Home Politica Crisis y desafios de los Partidos Politicos (Parti 2)

Crisis y desafios de los Partidos Politicos (Parti 2)

30
0
SHARE
- Advertisement -

Lazo di Cooperacion DIARIO y FOTH

Pa Guillermo Villalobos Solé -Politologo-

Den e prome parti di e analisis aki, mi a haci un recuento di e elementonan principal cu ta caracteriza e crisis actual di e partidonan politico den e mayoria di paisnan.

Mi a expone con e organizacionnan colectivo a bin ta perdiendo relevancia y confianza entre e ciudadanonan, fundamentalmente, door di factornan externo propio di e modelo y cu no ta controlable y door di factornan interno cu ta atribuible, directamente, na decisionnan ekivoca cu e partidonan ta comete den e marco di un mundo cambiante y directamente influencia door di e revolucion tecnologico y e evolucion acelera di e conocemento.

Den e di dos parti aki, mi ta bay presenta e desafionan principal cu e partidonan politico ta enfrenta, particularmente e organizacionnan politico tradicional, pa sigui ta espacionan y instrumentnan legitimo di representacion y agregacion di e interesnan ciudadano.

Den e sentido aki, permiti mi aborda tres consideracion cu por contribui na locual nos a denomina: “Rediseño di e Partidonan Politico”.

Den lo formal: Mi ta kere cu ta necesario un revision profundo di e structuranan formal y statutuario di e partidonan. No ta posible pa sigui pensa den partidonan vertical, poco democratico y caracteriza pa e circulonan cera di poder y mando.

Awe ta wordo rekeri instrumentnan nobo y moderno pa desaroya e democracia interno; ta bira urgente e incorporacion di sectornan nobo cu ta reforza e basenan social di e partidonan; y ta necesario pa nan ta organizacionnan mas flexible, cu structuranan horizontal, acompaña di decisionnan descentraliza den cual ta incorpora mecanismo y instrumentnan mas cla di control.

Den lo organizativo: E partidonan politico ta wordo enfrenta na e desafio di amplia e procesonan di participacion cu ta acompaña pa formanan novedoso di comunicacion permanente (rednan social), cu ta facilita e espacionan di discusion politico.

Adicionalmente, mester wordo duna procesonan mas democratico y participativo di formacion di liderazgonan nobo cu ta permiti crea un autentico ehercicio di agentenan di cambio. Y finalmente, mester aspira na construi structura y espacionan cu ta facilita e participacion di e sectornan social diverso (nobo y tradicional) y tambe di e espacionan teritorial cu ta reclama respet pa su tradicion, custumber y valornan.

Y den di tres ambito di reforma tin lo ideologico y lo pragmatico: Den e punto aki ta necesario pa revisa e obhetivo y contenidonan pa e  planteamentonan di awe y di futuro tin vigencia.

E organizacionnan politico moderno mester ta capaz di compronde e cambionan acelera di e sociedad y plantea, cu capacidad adaptativo, e alternativanan adecua cu mihor ta responde na e desafionan nobo aki mescos cu e aspiracionnan mayoritario di e sociedad.

Den un segundo termino, mester aparece formanan nobo di comprension efectivo di e realidad cotidiano y di e caracteristicanan structural cu nos nacionnan ta biba aden, awendia.

Y pa ultimo, mester hiba padilanti un proceso di modernizacion of redefinicion ideologico cu sa compronde e desafionan di e modernidad, pone den marcha propuestanan efectivo pa e atencion oportuno di e necesidadnan di e ciudadanonan y den ultimo instancia, converti su mes den e motor di desaroyo economico cu atencion social husto y ekitativo.

E tres aspectonan basico aki pa e rediseño di e partidonan politico mester ta cruza di manera transversal door di un ehe di transparencia adicional na un esfuerzo pa devolve e politica un imagen positivo di confianza y credibilidad, cu a perde na un manera hopi peligroso.

Si e partidonan no ta logra haci e cambionan aki den un tempo razonable, ta hopi probable cu di un banda, lo bay ta perdiendo relevancia, si no ta asina cu nan a perde caba, te yega incluso, na su desaparicion; y di otro banda por bay laga espacionan bashi pa e ehercicio di lo publico, cu ta wordo ocupa pa experimentonan neo populista di consecuencianan hopi peligroso pa tur sociedad.

Esaki ta nos articulo di December, den contexto di e Lazo di Cooperacion entre Fundacion Omar Torrijos Herrera di Panama y Matutino DIARIO. Nos ta gradici Lic. Guillermo Villalobos Solé, Politogo y director di FOTH pa su valioso aporte.

- Advertisement -

DUNA COMENTARIO

Please enter your comment!
Please enter your name here