Home Hudicial Hoben Chines cu a planea asalto arma riba su madrastra declara liber

Hoben Chines cu a planea asalto arma riba su madrastra declara liber

581
0
SHARE
- Advertisement -

Sospechoso cu si a comete e asalto a keda condena na 5 aña

ORANJESTAD (AAN): Diabierna mainta Corte den Promer Instancia a dicta sentencia den e caso penal cu Ministerio Publico a cuminsa contra e hoben Chines J.W.L. y e Venezolano A.F.C. Fiscal a exigi 3 aña di prison pa J.W.L. y 5 aña di prison pa A.F.C. Abogado mr. Lejuez a bisa Hues cu mester declara J.W.L. liber pasobra e mes a hala atras di haci e asalto arma y segun ley esey ta pone cu no por persigui’e.

Hues riba Diabierna mainta a comparti e punto di bista di mr. Lejuez y a declara e Chines liber mientras cu e otro sospechoso a worde condena na 5 aña di prison.

ASALTO ARMA:

Dia 1 December 2017, tratamento di e caso a tuma lugar y e acusacionnan cu Fiscal a presenta contra e Chines J.W.L. y e Venezolano A.F.C. ta:

Entre 24 October 2016 y 7 November 2016 a purba haci un asalto arma na cas di doño di Lekker Bar cu ta e madastra di J.W.L.  E cas ta situa den area di Tanki Leendert y Tanki Flip.

Dia 8 November 2016, a haci e asalto arma riba e dama y bay cu cantidad di placa.  DIARIO e tempo ey a raporta cu a bay cu 30.000 Florin.

Hues a mustra cu for di e investigacion por saca afor cu e promer biaha cu a purba, e plan no a resulta.

E Chines J.W.L. a declara na Recherche, cu el a duna informacion unda su madastra ta biba y a forma parti di e planeamento di e asalto arma. E tempo ey parce cu e tabata usa droga y tabata kier haya placa. Segun e sospechoso J.W.L. e tabata hunto cu e otro asaltantenan y a propone pa haci e asalto arma. Na cas di Darwin a traha e plan. Un grupo tabata vigila na Lekker y un otro grupo na e cas. Nan a bisti na preto y Darwin a facilita arma. Segun J.W.L., e tabata hunto cu esnan cu a haci e asalto arma. Na dado momento J.W.L. no tabata kier haci’e mas.

J.W.L. a bisa Hues cu el a para e asalto arma. Pesey ora su madastra a yega, el a cuminsa tosa y drumi abou y e asalto arma a fracasa e momento ey. Segun J.W.L., ora el a mira su madastra, el a sinti algo cu a pone cu e no kier pa e asalto arma sosode. El a bisa Hues cu despues di e dia ey, el a aleha di e grupo y hasta a bay biba na San Nicolas.

El a remarca cu e no ta compronde cu Darwin no ta encarcela. Segun J.W.L. tur e otro asaltantenan ta di Venezuela y ta cu Darwin.

EXIGENCIA DI FISCAL:

Fiscal a bisa cu J.W.L. a admiti na Recherche cu el a yuda planea. Fiscal a remarca cu den Corte awor e ta bisa cu el a hala atras pa no a haci e asalto arma. Fiscal ta haya cu J.W.L. no a expresa esaki na e otronan y tampoco e no a bay Recherche pa bisa di e plan pa haci e asalto arma. Segun e otronan e asalto arma no a sigui pasobra ya e madastra a drenta e cas.

Fiscal a bisa Hues cu e no ta kere cu J.W.L. a hala atras. Fiscal a bisa cu e ta haya proba e intento di asalto arma. El a mustra cu e comportacion di nan, esta cara tapa y arma, ta mustra cu nan tabatin e intension pa haci e asalto arma.

Pa loke ta e asalto arma realiza 8 November 2016,

Fiscal a bisa Hues cu J.W.L. a bisa cu el a hala atras. Na opinion di Fiscal, no tin otro declaracion cu ta contradeci esaki. Pesey el a pidi Hues pa declara J.W.L. liber di e asalto arma realiza riba 8 November 2016.

