Home Hudicial Hoben Chines ta planea asalto arma riba su madrastra

Hoben Chines ta planea asalto arma riba su madrastra

188
0
SHARE
- Advertisement -

Fiscal a exigi 3 aña p’e y 5 aña pa un otro sospechoso asaltante

ORANJESTAD  (AAN) – Un hoben Chines J.W.L. y un Venezolano A.F.C., a presenta dilanti Hues pa duna cuenta pa e caso penal cu Ministerio Publico a cuminsa contra nan. E Chines a admiti di a planea y a participa den e promer intento di asalto arma riba su madrastra pero na dado momento ora el a mira su madrastra, el a hala atras.

E di dos biaha si e asalto arma a resulta pero e no a participa. Fiscal ta hay’e culpable y a exigi 3 aña di prison. E otro sospechoso ta para riba cu e no tin nada di haci cu e asalto arma. Fiscal a exigi 5 aña di prison p’e.

ACUSACION

E acusacionnan cu Fiscal a presenta contra e Chines J.W.L. y e Venezolano A.F.C. ta:

– Entre 24 October 2016 y 7 November 2016 a purba haci un asalto arma na cas di doño di Lekker Bar cu ta e madrastra di J.W.L.

– Dia 8 November 2016, a haci e asalto arma riba e dama y bay cu cantidad di placa.

Na September 2017, e caso a bin dilanti pro forma, caminda e dama victima a presenta acompaña pa e hurista Duijneveld. Sinembargo e biaha aki nan no a presenta.

ASALTO ARMA

Hues a mustra cu e dama doño di Lekker a bisa Recherche cu ora el a bay cas dia 8 November 2016, 3 persona arma a asalt’e. El a splica cu e tres asaltantenan a bay riba dje y nan kier a bay den su cas pa bay cu placa. Nan a bay cu 10 mil florin cu e tabatin den su tas e momento ey, mas 20 mil florin for den cas. Recherche, durante nan investigacion, a bin haya e tas na cas di un dama B. kende a bisa cu e tas ta procedente di un asalto arma riba cas di doño di Lekker.

E doño a reconoce su tas. E dama B. a bisa cu el a tende Chines J.W.L. papia cu un tal Darwin, kende tabata keda serca B., pa haci asalto arma pasobra e tin necesidad di placa. Darwin a laga e armanan y droga na cas di B. Investigacion a mustra cu Darwin a stuur e auto. El a wordo deteni y el a bisa cu ta J.W.L a bin cu e plan.

Durante tratamento di e caso por a constata cu e tal Darwin aki, ta e mesun persona kende su nomber tambe tabata wordo menciona den e caso grandi di asalto arma na Estrella y Kevin Jewelry. Por a compronde cu pa un of otro motibo e Darwin aki ta liber.

CHINES NO KIER A SIGUI

Hues a mustra cu for di e investigacion por saca afor cu e promer biaha cu a purba, e plan no a resulta.

E Chines J.W.L. a declara na Recherche, cu el a duna informacion unda su madrastra ta biba y a forma parti di e planeamento di e asalto arma. E tempo ey parce cu e tabata usa droga y tabata kier haya placa. Segun e sospechoso J.W.L. e tabata hunto cu e otro asaltantenan y a propone pa haci e asalto arma. Na cas di Darwin a traha e plan. Un grupo tabata vigila na Lekker y un otro grupo na e cas. Nan a bisti na preto y Darwin a facilita arma. Segun J.W.L., e tabata hunto cu esnan cu a haci e asalto arma. Na dado momento J.W.L. no tabata kier haci’e mas.

J.W.L. a bisa Hues cu el a para e asalto arma. Pesey ora su madrastra a yega, el a cuminsa tosa y drumi abou y e asalto arma a fracasa e momento ey. Segun J.W.L., ora el a mira su madrastra, el a sinti algo cu a pone cu e no kier pa e asalto arma sosode. El a bisa Hues cu despues di e dia ey, el a aleha di e grupo y hasta a bay biba na San Nicolas.

El a remarca cu e no ta compronde cu Darwin no ta encarcela. Segun J.W.L. tur e otro asaltantenan ta di Venezuela y ta cu Darwin.

OTRO SOSPECHOSO TA NENGA

J.W.L. a sigui bisa Hues cu despues el a tende cu e asalto arma a sosode toch. El a bay serca Darwin pa check pero segun Darwin e grupo no ta cun’e mas. El a bisa Hues, cu e no por a haci nada mas. Ariba preguntanan di Hues, J.W.L. a bisa cu e relacion entre e y su madrastra no ta bon mas.

E otro sospechoso A.F.C.,  ta para riba cu e no sa di nada. El a bisa Hues cu e kier haci un demanda di daño pa ta encarcela inhustamente. Hues a bisa A.F.C. cu awor e no por haci esey y a haci’e diferente pregunta encuanto e caso.

