Home Politica Edgard Vrolijk di MEP mustrando cu meta ta pa yega un finansa...

Edgard Vrolijk di MEP mustrando cu meta ta pa yega un finansa publico duradero y sostenible

17
0
SHARE
- Advertisement -

ORANJESTAD (AAN): Segun Edgard Vrolijk di MEP, ora cu pueblo di Aruba ta prepara pa celebracion di  Pasco y sigur pa un Aña nobo, pueblo ta ser confronta cu e tristo realidad cu presupuesto 2017 conoce un deficit financiero di 130 miyon Florin. Segun normanan di LAFT nos presupuesto 2017 por tabatin solamente un deficit financiero di alrededor 25 miyon Florin (-0,5% di nos GDP).

Esaki nifica automaticamente, den bista cu falta algun dia pa ciere di 2017, cu Parlamento mester a asumi responsabilidad di otro, p’asina  aproba un presupuesto supletorio y alavez duna e Minister di Finanzas señora Xiomara Ruiz -Maduro e apoderacion pa por bay busca un fianza pa cubri e deficit di 130 miyon forin.

Pero tambe en bista cu e presupuesto 2018 no a ser entrega nunca door di Gabinete Eman 2, a duna e Minister  tambe un apoderacion pa por busca fianza cu ta core den careda di 338 miyon Florin pa por cubri debenan cu ta vence y otronan cu tin di ser paga den 2018.

Iresponsabilidad den gobernacion

Encuanto presupuesto 2017 diferente instancia independiente manera Raad van Advies, CAft a bisa e gobierno anterior esta Gabinete Mike Eman 2, cu  lo ta hopi riscante pa pone como entrada e 73 miyon cu lo tin di haya conforme e acuerdo cu Citgo y alavez e proyeccion di belasting di 50 miyon (30 miyon Loonbelasting y 20 miyon di BBO di e acuerdo di Citgo) den bista cu e proyecto ta core casi 2 aña di retraso.

Y sigur  rapport di CAft di e di tres  kwartaal, un biaha mas ta bisa cu e no ta mira cu lo logra e cifranan cu a ser presupuesta y ta urgi gobierno pa tuma su responsabilidad.  Pero na un manera iresponsabel a ignora e consehonan aki y sigur a uza placa cu no ta disponibel y a entrega un presupuesto supletorio budget neutral, mientras awo ta pueblo tin di carga un biaha mas cu e iresponsabilidad den gobernacion unda tin di bay fia 130 miyon Florin pa por cubri gastonan iresponsablemente presupuesta.

Presupuesto realistico:

Ora lesa e presupuesto supletorio por ehempel por a ripara cu ta aña di eleccion unda cu compara cu presupuesto 2016 gastonan di personal a aumenta cu casi 15 miyon Florin extra. Otro ehempel di malgastamento di placa ta e apertura di e brug di Green Corridor unda cu ex Minister Presidente di Aruba, sr. Mike Eman a probecha pa haci su fiesta di cumpleaños riba custia di e pueblo trahado, cu a costa nos 141.811,20 Florin. Placa cu sigur por a haya mihor uzo den educacion, deporte of den partinan social.

Pa termina sigur pa locual ta presupuesto 2018, nos trabao como parlamentario ta exigi di gobierno pa entrega un presupuesto mas realistico posibel, y sigur pa tene na  cuenta cu consehonan di instancianan y  p’asina nos por yega na un finansa duradero y sostenibel cu tanto pueblo ta anhela.

- Advertisement -

DUNA COMENTARIO

Please enter your comment!
Please enter your name here