECTEUR AANZIENLIJK MINDER SNEL DOOR DE RECHTER ALS KENNELIJK ONREDELIJK KAN WORDEN GEKWALIFICEERD DAN HET ONTSLAG VAN EEN GEWONE WERKNEMER. DE REDELIJKHEID VAN EEN AAN DE STATUTAIR DIRECTEUR GEGEVEN ONTSLAG DIENT OM DEZE REDEN MARGINAAL GETOETST TE WORDEN”.

O.J. Boekhoudt no a bay man bashi

Aunke e no a haya un suma di placa paga ora el a bay, Corte den Prome Instancia a tene na cuenta cu el a sigui cobra durante 6 luna largo sin cu e mester a traha na WEB. Corte a tene cuenta cu entre 11 di juni pa 31 di december 2015, O.J. Boekhoudt como Director saliente a cobra un total di Afl. 132.000,= na salario, el a cobra Afl. 25.080,= na Vakantietoeslag y riba dje, prome cu el a bay na december, a cobra su “Bonus” di Afl. 44.000,= pa asina hunto suma un total di Afl. 201.080,= na entrada acomula den e ultimo 6 lunanan cu e tabata na cas. Cu e tabata kier mas cu esey, Corte ta haya cu no ta necesario.

Corte di Apelacion

Dia 22 di juli 2016, OJ Boekhoudt, por medio di su abogadonan Swaen y Passchier a apela e sentencia di Corte di Prome Instancia den “Burgerlijke Zaken”. WEB a conta su e mesun dos abogadonan, esta mr. Dello Gomez y mr. Bryan Coffie di Bufete Go-Bik. E siman aki, dia 19 di december 2017, Corte Comun di Husticia di Caribe Hulandes, den cua tres Hues, esta e Magistradonan mr. S. Carmelia, mr. E. Saleh y mr. H. Fehmers a dicta nan veredicto den sala di Corte na Aruba.

Corte di Apelacion ta pensa otro cu Corte di Prome Instancia

Contrario na e Hues den Corte di Prome Instancia cu a opta pa no “toets” e “redelijkheid” di e retiro de inmediato di e Director di WEB, e tres Huesnan den Corte di Apelacion si ta considera cu e decision di WEB tabata “onredelijk”. Asina mes, nan ta di acuerdo cu e Hues anterior cu como Director, Bo mester ta consciente cu Bo tin un “afbreukrisico” hopi mas halto cu e demas empleadonan di e compania y cu na cualkier momento e doñonan por bisa Bo cu nan no tin confiansa mas den Bo. Ta pesey a regla un salario masha lucrativo, cu ta inclui varios bonus y hasta un “opzeggingstermijn” di 6 luna, cu de facto ta hopi mas cu e averahe di trahadonan cu pa ley ta conta cu cu un termino di solamente 2 luna di salario.

Opinion legal di Abogado mr. Arie Swaen

Siendo un di e abogadonan cu mas aña di experencia y conocemento den e tipo di casonan asina, e ta sinti cu Corte Superior a kiboca su mes den e caso aki. Pasobra ta imposibel pa considera cu e retiro tabata “onredelijk” pero despues toch ta bay di acuerdo cu e sentencia di Corte di Prome Instancia. E ta sinti cu asina cu a confirma cu e decision pa kita e Director di trabou asina sin mas di un dia pa otro, sin dune espacio pa coregi su erornan, sin cu e por a bringa su retiro, cu ora considera esey como “onredelijk”, cu mester a considera mesora pa obliga WEB un miho pago na e ex-Director. No ta esey so, na mas momento den e sentencia, Corte Superior a mustra di no tabatin e mesun opinion cu e prome Hues, pero cu asina mes na final ta confirma e mesun sentencia, locual e ta lamenta masha.

Sentencia Corte Superior

Den e caso den Corte di Prome Instancia a dicta cu OJ Boekhoudt mester a paga e gastonan di abogado di WEB balora na Afl. 2700,=. Den e sentencia di Corte Superior, a ratifica e sentencia di Corte den Prome Instancia y riba dje a condena OJ Boekhoudt pa paga e gastonan di abogado na banda di WEB, balora na Afl. 6000,= y aumentando cu e interes legal cu ta cuminsa core desde dia di e sentencia te dia cu e caba di pag’e.

Ta apela e caso na Corte di Casacion na Hulanda?

Ainda abogado mr. Arie Swaen no por contesta esaki pasobra lo mester sinta cabes frieu pa analisa e decision hunto cu su cliente. Aunke hopi biaha e tipo di casonan asina ta bale la pena, no por kita for di e realidad cu e casonan asina ta tuma hopi tempo y ta hopi mas costoso.

 

- Advertisement -

DUNA COMENTARIO

Please enter your comment!
Please enter your name here