Hues a puntr’e si e ta e tal Billi cu ta wordo menciona cu a forma parti di e asalto arma. Segun A.F.C. e no ta Billi y no sa nada di e asalto arma. E tabata bisa cu e ta mecanico y a drecha auto pa J.W.L. pero nada mas.

EXIGENCIA DI FISCAL

Fiscal a bisa cu J.W.L. a admiti na Recherche cu el a yuda planea. Fiscal a remarca cu den Corte awor e ta bisa cu el a hala atras pa no a haci e asalto arma. Fiscal ta haya cu J.W.L. no a expresa esaki na e otronan y tampoco e no a bay Recherche pa bisa di e plan pa haci e asalto arma. Segun e otronan e asalto arma no a sigui pasobra ya e madrastra a drenta e cas. Fiscal a bisa Hues cu e no ta kere cu J.W.L. a hala atras. Fiscal a bisa cu e ta haya proba e intento di asalto arma. El a mustra cu e comportacion di nan, esta cara tapa y arma, ta mustra cu nan tabatin e intension pa haci e asalto arma.

Pa loke ta e asalto arma realiza 8 November 2016, Fiscal a bisa Hues cu J.W.L. a bisa cu el a hala atras. Na opinion di Fiscal, no tin otro declaracion cu ta contradeci esaki. Pesey el a pidi Hues pa declara J.W.L. liber di e asalto arma realiza riba 8 November 2016.

Pa loke ta e sospechoso A.F.C., Fiscal a mustra cu tin declaracion di J.W.L. y un otro cu ta mustra cu A.F.C. ta envolvi den e intento di asalto arma. Den Corte awor J.W.L. ta bisa cu A.F.C. no ta e tal Billi. Fiscal ta kere cu den KIA lo a palabra esaki. Na opinion di Fiscal, e sospechoso A.F.C. tabata envolvi den e asalto di 8 November 2016 tambe. Tin otro sospechosonan cu ta bisa cu ta A.F.C. tabata envolvi y a duna un tas na un dama pa warda.

Pa cu castigo, Fiscal a bisa cu e ta tene cuenta cu ta un intento di asalto arma y un asalto arma realize. Asalto arma na cas di un hende ta hopi serio. Bo cas ta e unico lugar caminda bo mester sinti bo sigur. Hendenan cu ta victima di asalto arma, ta keda cu trauma. Casonan asina ta causa inseguridad den comunidad. Fiscal a sigui bisa cu e ta tene cuenta cu A.F.C. a bin Aruba pa haci asalto arma. El a exigi 5 aña di prison pa A.F.C.

Pa J.W.L., Fiscal a bisa cu e ta tene cuenta cu J.W.L. a haci e asalto arma riba su madrastra. Esaki ta hopi serio. El a exigi 3 aña di prison.

ABOGADO

Mr. Lejuez a bisa Hues cu J.W.L. a admiti cu e tempo ey e tabata den adiccion y den necesidad di placa, a planea e asalto arma. Na opinion di mr. Lejuez, J.W.L. tabata esun cu mester a duna señal ki ora e asalto arma mester sosode pero el a hala atras y intencionalmente a tarda pa esaki no a sosode. E abogado a mustra cu  J.W.L. a bisa cu e ora el a mira su madrastra el a sinti algo y a hala atras. Door di esaki, e madrastra a haya chens di drenta e cas y e asalto arma no por a sigui. E abogado a menciona un articulo di ley cu ta mustra cu si e sospechoso voluntario a hala atras di e delito, e no por wordo castiga pa esaki. E abogado ta haya cu J.W.L. a sabotea e asalto arma pasobra e no tabata kier pa e sigui mas. Pa loke ta e asalto arma riba 8 November 2016, mr. Lejuez a bisa cu e ta comparti posicion di Fiscal cu J.W.L. no por wordo haya culpable. E abogado a bisa Hues cu e ta haya cu mester declara J.W.L. liber.

Mr. Mohamed a bisa cu A.F.C. a desmenti di a participa den e asalto arma. E abogado a bisa Hues cu e ta haya cu e otro sospechosonan ta contradeci otro den nan declaracion contra A.F.C. Promer nan a nenga pero despues nan ta formula un declaracion pa asina tira culpa riba A.F.C. Na opinion di e abogado, si mira cuanto cambio a haci den declaracion di testigonan, ta haya cu mester duda den esakinan y mester declara A.F.C. liber.

Hues a sera tratamento di e caso y a bisa cu e ta bay studia e caso y dia 22 December 2017 tin sentencia.

 

- Advertisement -

DUNA COMENTARIO

Please enter your comment!
Please enter your name here