Home Hudicial Entre 1 aña y mey y 4 aña di prison pa trio...

Entre 1 aña y mey y 4 aña di prison pa trio envolvi den droga

191
0
SHARE
- Advertisement -

A confisca mas cu 10 kilo di cocaina y mas cu 28 kilo di marihuana

ORANJESTAD (AAN) – Ayera mainta e homber L.F.E., e muher M.E.R. y e homber E.T. a presenta dilanti Hues pa scucha nan castigo. Hues a haya tur tres culpable di ta envolvi den bendemento di droga.

Hues a bisa cu e ta haya legalmente proba cu L.F.E. entre December 2016 – Maart 2017 tabata bende y entrega cocaine. Hues a mustra cu e tabatin cantidad grandi di cocaine y marihuana den su poder riba 7 Maart 2017. A confisca mas di 10 kilo di cocaina y mas cu 28 kilo di marihuana. Pa loke ta E.T., Hues ta haya cu entre April 2014 – April 2017 e tabata bende cocaine y marihuana. E muher M.E.R., Hues ta haya legalmente proba cu entre December 2016 – Maart 2017, e tabata den posecion di cocaine y marihuana.

BENDEMENTO DI DROGA

Tres siman pasa tratamento di e caso a tuma lugar caminda Hues a puntra L.E. si ta berdad cu el a actua den droga durante e periodo. L.E. a desmenti cu el a transporta cocaine. El a bisa cu den e periodo ey e tabatin un patron cu e tabata traha p’e y a bende p’e. Segun L.E. e tabata haci esey pa asina e por a haya placa pa bay bek Colombia. Hues a bisa cu E.T. a bisa cu e tabata cumpra for di L.E. y e tabata sigui bende cu otronan. El a bisa cu el a bende E.T. cocaine y marihuana. Hues a bisa cu den razia na e dos cas cu tabata gehuur pa L.E., a haya cantidadnan grandi di droga.

Segun L.E. e cocaine y marihuana no tabata di dje sino di un tal D., pa kende e tabata warda e droga. E palabracion tabata cu despues di e temporada di carnaval, D. lo a busca e droga. Segun L.E. ta pa D. e tabata traha. Segun L.E. na Decem. 2016 el a haya e marihuana y Jan. 2017 el a haya e cocaine. El a splica cu e tabata haya e droga na cas di e muher M.R., despues cu D. duna instruccion. M.R. tabata busca L.E. pa e bay busca e droga na cas di M.R. y hiba na e cas na Madiki.

Na e otro cas, ta D. mes a hiba e droga pa L.E. por bende na un cas den Dakota. El a bisa cu e tabata hiba droga pa hende banda di un supermercado den Dakota pasobra hende no tabata kier a bay na e cas pa cumpra.

Muher M.R. acusa di bende, entrega y transporta cocaine y marihuana. El a bisa cu e tabata envolvi pero el a wordo menaza pa su ex amigo D. pa tuma e droganan na su cas. E no tabata sa cu e pakinan tabata droga. El a wordo bisa cu e tabatin cu tuma e carga. El a bisa cu e no tabata transporta ni bende. El a bisa cu hendenan tabata bin busca e pakinan. Segun M.R., tres biaha hendenan a hiba e pakinan na su cas. E tabata sospecha cu ta droga pero no a habri e pakinan y no sa kico tatatin den nan.

CASTIGO

Ayera mainta, despues cu Hues a bisa cu e trio ta culpable, el a bisa cu pa cu castigo, e ta tene cuenta cu droga ta malo pa salud di hende y tin consecuencia pa comunidad. Hues a mustra cu droga ta fomenta criminalidad. E ta haya cu e trio aki a contribui den circuito internacional di droga. A haci esaki cu e fin di haya beneficio financiero.

Hues a condena L.F.E. na 4 aña di prison, kitando e tempo cu e ta sera den KIA. Hues a condena E.T. na 24 luna di prison di cual 6 luna ta condicional cu un tempo di prueba di 2 aña. E muher M.E.R., Hues a condena na 30 luna di prison di cual 6 luna ta condicional cu un tempo di prueba di 2 aña. Hues tambe a duna orden pa destrui e droganan confisca.

 

- Advertisement -

DUNA COMENTARIO

Please enter your comment!
Please enter your name here