Y intercambia experticio
ORANJESTAD (AAN): Durante 4 dia, di 29 di november 2017 te cu 2 di december 2017, e Inspecties Volksgezondheid di Aruba, Corsou y Sint Maarten ta reuni na Aruba pa intercambia experticio tocante e maneho, proceduranan y e cooperacion entre e tres islanan.
Lo discuti entre otro e proceduranan di keho y calamidad, e maneho di remedi, pero tambe e rol di e Inspecties ora ta trata ‘rampenbestrijdingen’. Riba 30 di november 2017 a firma un acuerdo formal pa sigui intercambia experticio.
E reunionnan ta conta cu presencia di e team di Inspectie Volksgezondheid Aruba (IVA) cu ta consisti di e Inspector General di Aruba, mr. Dorylee Pappers-Lopez Penha, e Inspector di Salud, drs. Cheryl Rosa-Fingal y e teamnan di Cure en Care, Remedi y e funcionarionan pa maneho.
Di Corsou ta presente e Inspector General, Dr. Jan Huurman y di Sint Maarten e Inspector General, Dr. Earl Best hunto cu su funcionario pa maneho huridico.
Durante e HCCA conference na juni 2017, e Inspecties Volksgezondheid di Aruba y Sint Maarten a firma un acuerdo caba cu lo intercambio experticio y e tempo ey a menciona cu tabata e intencion di tin un acuerdo formal cu entre otro Corsou tambe.
Pues, IVA ta satisfecho cu awo a firma un acuerdo cu ambos Corsou y Sint Maarten y cu e islanan aki por conta riba e intercambio di experticio di otro.
