Home Hudicial Exigi 18 aña di prison pa dos homber cu a mata hende...

Exigi 18 aña di prison pa dos homber cu a mata hende den Rancho

1152
0
SHARE
— Potret di archivo di e lugar di asesinato.
- Advertisement -

ORANJESTAD (AAN): Manera DIARIO a publica, Diabierna mainta te den oranan di merdia, Corte den Promer Instancia a trata e caso penal contra e hombernan G.E. di Aruba y e Venezolano N.J., kendenan ta worde sospecha di riba 24 April 2016 a tira mata den Rancho un homber Colombiano “El Capitan”. Aunke cu tur dos sospechoso ta nenga, Fiscal ta haya legalmente proba y a exigi 18 aña di prison pa tur dos.

Dia 15 September 2017, e caso a bin dilanti pro forma caminda solamente G.E. tabata sospechoso. Fiscal a bisa cu investigacion ta cla, a scucha testigonan na Hues Comisario. A haya un arma den un caha fuerte den un cas di Venezolano. A manda e arma Instituto Forense Hulanda pasobra a haya sanger. Awor tin dos sospechoso y tambe a bin cu testigonan.

   TESTIGONAN:

Diabierna mainta a cuminsa cu scuchamento di dos testigo. E promer testigo ta di parti di Fiscal cu ta e homber S. adicto conoci pero awor ta rehabilitando. El a cambia completo. Por mira claramente un diferencia den aparencia. S. a splica cu e tabata hunto cu e victima caminda dos persona a bay cumpra 10 gram di cocaine. Na dado momento a bin discusion pasobra nan no a paga e victima. E ora ey a saca pistol y a bisa bay plat.

Segun S. e no sa kende nan ta. El a bisa tambe cu durante interogacion di Recherche un miembro di Recherche tabata blo dibuha ronchi riba un cara di e potretnan y a bis’e no worry cu e cabey sino e cara. El a bisa cu un di nan ta Venezolano cu cabey un poco cora. Tambe el a bisa cu un Recherche a bis’e pa sconde ora cu e Van di KIA a yega warda di Polis pa trece sospechoso. Hues a mustra cu segun Recherche, S. a duna un declaracion hopi detaya y ora e tabata saliendo for di warda di Polis, el a reconoce un di e sospechosonan como esun cu a tira.

Despues a scucha e testigo P. kende a worde yama door di abogado mr. Mohamed. P. a desmenti categoricamente cu el a bisa cu G.E. a bis’e cu su yiu a tira e Colombiano. P. a bisa Hues cu el a papia cu e miembro di Recherche pero nada di cu G.E. a bis’e algo.

   ASESINATO:

Hues a bisa cu G.E. ta para riba cu e no tin nada di haci cu e caso. Hues a bisa cu N.J. ta bisa cu ta G.E. y un otro a tira e Colombiano. N.J. a bisa Hues cu e no a bisa cu ta G.E. a tira hunto cu un Venezolano El Cocho. Hues a mustra cu segun raport di autopsia, e victima a worde tira den cabez y a sangra muri.

Investigacion a mustra cu a tira e victima cu un 9 mm. Relaciona cu un caso di asalto arma a haya algun arma den un caha fuerte. Un pistol a worde manda NFI Hulanda y a haya DNA di G.E. E pistol aki ta 9 mm cu a tira mata e persona. Hues a bisa cu tambe a haya un otro DNA pero no a haya sa kende e persona ta.

Hues a bisa cu e testigo S. a declara cu ta un Venezolano cu un rabo na cabey y tattoo y e otro un Arubiano a presenta y a tira e Colombiano mata. Tambe Hues Comisario a scucha e miembronan di Recherche cu a interoga S. y P. kendenan a bisa cu ta e testigonan a papia y cu no ta asina cu nan a formula nan declaracion. Hues a sigui bisa cu N.J. a declara na Recherche cu e tabata sera den cel y a haya sa di G.E. cu G.E. hunto cu El Cocho a haci e asalto arma den Rancho y a mata e Colombiano.

