Home Gobierno Edgar Vrolijk ta garantiza cu nan si lo haci pregunta skerpi na...

Edgar Vrolijk ta garantiza cu nan si lo haci pregunta skerpi na Gobierno

23
0
SHARE
- Advertisement -

Fraccion di MEP lo kibra cu stempel Parliament:

ORANJESTAD (AAN) – Parlamentario sr. Edgar Vrolijk den conferencia di prensa di fraccion di MEP, a crea impresion cu nan lo haci preguntanan skerpi na gobierno, durante tratamento di presupuesto supletorio sea awe of mañan. Kiermen, nan lo kibra cu stempel Parliament.

Parlamentario Vrolijk a expresa cu hopi biaha un presupuesto ta wordo calcula cuanto placa ta bay drenta, pero no por haci esaki di forma desproporcional y menos ora cu Raad van Advies a bati na porta y a avisa gobierno pa tene cuenta cu e riesgo cu e entrada di Citgo por representa, pasobra ya nan tin un aña di atraso y cu nan lo no haal esaki den e ultimo cuartal.

Hopi biaha presupuesto ta wordo aproba pasobra tin mayoria den Parlamento, y hopi biaha esnan cu ta sostene gobierno mes, no ta haci pregunta relevante.

Coalicion si a haci pregunta relevante pero nan no a tene cuenta cune pasobra tabata tin un stempel parliament. Fraccion di MEP si lo haci pregunta pasobra nan ta critico y lo puntra con e minister actual lo yega na un presupuesto balansa, sostenible y duradero pa e añanan nos dilanti, pasobra pueblo merece esey tambe.

Tambe lo puntra gobierno tocante su maneho y si nan ta bay bin cu medida of cu otro maneho pa baha gasto. Gobierno anterior tabata tin un lista di 26 medida entre nan un ABB. Lo puntra gobierno di MEP si nan ta bay bin cu esaki of cu otro tipo di medida, ya cu nan ta papia di transparencia pa pueblo y pueblo kier sa. Door di Parlamento pueblo mester sa si e coalicion MEP, POR y RED lo dirigi su mes na bin cu medida, of lo bin cu otro espacio financiero pa por mehora.

El a subraya cu den campaña a scucha hopi cos, pero nan kier scucha con e maneho ta pa e proximo cuater añanan, Vrolijk a reitera.

Tocante costonan di personal, esaki a aumenta cu 15 miyon florin, pero a corta den e adernan principal di e fundeshi di nos pais cu ta e tereno social, educacion, mientras cu ex prome minister a haya casi tres miyon di aumento den su presupuesto.

Esaki ta algo cu tambe e fraccion lo cuestiona pasobra e no por keda keto mas, segun Parlamentario Edgar Vrolijk. El a indica tambe cu hopi contrato cu a cera e tempo ey no ta factible y no ta na beneficio di nos  pueblo, y den un futuro cercano lo mester ancra leynan den e reglamento di orden di ministernan cu mas transaccion no ta wordo pasa prome of despues cu eleccion, pasobra si no lo bolbe haya e caos politico aki, cu a bin di generacion pa generacion, pero mester stop e awor.

Pa yega na un presupuesto real y cu contenido, mester bin cambionan cu ta bin for di Parlamento, cu mester ta critico. Aunque hopi cos ta bin for di e gobierno saliente, tog mester sa con gobierno su maneho ta den su continuacion nos dilanti, e Parlamentario a subraya.

 

 

 

- Advertisement -

DUNA COMENTARIO

Please enter your comment!
Please enter your name here