Home Hudicial Dos aña di prison pa homber Hulandes cu a dal homber cu...

Dos aña di prison pa homber Hulandes cu a dal homber cu auto y core bay

1089
0
SHARE
- Advertisement -

El a lastra e victima mas cu 12 meter bao di e auto

ORANJESTAD (AAN): Homber Hulandes biba na Aruba, D.K. riba Diabierna mainta a presenta dilanti Hues pa scucha su sentencia. Hues ta hay’e culpable di intencionalmente a dal e homber R.N. cu auto riba 4 Juni 2017 y despues a core bay. Esaki Hues ta haya cu ta manera e promer acusacion contra D.K. ta bisa esta intento di mata. Hues a condena D.K. na 3 aña di prison di cual 1 aña di prison ta condicional cu un tempo di prueba di 2 aña.

DAL VICTIMA Y CORE BAY:

Na comienso di luna tratamento di e caso aki a tuma lugar, despues cu diferente biaha a pospone e caso pasobra tabata falta di scucha un testigo hopi importante.

E acusacion cu Fiscal a presenta den Corte contra D.K. ta cu riba 4 Juni 2017, el a purba kita bida di e homber R.N. El a dal y pasa riba R.N. cu auto y sigui core bay. Fiscal a sigui bisa cu subsidiario e ta acusa D.K. di a causa herida severo na R.N. Ta asina cu R.N. a sufri fracturanan na man, ribchi y cabez.

VICTIMA A KEDA AFECTA:

E victima R.N. a presenta den Corte y por mira cu ainda e ta afecta di tur e fracturanan cu el a sufri door di e impacto fuerte di e accidente. Hues a puntra R.N. si e ta desea di haci demanda di daño contra D.K.

R.N. a bisa Hues cu actualmente e no por traha cu Citco. El a bisa cu pa resto di su bida el a keda perhudica. Ta asina cu abogado di R.N., mr. Figaroa tabata presente y tur cos ta mustra cu lo bay cuminsa un caso civil contra D.K.

SENTENCIA:

Diabierna mainta Hues a bisa cu e ta haya e prome acusacion proba. Hues ta haya cu for di investigacion haci den e caso aki, no por bisa cu intencionalmente D.K. a dal e victima R.N., pero segun ley si a pone bida di hende na peliger e ta un intento di mata.

Hues a mustra cu e forma con D.K. tabata core cu e auto a crea e riesgo cu e persona por a muri. Hues a bisa cu D.K. cu velocidad halto a reverse y a pasa riba R.N. Hues a remarca cu D.K. a sospecha cu tabata un persona persona asina mes el a sigui core.

Na opinion di Hues, e glas patras getint y poco luz a haci cu D.K. no por a mira bon pero a sinti cu el a pasa ariba algo. Sinembargo D.K. no a para sino a sigui reverse y a lastra e victima mas cu 12 meter. Despues el a primi trot pa core bay siendo cu e victima ainda tabata bou di e auto.

Hues a remarca cu apesar cu D.K. tabata sospecha cu el a pasa riba un hende, e no a para y baha for di auto pa mira si berdad tin hende bou di e auto. E acusado a dicidi di primi trot y core bay caminda a bolbe lastra e victima bou di e auto.

Na opinion di Hues, tur esaki ta haci cu intencionalmente D.K. a core asina y a pone bida di e victima R.N. na peliger. Danki Dios cu e victima no a fayace y te ainda e victima a keda afecta. Hues a bisa cu den contra di D.K. ta e hecho cu el a core bay despues di a pasa riba e victima. Hues a tene na cuenta cu ta promer biaha cu D.K. a cay sera. Tambe Hues a tene cuenta cu sentencianan cu Corte di Husticia ta duna den casonan aki.

Hues a condena D.K. na 3 aña di prison di cual 1 aña ta condicional cu un tempo di prueba di 2 aña. Hues a duna orden pa duna back e auto cu a keda confisca.

E hecho cu Hues no a bisa nada di demanda di daño di parti di e victima, ta mustra cu awor D.K. lo mester bay dilanti Hues atrobe pa un caso civil caminda lo por spera cu mr. Figaroa lo bay demanda daño hopi halto teniendo na cuenta cu e victima a keda perhudica pa resto di su bida y no por traha.

Riba e potretnan por mira e acusado ora el a wordo deteni pa Polis.

- Advertisement -

DUNA COMENTARIO

Please enter your comment!
Please enter your name here