Home Hudicial Entre 18 luna y 5 aña di prison pa grupo cu a...

Entre 18 luna y 5 aña di prison pa grupo cu a haci asalto arma na Kevin Jewelry

374
0
SHARE
- Advertisement -

Un sospechoso a worde declara liber

ORANJESTAD (AAN): Diamars merdia sentencia a cay pa e grupo D.A., M.P., L.R.S., A.C.P., A.V.Z., cu a haci asalto arma riba dia 22 di Mei 2017, caminda a bay cu un gran cantidad di prendanan.

Ta asina cu Hues no a haya M.P. culpable di e acusacion di a yuda planea e asalto arma y a declar’e liber. E otro sospechoso D.A., kende tambe ta worde considera cu a planea tur cos, no a worde haya culpable pa esey pero si pa a core e auto y hiba e asaltantenan.

Polis a bay na Kevin Jewelry den Havenstraat, caminda a sosode un asalto arma caminda tres asaltante a menaza esnan den e joyeria cu arma y bay cu un cantidad di prendanan.

EXIGENCIA DI FISCAL:

Tratamento di e caso a tuma lugar 28 di November 2017, caminda Fiscal a bisa cu D.A. a tira riba un tal Frias y a haya huls di bala. E ta haya cu mester declara D.A. liber pasobra ta solamente Frias su declaracion tin y no tin pruebanan di sosten. Tambe Fiscal a bisa cu no tin suficiente prueba cu D.A. lo ta envolvi den prepara e asalto arma y ta pidi pa declar’e liber pa esey tambe.

Fiscal a sigui bisa cu tur tres Venezolano a admiti di a haci asalto arma.

Camera di seguridad ta mustra nan y agentenan di Polis a reconoce nan. E sospechoso D.A. ta worde acusa como complice. Fiscal ta considera cu el a transporta e asaltantenan y a facilita e armanan. Durante e asalto e tabata pasa dilanti di e joyeria. Un di e sospechosonan a bisa cu e auto ta parce esun den cual nan a huy for di e joyeria. Fiscal no ta kere cu lo tabatin un auto mesun cos. D.A. a facilita M.P. placa via di un dama pa asina huur un auto cu ta usa pa huy.

L.R.S. y A.C.P. tabatin arma. Arestatie Team a drenta cas y L.R.S. a purba coy e granada di man. A.C.P. a para keto y a bisa cu e arma ta di dje pero no e granada di man.

Demanda di e victima dama R. a exigi 15 mil Florin di daño inmaterial. Fiscal ta haya esaki halto. E ta haya 1500 Florin na su lugar.

Fiscal a exigi 4 aña pa A.V.Z., 2 aña pa M.P. y 6 aña pa A.C.P. y L.R.S., kendenan tabatin arma. Fiscal a bisa cu D.A. tabata traha den forma pa no susha su mannan. El a exigi 7 aña.

SENTENCIA:

Diamars merdia Hues a cuminsa cu e sospechosonan D.A. y M.P. El a bisa cu D.A. tin un cantidad di acusacionnan. Fiscal a pidi pa declar’e liber di 4 acusacion, esta e asalto arma na oficina di Gobierno na Savaneta, riba 3 Januari 2017 intento mata, 3 Januari 2017 posecion di arma, prepara asalto arma no proba. Hues a bisa cu ni D.A. y tampoco M.P. ta culpable di a prepara e asalto arma y ta declara nan liber pa esaki.

Hues a mustra cu e hecho cu D.A. a duna M.P. 600 Florin pa huur e auto, a base di ley esey no ta prueba cu lo tabatin preparacion di asalto arma.

Sinembargo Hues ta haya proba asalto arma riba 22 Mei 2017 y cu D.A. tabata stuur e auto den cual e asaltantenan a bay na e joyeria.

Pa loke ta D.A., Hues a bisa cu e auto lo keda confisca. D.A. a worde condena na 18 luna di prison mientras cu M.P. ta worde declara liber.

Despues e grupo L.R.S., A.C.P., A.V.Z. a presenta dilanti Hues, caminda Hues a bisa cu e ta haya legalmente proba e asalto arma na Kevin Jewelry y posecion di arma di candela.

Hues a mustra cu pa A.V.Z., Fiscal a pidi pa declara liber pa un di e acusacionnan esta preparacion. Hues no ta haya proba cu L.R.S. y A.C.P. ta envolvi den preparacion di e asalto tampoco. Ta papia di busca un auto pero no a busca un auto.

Hues ta haya proba posecion di arma y un granada di man. El a tene cuenta cu haci asalto arma pa haya placa. A tacha imagen di Aruba como destinacion sigur. E hecho aki a sacudi henter comunidad y a duna sentido di inseguridad. Pa loke ta e demanda di daño di e victima pa 15 mil Florin, Hues a reduci esaki na 1500 Florin y a fiha e medida cu si no paga lo mester bay 15 dia sera.

E prendanan confisca cerca A.V.Z. mester debolbe na joyeria. Hues a condena A.V.Z. na 4 aña di prison y L.R.S. y A.C.P., kendenan tabata esnan cu arma, na 5 aña di prison.

 

- Advertisement -

DUNA COMENTARIO

Please enter your comment!
Please enter your name here