Home Politica Disfruta di Pasco y Aña nobo sin lubida motibo di e celebracion

Disfruta di Pasco y Aña nobo sin lubida motibo di e celebracion

24
0
SHARE
- Advertisement -

Robert Candelaria di AVP:

ORANJESTAD (AAN)–: Nos ta yegando e periodo dushi di fin di aña un biaha mas. E temporada aki nos ta celebra e.o. Pasco y aña nobo. E temporada aki ta uno di celebracion hunto cu sernan keri y tambe di refleho personal. Permiti mi refleha cu bo un momento.

Ora nos celebra Pasco, nos no mester lubida e Motibo di nos celebracion. No ta e cuminda dushi, musica y ambiente, dornamento di cas etc. ta e cos principal. Eseynan ta parti di e celebracion, pero no e Motibo pa e celebracion mes. Pasco ta existi pasobra di Cristo Hesus. E ta “The Reason for the season”.

Pasco ta ora nos ta recorda y celebra cu Hesus a nace y a hiba un bida perfecto pa despues El a muri un morto sacrificial pa nos picanan. Ora nos entrega nos bida na dj’E, aceptando Su sacrificio pa nos y pidiendo pordon pa nos picanan nos ta wordo salba y nos ta ricibi bida eterno. Ban duna honor na Hesus e aña aki y no lubida Ken nos ta celebra e temporada aki.

Un otro cos cu nos ta celebra den e temporada aki ta aña nobo. Nos ta refleha riba e aña cu ta bay caba y mira pa dilanti riba e aña binidero. Un forma cu hopi hende ta celebra esaki ta cu tiramento di klapchi.

Ami a forma parti di e Comision di klapchi algun aña pasa, representando nos Cuerpo Policial. E Comision aki ta consisti di ambtenaarnan di diferente departamento manera DOW, DTI, Douane y KPA. Nos a traha duro hunto pa bini cu proposicion di maneho y control pa asina haci e parti di celebracion cu klapchi mas sigur pa nos comunidad. Mi por wak bek riba un tempo productivo y mi ta mira e frutonan di e trabounan di e Comision cu te dia di awe a sigui cu e bon trabou.

A logra baha e cantidad di container pa aña considerablemente di rond di 30 pa rond di 20 pa aña. Esaki ta nifica cu menos container ta keda warda na Wela cu menos peliger pa accidente y ladronicia. A logra tambe di reglamenta e dunamento di permiso pa haci esaki mas safe y esaki a yuda reduci e cantidad di localidad cu ta bende klapchi di mas o menos 150 na 2002 te na mas o menos 75 aña pasa.

Esaki ta nifica cu a tene cuenta cu hopi aspecto di siguridad manera aumenta e distancia entre e luga di bende klapchi y edificionan rondo di dje. Tambe a baha e intensidad di klapchi pa asina reduci e klapchinan mas potente y peligroso drasticamente. Tur esaki a resulta den reduccion consistente di casonan di herido e ultimo añanan. Pero ainda nos no a yega. Cada caso di accident ta uno di mas cu mester por evita.

Tambe ta importante pa bisa cu e Comision so no por haci Aruba mas safe. Nos tambe mester contribui pa logra esaki. Mi kier pidi tur esunnan cu ta den e negoshi di klapchi pa cumpli 100% cu tur regla y instruccion di Comision di klapchi pa bienestar di salud di nos pueblo. Nos y boso tambe no kier ni un caso di accident e aña aki.

Tambe mi kier pidi esunnan cu ta cumpra klapchi pa sigui instruccion con pa tira esaki. No tuma riesgo pa despues no tin nada pa lamenta. Evita di bebe alcohol excesivo y tira klapchi. No laga menor di edad tuma riesgo y mayornan mester wak bon pa e muchanan. Nan mester di nos guia y supervision.

Ban celebra un fin di aña manera mester ta. Hunto cu famia y amigonan den harmonia. Refleha riba E Motibo y E Persona central di Pasco cu ta Cristo Hesus y celebra e fin di aña aki dushi hunto.

Asina tambe hunto nos ta logra haya un Aruba mas safe y un Aruba mas sigur. Feliz fin di aña y cu Dios bendiciona Aruba ricamente.

- Advertisement -

DUNA COMENTARIO

Please enter your comment!
Please enter your name here