Home Comentario Dos crimen y un historia cu cara di mucha cu no mag...

Dos crimen y un historia cu cara di mucha cu no mag lubida!

36
0
SHARE
- Advertisement -

Pa Mercedes Monge

ORANJESTAD (AAN) — E crimen cometi contra e dos rumannan chikito cu tin nos comunidad bao un tristeza grandi, y hasta sintiendo un impotencia dificil pa describi, ta e historia cu cara di mucha cu, lamentablemente, a sosode na Aruba, y cu nos no mag lubida.

Un hecho cu pa mi no tin palabra mas pa califike, pa mi e agresor ta un burdugo y un mama cu tampoco por exonera di culpa. Ami no ta un hende cu ta huzga otro, pero den e caso aki absolutamente mi no por despensa e atrocidad cu a wordo cometi contra e dos criaturanan inocente.

Den e dianan aki for di momento cu e prome informacionnan a cuminza circula y te awe mes, algun persona cu conoce e famia en cuestion, y cu ta indica cu nan ta conoci como hopi disfuncional, ta menciona aspectonan cu segun mi, ta perceptible na Aruba bao diferente famia, no di awor sino di decadanan caba y no por yama nan di otro manera cu “circulonan vicioso” cu algun famia pa generacionnan ta lanta den dje.

Por ehemplo, un mama cu apenas den su pubertad (13 aña) ta sali na estado pa prome biaha, y dos aña despues a haya su di dos yiu sin cu e tabata prepara ni pa esun prome, y dos aña despues un baby mas, mientras cu, alomenos esey ta parce ta e caso, e no a asumi cu el a adkiri un compromiso y responsabilidad grandi cu su yiunan, y segun indicacion cu tin, tampoco el a wordo guia pa ta un mama prome cu tur cos; cu su yiunan mester prevalece prome cu su compañero di bida.

Banda di esaki tin di e hogarnan aki cu ta conoce acontecimentonan di maltrato domestico un tras di otro. Hogarnan unda, mayoria di biaha tin un homber violento. Segun informacion e padrastro di e criaturanan a yega di ta pashent di PAAZ. Dios pordona mi, pero pa mi esey no ta hustificacion.

Mi ta bao impresion cu e homber aki tabata sinti rabia riba e dos chikitonan aki; danki Dios cu esun di tres, cu ta su mesun yiu, e no a hacie daño. Tristemente el a baha su odio riba e dos criaturanan cu no ta hiba su sanger te caba cu nan bida na un forma asina repudiable.

Mi a scucha na radio y a lesa riba fb con tin hende cu ta tira falta riba e Trahadornan Social di DAS. Mi ta haya hopi pica di esaki y inhusto pasobra e gran mayoria di nan ta traha bon duro, cu poco herment y mas trabao di loke cada un por acapara, pasobra ta berdad cu nan tin falta di personal.

Pero semper ta mihor culpa un instancia cu ta haci su best cu wak nos propio realidad. E tema aki ta hopi amplio y compleho, incluso hopi delicado, pero mester cuminza pa stop cu negacion y admiti cu den nos pais tin hopi, pero hopi, problema di indole social den famianan y cu e solucion no ta den un instancia so, pero tin hopi factor di cual e solucion ta depende.

Y nos como comunidad tambe tin nos responsabilidad pasobra nos muchanan ta e futuro di Aruba y nos tur mester yuda concientiza cada mayor cu mas cu 90% di e situacionnan aki ta cuminza den e propio hogar, unda e prome plataforma pa felicidad of infelicidad di un famia ta sinta.

Mi ta bolbe enfatiza riba e slogan: “Ta tuma un comunidad pa lanta un mucha”. Ohala pueblo uni tambe na e iniciativa di tin un dia nacional di duelo cu un caminata di solidaridad, y cu e historia aki di dos crimen cu tin cara di mucha, ni un di nos lubida hamas! Si nos ta prohibi nos mes di lubida nos, como pueblo, lo bira mas eficiente pa ta parti di e solucion.

 

 

 

 

 

 

 

- Advertisement -

DUNA COMENTARIO

Please enter your comment!
Please enter your name here