Home Social Ex Prome Ministernan Eman y Emily de Jongh-Elhage ta bay lanta un...

Ex Prome Ministernan Eman y Emily de Jongh-Elhage ta bay lanta un fundacion di ayudo comunitario

280
0
SHARE
- Advertisement -

ORANJESTAD   (AAN): Den cas di difunto mama di ex Prome Minister Mike Eman tabatin un encuentro entre Mike Eman y ex Prome Minister di Antias, Emily de Jongh-Elhage, cu ta na Aruba algun dia caba y a tene reunionnan cu e ex mandatario di Aruba. Hunto nan a tuma e iniciativa pa lanta un fundacion di convivencia unda por yuda otro cu tin necesidad di ayudo comunitario.

Mike Eman, masha stima pa e comunidad di Aruba, a bisa cu p’e ta un honor di ta hunto cu Emily de Jongh-Elhage den cas di mama Blanche unda a comparti bunita recuerdonan, tanto politico como den seno familiar, unda historia a wordo skirbi, pero mas cu tur, un cas cu tabata un regalo di pueblo. Despues di fayecimento di Shon A, pueblo di Aruba a bin hunto pa recauda placa y regala famia Eman a cas ey. “Henter e convivencia  ey di pueblo semper a inspira mi  pa kere cu un comunidad por ta hopi central con nos por lanta hobennan den nos barionan”, Eman a splica.

“Den e cas special aki ta pa mi un honor di ricibi Señora de Jongh-Elhage cu kende mi tin un amistad di basta tempo. Awe nos a combersa riba tareanan cu nos como ex Prome Ministernan por haci. Nos no ta sirbiendo mas, pero cu tin e gana di haci esey y den un otro forma”, Eman a splica. Cu esaki Eman no kier men sirbi den Gobierno of den politica, pero pa traha mas estrecho den comunidad. El a repasa ideanan hunto cu sra. Emily pa yega na un iniciativa cu simultaneamente na Aruba y Corsou ta wordo tuma.

“Nos ta bay lanta un fundacion cu ta bay yama  ‘Convivencia Comunitario.’  E fundacion aki ta bay tin como meta promove tur loke ta yuda haci un comunidad mas fuerte. Unda bisiña tin aprecio pa otro, unda tin solidaridad y amor prohimo ta hunga un rol grandi. Unda muchanan cu no ta bay bon na scol ta haya un ayudo y asina por sigui.  Nos tur a experiencia esaki den e comunidad cu nos a lanta den y esey a haci un diferencia grandi den nos bida.” Eman a señala cu tanto e como sra. de Jong-Elhage a carga responsabilidad di henter un Gobierno.

“Nos ta realisa cu gobierno por haci hopi y nos a haci hopi, pero tin hopi cos cu prome gobierno yega pa atende cierto caso, ta tuma hooi tempo. Pero si e bario tin un bon fundeshi, e ta fuerte y uni, hopi cosnan malo por wordo evita y hopi cos bon por wordo haci. E idea ta pa aki na Aruba nos lanta un fundacion asina y sra. Emily ta tuma e iniciativa pa lanta uno na Corsou.”

Sra. Emily de Jongh-Elhage a bisa cu no ta ningun sorpresa cu su ex colega Mike Eman ta bin cu un iniciativa asina. Un iniciativa pa sigui sirbi.

“Ora bo ta den Gobierno bo kier haci tur cos, pero bo no por haci tur cos. Mi ta yama danki na Todopoderoso pa locual nos a logra y nos ta sigui duna un man, pasobra bo no por ta feliz si rond di bo otronan no ta feliz. Mi ta masha contento cu e iniciativa. Ya mi ta haciendo cierto cosnan social den comunidad, pero si mi mester lanta un fundacion pa amplia e trabounan aki, mi ta haci’e cu mucho gusto. Mi tin tur tempo. Asina cu mi amigo Mike a conta mi di e idea aki, mi a bisa mesora si y ban wak con nos ta hinca esaki den otro, pasobra comunidad mester di nos. Gobiernonan mester goberna y ciudadanonan mester saca un man pa yuda nan prohimo. Nos ta bay sigui traha riba e fundacion aki. Nos ta cuminsa na Aruba y Corsou y ohala pronto nos tin Reino completo cu nos por yuda pa medio di e fundacion cu nos ta lantando”.

 

 

 

- Advertisement -

DUNA COMENTARIO

Please enter your comment!
Please enter your name here