Home General Indice di Prijs di Consumo a cay pa luna di November

Indice di Prijs di Consumo a cay pa luna di November

13
0
SHARE
- Advertisement -

ORANJESTAD (AAN): Segun Oficina Central di Estadistica, e Indice di prijs di Consumo (CPI) pa luna di November 2017 ta 116.70, loke ta representa un caida di 0.4% compara cu e indice di October 2017 (117.12) y acumulando un caida di 1.1% te cu na November di e aña aki.

E cambio di e CPI pa e ultimo diesdos (12) lunanan (November 2016 te cu November 2017) ta -0.9%, un caida di 0.9 ppt compara cu e periodo corespondiente di aña pasa (0.0%).

E promedio anual di e tasa di inflacion pa e periodo di November 2016 te cu November 2017 ta -0.5%, un subida di 0.4 ppt compara cu e -0.9% registra den e periodo di November 2015 te cu November 2016.

Durante e luna aki, ocho (8) di e diesdos (12) sectornan a registra caida di prijs. E caidanan cu tabata tin e mayor efecto riba e CPI a worde registra pa e sectornan di “Transporte” (-1.0%) y “Recreaccion y cultura” (-2.0%), causando un efecto di -0.18 y -0.16 ppt, respectivamente. E caidanan den e restante sectornan a contribui cu un efecto di -0.07 ppt riba e CPI di November 2017.

E caidanan aki a worde contraresta parcialmente door di principalmente subidanan den e indice di e sectornan di “Restaurant y hotel” (0.4%) y “Salud” (0.8%), cu a contribui cada un cu un efecto di 0.02 ppt riba e CPI di November 2017. E subida den e sector restante a contribui cu un efecto di 0.01 ppt riba e CPI di November 2017.

E caida den e sector di “Transporte” a worde causa principalmente door di caidanan di 7.1% y 0.8% den e categorianan “Servicio di transporte” y “Gasto relaciona cu uso di vehiculo di transporte personal”, causando un efecto di -0.11 y -0.07 ppt, respectivamente. E caida den e sector di “Recreaccion y cultura” a worde causa principalmente door di un caida den e categoria “Vacacion” (-13.6%), causando un efecto di -0.07 ppt.

E subida den e sector di “Restaurant y hotel” a worde causa principalmente door di un subida den e categoria “Cuminda pafo di cas” (0.4%), causando un efecto di 0.02 ppt. E subida den e sector di “Salud” a worde causa principalmente door di un subida di 1.2% den e categoria “Producto, aparatonan y ekipo medico”, causando un efecto di 0.01 ppt.

E canasta di consumo di e CPI ta consisti di 452 bienes y servicionan. Compara cu October 2017, 31.2% di e bienes y servicionan aki a conoce un aumento di prijs causando un efecto di 0.35 ppt, mientras cu 32.5% ta mustra un caida di prijs, cu a contribui cu efecto di -0.72 ppt y pa e restante 36.3% no tabata tin cambio den prijs. Prijsnan di bienes a baha cu 0.4% na November 2017 y a causa un efecto di -0.28 ppt riba e CPI di November 2017. Prijsnan di servicionan a conoce un caida di 0.2% y a causa un efecto di -0.08 ppt.

E CPIC (core inflation) – CPI excluyendo e efecto di energia y cuminda – a registra na November 2017 un subida di 0.3%, un caida di 0.4 ppt, compara cu e periodo corespondiente di aña pasa (0.7%). E indice di energia – cu ta consisti di e productonan: electricidad, awa, gasolin y diesel a registra un caida di 4.3%, cu ta 3.0 ppt mas halto compara cu e periodo corespondiente di aña pasa (-7.3%). E indice di cuminda a registra un subida di 0.9%, cu ta 1.3 ppt mas halto compara cu e periodo corespondiente di aña pasa (-0.4%).

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na November 2017 ta Afl. 4,330, mientras cu pa un hogar di un (1) adulto e suma ta Afl. 2,062.

- Advertisement -

DUNA COMENTARIO

Please enter your comment!
Please enter your name here