Home Comercio Informacion importante pa e votadonan y candidatonan pa Directiva nobo di KvK

Informacion importante pa e votadonan y candidatonan pa Directiva nobo di KvK

21
0
SHARE
- Advertisement -

ORANJESTAD (AAN): Awe KvK ta tene su eleccion pa elegi miembronan nobo pa su directiva. Tur votador cu tin e derecho di voto ta worde invita pa pasa di 9or di mainta pa 12or di merdia na e auditorium di KvK pa deposita nan voto. E eleccion lo worde dirigi y supervisa door di e comision di eleccion di KvK.

Informacion pa e votadonan:

E lista di personanan cu derecho di voto (votado) ta poni riba KvK su website.  Por haya di Grootbedrijf na:  http://bit.ly/2C5yCsP

Por haya Kleinbedrijf na:  http://bit.ly/2BAQOgR

Prome cu 6 di december 2017 tur persona cu derecho di voto mester a ricibi un convocatorio (“oproep”) pa bin vota. Ta pidi tur votador pa presenta cu e oproep y un ID valido. Den caso cu no ricibi e oproep e votado por presenta dia di eleccion cu su ID valido y informa e Presidente di e comision di eleccion cu e no a ricibi e oproep. Lo verifica su derecho di voto y e votado lo ricibi un duplicado.

KvK lo brinda servicio normal na cliente (di 8 am – 4.30 pm) y pesey ta haci un apelacion na un y tur, tambe candidatonan pa minimalisa cualkier acto cu por obstaculisa e operacion di KvK y/o e fluho di cliente.

E votador  ta entrega e oproep na e Presidente di e comision di eleccion y lo ricibi un stembiljet y ta dirigi su mes na e stemhokje corespondiente (pa Grootbedrijf of pa Kleinbedrijf). Despues di a yena e stembiljet e votado ta deposita esaki den e stembus corespondiente (pa Grootbedrijf of pa Kleinbedrijf).

Pa 12or en punto lo cera e votacion. Solamente e votadornan cu ta presente prome cu 12or y ta wardando nan turno lo worde permiti pa caba di vota. Tur votador cu yega KvK despues di 12or no lo worde permiti mas pa vota.

Informacion pa candidatonan:

Candidatonan por ta presente na KvK dia di eleccion.

Candidatonan por saluda y combersa cu e clientenan y/o votadornan y tambe por reparti material di promocion, pero no ta permiti pa haci entrevista y/o haci filmacion den e edificio di KvK, esaki ta posibel solamente pafo di e edificio of riba e balcon na prome piso.

Por saca potret, pero ta pidi pa tene cuenta pa esaki no stroba y/o incomoda otro persona o clientenan.

No ta permiti pa colga ni pega ningun material di promocion na e murayanan di KvK. Por pone banners y back drops solamente na piso 1 riba e gang, pero no ta permiti ningun material di promocion den e auditorium.

Despues di e eleccion e comision di eleccion KvK lo conta e votonan. E resultado lo worde publica den e Landscourant como tambe den algun di e corantnan local. E proces-verbaal di e zitting lo ta disponibel na KvK pa consulta pa un y tur.

E 3 candidatonan cu ricibi mas voto (2 pa Grootbedrijf y 1 pa Kleinbedrijf) lo ricibi un carta for di e comision di eleccion KvK.

E candidatonan pa e eleccion ta: Grootbedrijf: Wanda C. Broeksema, Satish D. Daryanani, Segundo J.A. Ecury, John G. Eman, Roslyn G. Vrolijk.

Pa Kleinbedrijf:  Alexlindy Y.G. Croes, Maria C. Croes, Satish D. Daryanani, y Sandy R. Odor.

Riba website di KvK www.arubachamber.com por haya mas informacion di e candidatonan y nan motivacion pa postula como miembro pa e Directiva di KvK pa e siguiente periodo. KvK ta contento di por conta cu un interes grandi di participantenan na e eleccion aki y ta manda un palabra di exito na tur e candidatonan.

 

- Advertisement -

DUNA COMENTARIO

Please enter your comment!
Please enter your name here