Home Gobierno E realidad di Aruba sin cosmetico ni manipulacion

E realidad di Aruba sin cosmetico ni manipulacion

26
0
SHARE
- Advertisement -

Minister di Finanza kier mustra pueblo:

ORANJESTAD (AAN) – Minister di Finanza  Xiomara Ruiz-Maduro a amplia, den conferencia di prensa, tocante e deficit financiero cu Aruba tin, cu ta yega na 195 miyon florin, cu e gobierno nobo a hereda for di gobierno anterior.

E mandatario a indica cu e punto di salida di gobierno ta pa trece e realidad financiero dilanti, y pesey nan a tuma nan tempo den e dos simannan cu a pasa pa asina por a reuni cu e instancianan concerni, pa haya informacion y brinda pueblo di Aruba, kico ta e realidad sin cosmetico y sin manipulacion.

Minister Xiomara Ruiz-Maduro a acentua cu asina nos pais ta para pa loke ta aña 2017. Encuanto aña 2018, e presupuesto no a wordo entrega, manera ley ta stipula pa dia 1 di September 2017.

Na momento di a haci analisis a ripara cu na e momentonan aki caba, e presupuesto di 2018 ta conta cu un buraco cu ta core den 195 miyon florin.

“Banda di esaki mi tin cu remarca cu e gobierno anterior tabata sa cu 2018 tin e buraco aki caba, y banda di dje por wak cu gobierno tabata sa tambe cu nan lo no pasa e presupuesto aki prome cu fin di aña y pesey, e ora ey, a traha un ley apart di locual ta bira e financiamento cu ta bay tin mester”, e mandatario a comenta.

E dignatario a sigui indica cu tin debenan di nos pais, cu na cuminzamento di aña tin cu bay wordo trata. Apart di e presupuesto di 2018 a prepara un ley di financiamento, pa asina Aruba por busca financiamento pa e debenan cu mester wordo paga, y e suma aki ta bay core den 338 miyon florin.

“Pues, esey ta bay den un ley apart cu ta yega Parlamento den e dianan aki, pa asina Aruba por haya e fondonan necesario pa e debenan aki por wordo cubri, sin cu ainda e presupuesto 2018 ta keda pasa den Parlamento”, e mandatario a subraya.

E dignatario a agrega cu aworaki e presupuesto di 2018 mester bay wordo adapta na e carteranan nobo cu aworaki e Gabinete Wever-Croes tin, y banda di dje tambe nos mester bay presenta e situacion real, den cual tin un deficit cu ta core den 195 miyon florin.

“Y ta bon pa remarca cu mirando e ley di Caft na e momentonan aki na 2018 Aruba mester por a conoce un surplus di 25 miyon florin, pero esaki no ta bay ta e caso pasobra si bo tuma e suma y mirando e situacion con e ta hinca den otro, e buraco pa 2018 ya caba nos por premira cu lo ta mas grandi” e dignatario a subraya.

Den cuadro di esaki Minister Ruiz-Maduro a duna informacion adicional pa asina pueblo tambe por ta conciente, y tur esnan cu a percura pa e situacion di nos pais yega asina preta, compronde tambe kico nan mal maneho a haci cu e pais aki y ki consecuencia esaki ta bay tin pa nos pais aki poco tempo.

El a agrega cu door di e situacion cu Aruba ta aworaki, nos pais ta bay core e riesgo di wordo degrada cu e posibilidad di haya fianza pero na interes mucho mas halto.

“Na e momentonan aki nos ta paga caba mas di 210 miyon na locual ta gastonan di interes, na momento cu mester bay busca mas financiamento sigur pa e 338 miyon florin, ta mas cu claro cu nos ta haya gastonan extra, pero si riba dje tambe bo situacion financiero ta bay ta critico, manera cu e ta na e momentonan aki, claramente bo ta haya fianza na interes hopi mas halto cu ta trece bo den mas problema”, e mandatario a subraya.

- Advertisement -

DUNA COMENTARIO

Please enter your comment!
Please enter your name here