Hospital y Gobierno ta sostene e mision di Fundacion Respaldo

    96
    0
    SHARE
    - Advertisement -

    ORANJESTAD(AAN): A tuma luga e traspaso di PAAZ pa Fundacion Respaldo y director di hospital dr. Horario Oduber Hospital, Ezzard Cilie y tambe minister di salubridad publico, Dangui Oduber, tabata tey presente. Esaki, segun Cilie tabata un momento historico, tanto pa hospital como gobierno, den cual cu a cumpli cun’e.

    A firma un acuerdo di traspaso, den cual Hospital ta bay traspasa e parti psikiatrico cu semper a cay bao di nan, ta bay den e e Instituto nobo aki cu ta bay bira mucho mas specifica den cuadro di e cuido psikiatrico na Aruba.

    PAAZ ta tempo pasa, por lo menos 15 aña. Por a corda e mesun director actual, nan a cera cabes cu tin cu bay papia cu e minister di salud, kende tabata sr. Booshi Wever e tempo ey, y a pidi’e pa por fabor yuda pasobra e forma cu e cuido psikiatrico ta, no ta bon, e no ta yega na e cuido necesario cu e poblacion Arubiano tin mester.

    Cilie a mencion’e pa no kere cu di un dia pa otro esaki a bin. Pero tin mas cu 15 aña a traha riba dje. Cilie ta contento cu esaki. Pa e pueblo Arubiano e ta nifica un mehoracion di cuido, pa e categoria special aki na Aruba, den cual tin masha hopi pa haci. Esey no ta zona desconoci tampoco, cu mester haci algo.

    Tambe Cilie ta recorda cu algun aña pasa tabata tin un caso tristo, den cual un hende a logra mata su mama, su tata, su ruman y tabata un hende cu tabata sufri, tabata tin un malesa psikiatrico y locual e tempo ey a dal duro, ora cu e persona aki a bay dilanti di hues. Tin cu corda e persona aki tabata malo y a causa e crimen aki.

    E hues e tempo ey a bisa cu e no por pone e responsabilidad completamente riba e persona aki, pasobra e comunidad Arubiano tambe ta co-responsabel pa e situacion cu nos tin aki. Cu otro palabra, cu no tin institutonan of instituto adecua pa trata hendenan cu ta malo asina. Cu el a comete un crimen, ta berdad. Pero no tin cu lubida cu e tabata malo y e tempo ey no tabata tin e cuido adecua pa duna e persona.

    Bisando esey, Cilie ta realisa con importante y con contento nan como dirigentenan ta. Awor aki, e minister tambe sigur ta contento. Ta un paso hopi grandi ta tuma pa e futuro y tin tur confianza cu esey lo bay bira miho, pero tambe e ta un parti cu no a duna suficiente atencion den pasado y awor aki ta bay e rumbo aki.

    E organizacion aki ta nobo, pero e lo bay crece masha lihe y bay adapta su mes na e necesidadnan di e categoria di pashentnan aki. Cu otro palabra, nos cuido ta bira mucho mas completo di locual e ta awor aki. E firmamento di e acuerdo tabata eigenlijk pa complenta e intencionnan di locual kier bay logra awor aki.

    A firma esaki ayera. E momento aki tabata historico. Aruba a tuma un paso mas, cuido di Aruba a tuma un paso mas, pa bay dilanti y pa mehora. No ta cla ainda. Tin hopi mas pa bin. Esaki ta un di e pasonan.

    Fondonan financiero

    Ta parce simpel, pero e ta hopi caro e tipo di cuido aki. Hopi ta debi na esnan cu ta riba e tereno aki, pa logra convence e politiconan pa nan yuda of pa nan tuma e paso ey. Nan tambe ta depende riba locual ta worde sugeri of ta conseha nan. Esaki a dura largo, pero e tabata bale la pena, pasobra por fin por a tuma e paso aki.

    Awor aki por bisa ta casi ta un traspaso administrativo, pero mester imagina, cu nan mester bay crece, mester bay lanta y den esey, hospital ta keda responsabel. No ta cuestion cu nan ta sigui. Sa cu e caminda pa cana awor aki, tin hopi trabao pa haci. Pero e compromiso di hospital ta pa yuda y pa nan tum’e over responsablemente. E minister ta mesun cos. Tambe ta conta cu ta haci’e na un forma responsabel. Ultimamente localmente, e ta e autoridad responsabel tambe. Y e ta conta cun’e tambe.

     

    - Advertisement -

    DUNA COMENTARIO

    Please enter your comment!
    Please enter your name here