Pa loke ta e sospechoso A.F.C., Fiscal a mustra cu tin declaracion di J.W.L. y un otro cu ta mustra cu A.F.C. ta envolvi den e intento di asalto arma. Den Corte awor J.W.L. ta bisa cu A.F.C. no ta e tal Billi. Fiscal ta kere cu den KIA a palabra esaki. Na opinion di Fiscal, e sospechoso A.F.C. tabata envolvi den e asalto di 8 November 2016 tambe. Tin otro sospechosonan cu ta bisa cu ta A.F.C. tabata envolvi y a duna un tas na un dama pa warda.

Pa cu castigo, Fiscal a bisa cu e ta tene cuenta cu ta un intento di asalto arma y un asalto arma realize. Asalto arma na cas di un hende ta hopi serio. Bo cas ta e unico lugar caminda bo mester sinti bo sigur. Hendenan cu ta victima di asalto arma, ta keda cu trauma. Casonan asina ta causa inseguridad den comunidad. Fiscal a sigui bisa cu e ta tene cuenta cu A.F.C. a bin Aruba pa haci asalto arma. El a exigi 5 aña di prison pa A.F.C.

Pa J.W.L., Fiscal a bisa cu e ta tene cuenta cu J.W.L. a haci e asalto arma riba su madastra. Esaki ta hopi serio. El a exigi 3 aña di prison.

ABOGADO:

Mr. Lejuez a bisa Hues cu J.W.L. a admiti cu e tempo ey e tabata den adiccion y den necesidad di placa, a planea e asalto arma. Na opinion di mr. Lejuez, J.W.L. tabata esun cu mester a duna señal ki ora e asalto arma mester sosode pero el a hala atras y intencionalmente a tarda pa esaki no a sosode. E abogado a mustra cu J.W.L. a bisa cu e ora el a mira su madastra el a sinti algo y a hala atras.

Door di esaki, e madastra a haya chens di drenta e cas y e asalto arma no por a sigui. E abogado a menciona un articulo di ley cu ta mustra cu si e sospechoso voluntario a hala atras di e delito, e no por worde castiga pa esaki. E abogado ta haya cu J.W.L. a sabotea e asalto arma pasobra e no tabata kier pa e sigui mas. Pa loke ta e asalto arma riba 8 November 2016, mr. Lejuez a bisa cu e ta comparti posicion di Fiscal cu J.W.L. no por worde haya culpable. E abogado a bisa Hues cu e ta haya cu mester declara J.W.L. liber.

SENTENCIA:

Diabierna mainta Hues a cuminsa cu A.F.C. y a bisa cu a keda legalmente proba asalto arma riba 8 November 2016 cu violencia hunto cu otronan. Tambe Hues ta haya proba e intento di asalto arma.

Hues a mustra cu A.F.C. hunto cu otronan, a haci e asalto arma na cas di e dama, a ranca e dama for di auto. A.F.C. hunto cu otronan a causa hopi angusta riba victima. Ademas e caso aki a sacudi henter comunidad y a causa hopi sentimento di inseguridad.

Hues a tuma A.F.C. na malo cu apesar cu e promer asalto arma no a resulta, a bay un biaha mas. Hues a confirma e exigencia di Fiscal y a condena A.F.C. na 5 aña di prison, kitando e tempo cu e ta sera caba den KIA.

Pa loke ta J.W.L., Hues ta haya cu e acusacion di 8 November 2016, conforme Fiscal e ta declar’e liber. Pa loke ta e intento y preparacion di e asalto arma promer. Esey si ta proba.

Hues a mustra riba e defensa di abogado mr. Lejuez, cu a mustra cu voluntariamente J.W.L. a hala atras y a haci cu e promer asalto no a resulta. E abogado ta haya cu esey a base di ley ta haci cu mester declara J.W.L. liber. Hues ta haya cu esey ta e caso.

Hues a bisa cu e ta haya cu J.W. a percura cu e asalto arma no a sosode y ta declar’e liber.

 

- Advertisement -

DUNA COMENTARIO

Please enter your comment!
Please enter your name here