N.J. a bisa Hues cu e no a declara asina. El a bisa cu el a papia cu G.E. tocante asalto pero nada di asesinato. Ta asina cu G.E. actualmente ta sintando castigo pa posecion di arma mientras cu N.J. ta sintando castigo pa dos caso di asalto arma.

Hues a bisa cu N.J. a bisa Recherche cu El Cocho ta un persona hopi peligroso. Hues a puntra N.J. cu por ta pesey N.J. tin miedo. N.J. a bisa Hues cu e no tin miedo di ningun hende.

N.J. ta para riba cu e Recherche a pone cos robez. El a bisa cu nan a pone un declaracion cu no ta loke el a bisa. Segun N.J., ningun momento el a bisa Ranchostraat. El a bisa Hues cu ora Recherche a puntra si e sa di un tiramento y el a bisa cu el a tende cu El Cocho a tira durante un asalto na Noord y no Rancho. N.J. a bisa cu e ta sorprendi di ta como sospechoso pasobra e no sa di nada. Hues a bisa cu e testigo S. a reconoce N.J. como sospechoso di e asesinato na Rancho.

Fiscal a puntra G.E. con por ta cu su DNA ta riba un arma cu ta sospecha di a worde usa pa mata hende. Segun G.E. e ta topa hopi extranhero y nan ta ofrece arma pa bende. E ta tene e arma den man y debolbe.

Fiscal a bisa cu tin un potret di un persona cu tin un arma den su man y e tattoo di e persona ta parce esun di G.E. G.E. a mira e potretnan y a bisa cu ta e.

Abogado mr. Mohamed a puntra G.E. si ora di aire liber si e por topa N.J. Segun G.E. e no por a topa N.J. E otro sospechoso N.J. ta bisa cu nan tabata tuma aire liber y cu el a topa cu G.E.

    DOS RECIDIVISTA:

Fiscal a musta cu no mucho tempo pasa G.E. a worde condena pa posecion di arma. Esey tabata 6 November 2017 caminda el a haya 18 luna di prison di castigo.

N.J. e aña aki a worde condena na 7 aña di prison pa dos asalto arma

    POSECION DI ARMA DI CANDELA:

Ta asina cu G.E. tambe ta worde acusa cu entre 1 December 2016 y Januari 2017, e tabata den posecion di cantidad di arma di candela. Hues a bisa cu ora a detene G.E. a haya un cellular cu un cantidad grandi di potret di armanan di candela. Entre nan e potret di dje cu un arma den su man. Fiscal a bisa cu ademas di e potretnan, tin mensahenan whatsapp cu un tal M. tocante si por haya bala pa un arma y un potret di e arma. Tambe Fiscal a mustra riba otro combersacion riba arma. Segun G.E., e sa fia hende su cel y por ta nan a manda mensahe. Fiscal a remarca cu tin diferente potret caminda ta mira G.E. su man cu un arma. Segun G.E. por bien ta pero e armanan no ta di dje.

   EXIGENCIA FISCAL:

Fiscal a bisa cu e ta haya legalmente proba cu tanto G.E. como N.J. ta envolvi den e asesinato di e Colombiano “El Capitan” den Rancho. Fiscal ta haya cu e declaracion di e testigo S. y e resultado di investigacion riba e arma na Hulanda ta mustra cu G.E. tabatin e arma den su man y e arma ey ta esun cu a tira mata e victima. E testigo S. ta describi cu ta N.J. tabata hunto cu G.E. Fiscal ta haya ambos culpable pa asesinato. El a exigi 18 aña di prison pa ambos. Hues a bisa cu e ta bay studia e caso y otro aña lo por spera sentencia.

 

- Advertisement -

DUNA COMENTARIO

Please enter your comment!
Please enter your name here