Home Enseñanza Digitalizacion den enseñanza awendia ta fundamental

Digitalizacion den enseñanza awendia ta fundamental

47
0
SHARE
- Advertisement -

Minister sr. Rudy Lampe:

ORANJESTAD (AAN) – Den conferencia di prensa di gobierno, Diahuebs mainta, en conexion cu firmamento di un Acuerdo entre Gobierno y SETAR, pa instala e servicio di wifi den tur scol, Minister di Enseñanza sr. Rudy Lampe a dirigi palabra pa elabora mas tocante e proyecto aki.

E mandatario a expresa cu e dia aki Gabinete Wever-Croes tin otro bon noticia pa comunidad, unda cu e Acuerdo cu a keda firma ayera ta trata di un proyecto importante desaroya cu un di e ultimo fondonan di FDA, cu ta cerando su ciclo y cu ta wordo destina na un proyecto di digitalizacion den enseñanza.

Esaki ta encera cu tur scol: kleuter, basico, MAVO, e dos Scolnan EPB tanto na San Nicolas como na HATO lo haya wifi, su suficiente speed, pa asina aki e por sirbi nos sistema di enseñanza.

E dignatario a indica cu den e Plan Nacional di Enseñanza 2019-2028 un di e palabranan clave ta digitalizacion.

“Nos a drenta e era di digitalizacion y esaki ta bay conta tambe pa nos sistema di enseñanza. Ayera, nos por a duna un di e cuater awardnan pa e mihor maestro di aña y e mihor dirigente di aña den enseñanza, e mihor ‘Achievement Award’ na e maestra cu durante 44 aña ta den servicio y ainda ta sigui sirbi nos sistema di enseñanza. Y tambe nos por a duna un award na un proyecto di digitalizacion”, Minister Lampe a menciona.

E dignatario a sigui splica cu tabata sumamente interesante pa wak con un hoben maestra a bin cu e idea briyante cu na lugar di cumpra e smart board cu ta costa mas cu diez mil dollar, cu diez porciento so di e suma ey lo por haci e mesun proyeccion; cu un dimmer y instrumentonan barata, cu ta haci e mesun trabao. E mandatario a expresa cu solamente e maestra a splica nan cu ora e wifi cay, e muchanan ta bira inkieto pasobra mientras cu tin wifi den e klas y cu e sistema digital den enseñanza ta den klas, e tin tur atencion di e muchanan.

“Nos a haya un presentacion di un les, usando wifi, unda cu e muchanan tabata asina activo y cu bo ta haya tur e colornan riba borchi; ya no ta skirbi cu krijk mas.

Kiermen, ta asina fundamental pa tin wifi cu suficiente velocidad na tur scol. Esey ta e fundeshi pa despues nos por sigui traha riba dje pa tur scol, na dado momento, e lesnan ta wordo duna na un manera interactivo y digital.

E idea ta pa na 2028, despues di e plan di diez aña aki, na scolnan no tin printer books ni machine di fotocopia mas, sino cu tur enseñanza ta bay ta digitaliza. Awe a pone e fundeshi pa yega asina leu”, Minister Rudy Lampe a subraya.

E mandatario a agrega cu e digitalizacion ta hopi mas profundo cu solamente no uza printer mas. Digitalizacion kiermen personalizacion den enseñanza.

“Ayera nos por a wak esey cu muchanan chikito na Noord, y a mi mes como ex-maestro di IPA semper nos a purba di siña tur maestro pa diferencia como e lema nobo di enseñanza. Esey kiermen cu mester diferencia den klas cada un alumno, segun su desaroyo, talento, capacidad y aworaki e instrumento di digitalizacion ta haci cu e ta bira personal. Cada un di e muchanan e ora ey, na un manera personaliza nan ta bira activo den enseñanza, danki na e tecnologia digital den e era digital”, e dignatario a reitera.

- Advertisement -

DUNA COMENTARIO

Please enter your comment!
Please enter your name here