Home arte y espectaculo Harold Kelly y Mario Gonsalves a gana competencia di fotografia na Aruba...

Harold Kelly y Mario Gonsalves a gana competencia di fotografia na Aruba Art Fair

24
0
SHARE
- Advertisement -

ORANJESTAD (AAN)– – Durante e weekend di 24, 25 y 26 di november a tuma luga e grandioso Aruba Art Fair. E tres anochinan tabata yena cu arte, presentacionnan di baile, teatro, canto, exposicion di artistanan y artesanonan local y desvelacion di e pinturanan riba e murayanan di San Nicolas.

Un di e disciplinanan di arte cu Aruba Art Fair a pone enfoke riba dje e aña aki tabata fotografia. Algun siman prome cu e feria, tur fotografo a keda invita pa participa na e ‘Nature and Faces Photography Competition.’ Fotografonan por a entrega nan miho potret di Aruba su naturalesa y/of e cara(nan) di Aruba. Aruba Art Fair a anuncia cu e dos potretnan ganador, un den e categoria di naturalesa y un den e categoria di e cara(nan), lo wordo exponi den e prestigioso Palacio Municipal na Doral Florida.

Un total di 32 potret di naturalesa y 14 potret di e cara(nan) di Aruba a keda registra pa participa. E trabou dificil pa selecta e ganadornan a keda den man di e editors-in-chief di Aruba Nights Magazine, Island Temptations Magazine, Xclusivo Magazine, Express Magazine y Focus Magazine, y tambe un representante di Aruba Tourism Authority y un representante di e Palacio Municipal di Doral Florida.

E potret ganador den e categoria di naturalesa a wordo saca pa fotografo Harold Kelly. Harold ta conta cu e tin basta tempo cu e kier saca e bista aki pero a warda pa e bira un tiki mas berde pa asina e por captura e diferente texturanan y colornan cu tin riba e seronan. Despues di e yobidanan cu Aruba a haya ultimamente, Harold a dicidi cu ta tempo pa saca e potret. Segun Harold, e rooi aki no tin nomber ainda y pa e motibo ey el a titula e potret “Untitled.”

Den e categoria di e cara(nan) di Aruba, fotografo Mario Gonsalves su “Homb’i Coco” a keda selecta como e ganador. Mario ta conta con un dia el a bay cumpra aw’i coco na San Nicolas y a topa e meneer ta traha den solo fuerte pero cu hopi alegria e tawata canta mientras e ta corta e coconan. Asina cu e caba di corta un coco, e ta tira e resto di e pidanan den laira. Un monton di paloma ta bula rondon’e pa gara e pida coconan pa nan come. Mario a keda fascina cu e bista y a gara su camara pa spera e momento cu e meneer bolbe tira e resto di coco pa e palomanan. Segun Mario, e potret aki tin un nificacion special paso e ta ilustra con hopi e meneer ta disfruta di su trabou, apesar di ta den e solo fuerte e ta hacie cu pasion. E no ta pretende, e ta simplemente ken e ta: e homb’i coco.

Aruba Art Fair kier a gradici tur e participantenan di e competencia y felicita Harold Kelly y Mario Gonsalves cu nan potret cu lo wordo exponi internacionalmente. Siguientemente, e dos potretnan lo wordo transporta pa e Palacio Municipal di Doral Florida.

 

- Advertisement -

DUNA COMENTARIO

Please enter your comment!
Please enter your name here