Home Hudicial Eugene Frans a muri un luna prome caba

Eugene Frans a muri un luna prome caba

455
0
SHARE
- Advertisement -

Padrastro:

ORANJESTAD(AAN): E caso tristo di fayecimento di Rishandroh Anastacia (5) y Roshandrick “Eugene” Frans (3) tin como sospechoso principal e Padrastro Gabriel “Gaby” Martiens. Nos a entrevist’e den forma exclusivo siman pasa, unda el a conta riba e caso y con e yiunan a fayece.

Su defensa ta den man di abogado mr. Drs. Ben Heinze. E investigacion sinembargo no ta cla ainda y keto bay ta interogand’e riba e caso lamentabel aki.

Gaby Martiens a cuminsa e entrevista admitiendo su culpabilidad. El a conta cu e prome caso tabata di e mucha Eugene Frans di 3 aña. Manera dia di awe e ta corda e fecha, tabata un diabierna 27 di october 2017, ora el a sali for di trabou. El a yega cas y a haya e dos muchanan hungando cu azeta y hariña, sushando henter e cas. El a rabia y sota a cay. E yiu chikito, el a mande bay baña pasobra e tabata tur sushi na hariña. Pero e yiu no kier a baña, pa cual den baño el a bolbe haya sla y den e proceso ey e mucha a cay y a dal su cabes na e rand di e potchi di WC.

Consecuentemente, e Padrastro a conta cu e mucha a cuminsa bati y a bay flauw. “Ma spanta”, asina el a conta den e entrevista. “Ma sacudi’e y segun mi e tabata biniendo bij bek, pasobra su wowonan a medio habri”, el a sigui splica. El a carga e yiu y pone drumi riba cama. El a pensa cu mañan mainta e lo ta miho. Sinembargo, mainta ora a bay den camber, a topa cu e criatura frieu, stijf y sin bida.

E mama a bira histerico den cas, pa cual el a menasa e mama y den e proceso sla a cay tambe. Den nan desesperacion, el a bisa e mama cu e lo “Take care” di dje pero e mester cera su boca. El a hinca e curpa sin bida di Eugene den bahul di su auto y a core bay Warda di San Nicolas cu intencion pa bay entrega e curpa y splica nan locual a sosode. Pero e no tabatin e curashi pa baha di auto. El a start su auto y dal un rond di e drive thru di Burger King, a keda core tras di Warda di Polis, banda di Brandweer, pensando kico pa haci y kico pa bisa Polis.

Ta eynan el a haya un idea pa miho dera e criatura y huy bay biba na Hulanda unda e lo a entrega su mes. Cu e plan ey den mente el a bolbe  cas, bay coy su hermentnan y anochi lat el a bay na un mondi na Savaneta y a dera e cadaver, cu entretanto a core mas di un dia den bahul di su auto.

Na yoramento el a skirbi un carta di despensa, el a brasa e cadaver, a pidi’e despensa y a der’e hunto cu su carta di disculpa. Na cas e no por a drumi, su consenshi tabata remorde y asina mes a bay traha. El a pensa di traha te fin di aña, spar poco cen, pa bay biba na Hulanda.

Pa e demas famia, desde 27 di october, ki ora nan yama puntra pa Eugene, tabata bisa nan cu e ta cerca un tanta “pabou”. Esey a keda e excuus pa por lo menos un luna, mientras cu e mucha tabata dera caba. El a keda menasa e mama pa no bisa ningun hende nada di e asunto aki.

Cu e stress ey den mente, casi un luna despues, dia 22 di november, el a yega cas y a topa cu e realidad fastioso cu Rishandroh, e ruman di 5 aña, a kibra e television flatscreen na cas. E acto aki no a bay sin coreccion, pa cual el a conta cu el a rabia hopi y a dal e yiu. E no a specifica con el a matrat’e pero e ta realisa si cu, mescos cu a sosode cu e otro yiu (Eugene), cu esaki tambe a bay flauw.

 

- Advertisement -

DUNA COMENTARIO

Please enter your comment!
Please enter your name here