Home Gobierno Gobierno trahando pa re-funda y reconstrui e Aruba ideal cu nos bieunan...

Gobierno trahando pa re-funda y reconstrui e Aruba ideal cu nos bieunan a traha pa nos

170
0
SHARE
- Advertisement -

Segun Minister Glenbert Croes:

ORANJESTAD (AAN) – Minister di e carteranan Asuntonan Social y Labor, den entrevista cu Matutino DIARIO a bolbe indica, cu gobierno ta trahando riba un sincronizacion di Departamentonan manera DAS, OM, KPA, Buro Sostene Mi, etc.

E mandatario a referi na e tema di problemanan social cu tin pueblo di Aruba preocupa, y tambe e gabinete nobo.

Minister Croes a indica cu den pasado e instancianan concerni kier a haci poco pero no a logra pa falta di recursonan ademas cu no tabata tin e compromiso pa combati e problemanan social aki, cu no ta di awor pero ta andando for di hopi aña caba.

E dignatario a enfatiza cu e gabinete aki si ta comprometi pasobra nos ta den un cruzada cu si no haci algo awor, nos ta bay perde e Aruba cu tin cu brinda paz, trankilidad y seguridad di duna e servicionan na nos comunidad na tur nivel na tur nos famianan.

E ta sigur cu e decision tuma den e Ministerraad mas reciente, pa aproba e diez puntonan di crisis cu mester monitor den Reino pa yuda otro, ta encera un tarea cu mester cuminza realiza awor na un forma hopi mas amplio.

Logicamente, ta fresco den e memoria di e mandatario e reciente hecho cu e dos muchanan chikito cu a wordo dera Diaranzon, y el a subraya cu e ta spera cu ainda nos ta na tempo interveni, preveni y tambe castiga esnan culpable di comete e tipo di agresionnan aki, y hacie di un manera integral pa concientiza, yuda y guia. Pasobra e problema aki ta asocia na pobreza, e ta liga cu criminalidad, y e ta bay afecta na dado momento henter nos desaroyo economico. E mandatario a subraya cu Aruba tabata tin crecemento economico pero nos pueblo no a bay padilanti sino cu nos tin na Aruba mas pobreza cu nunca. Mescos, segun e minister cu loke nan ta grita den paisnan di America Latina: “e rico ta bira mas rico y e pober ta bira mas pober!”

Minister Glenbert Croes a acentua cu na Aruba hopi di e personanan cu ta traha ta den pobreza, esnan cu ta biba di bijstand tambe ta den pobreza sin laga e pensionadonan afo.

Segun e mandatario loke a sosode cu e criaturanan ta parti di e explosion social cu tin, y gobierno ta comprometi pa scapa e pida baranca aki pa salba e futuro di nos pais cu ta nos generacionnan nobo.

El a compara e situacion social na Aruba cu un cancer cu mester quimioterapia pero no por dune riba un skina so, sino di un forma integral. Esaki por logra yudando e famia ta e hogar, e fundeshi cu ta ampara nos muchanan.

Mester percura pa e mayornan por bay traha cu e seguridad cu nan yiunan ta bon atendi na scol; percura pa ningun di nos famianan, nos muchanan no pasa hamber, cu mayornan tin un chens pa haya un trabao cu un salario digno, cu momento nan mester di ayudo medico nan ta haye. “Di facto loke nos ta bay haci ta re-funda Aruba, reconstrui e Aruba cu nos ta lagando bay foi man. Nos ta bay traha riba e compromiso pa traha Aruba bek, pa nos tin chens despues di 31 aña di Status Aparte nos ta traha e Aruba ideal den cual nos yiunan, nos famianan, mester por biba, traha, bira grandi y cu perspectivanan. E bon Aruba cu nos bieunan a laga pa nos nos mester lague aworaki pa nos yiunan”, Minister Glenbert Croes a subraya.

 

 

- Advertisement -

DUNA COMENTARIO

Please enter your comment!
Please enter your name here