Home Social Lema di Arte Sano: “Transformacion Social, Creando Beyeza y transformando bidanan”

Lema di Arte Sano: “Transformacion Social, Creando Beyeza y transformando bidanan”

18
0
SHARE
- Advertisement -

Entrevista cu Claudia Nooren Ruiz-Vasquez:

ORANJESTAD (AAN)—Matutino DIARIO a entrevista sra. Claudia Nooren Ruiz-Vasquez, Diseñadora Conceptual, hopi conoci na Aruba pa su trabao di diseño den Aeropuerto Reina Beatrix, Hotelnan, Restaurantnan y proyectonan residencial, entre otro, atravez di su empresa Artesano Design Studio.

Claudia a nace na Guatemala, na unda el a studia Diseño Conceptual, y 23 aña pasa el a establece na Aruba. “Mi ta considera mi mes un Arubiana pa scogencia”, Claudia ta expresa.

Manera ta conoci Claudia ta e creador di Arte Sano Foundation. “Arte Sano” ta un wega di palabra cu ta nifica ‘Artesano’: e persona cu ta crea arte cu su mannan, y ‘Arte ta Sano’.

Fundacion Arte Sano a lanta na aña 2012 y for di e tempo ey e ta trahando sin stop, y su grupo meta ta e hoben y adulto vulnerable. Esaki ta envolve e hobennan cu ta den prison, e adictonan ambulatorio, esnan den curatela, esnan cu ta den rehabilitacion, e drops out y den futuro, e clientenan di Reclassering, como tambe e muchanan muher den riesgo.

“E mision di e fundacion ta descubri e potencial artistico di nos studiantenan, y crea un impacto na largo plazo den nos comunidad, usando diseño y arte como tools, pa crea obranan bunita mientras tanto nan bida ta transforma”, Claudia a expresa.

Pesey e slogan di Arte Sano ta: “Transformacion Social, Creando Beyeza y transformando bidanan”.

“ Nos a wordo inspira den e Bauhaus Movement na Europa, y nos ta traha den un setting di estudio di artistanan. Nos obhetivo ta desaroya souvenirs Arubiano, genuino basa riba nos herencia cultural y natural, cien por ciento diseña y elabora na Aruba, pa nos industria turistico” sra. Nooren Ruiz-Vasquez a acentua.

E fundacion ta traha cu e siguiente instancianan: KIA (area hubenil), SAMBA (Adictonan ambulatorio), Curatela, Centro Colorado y nan kier agrega Reclassering.

“Nos ta un estudio on wheels y nos ta hopi contento cu nos tin awor nos prome localidad, situa den e curazon di Rancho.

Nos ta feliz cu for di e aña aki, danki na nos sponsornan nos tin e localidad aki den un area simbolico di Aruba, pasobra e ta prome center economico di nos Isla”, Claudia a indica.

Dos biaha pa siman e Fundacion ta duna les: Diaranzon y Diabierna. “Aki, nos graduadonan por bin sigui haya les y tin mas ora di trabao pa nan crea nan producto y progresa den nan talento. Nan tin mas libertad pa scoge ki tecnica nan ta prefera pa uza, ya cu nan mes a descubri caba nan potencial. E lesnan aki ta mas personaliza” e dama a comenta.

PROME EXPO:

Siman pasa tabata tin e prome exposicion di Arte Sano, y e comentarionan tabata hopi positivo, cu hopi admiracion pa e talento di e studiantenan. Locual mas a destaca ta pintura den tur su tecnicanan.

“E parti mas interesante  pa nos, di e exposicion aki, ta di a mira e cara di e studiantenan, ora nan a wak nan pinturanan den e murayan di Cas di Cultura, y e mayornan cu a bin wak e trabao di nan yiunan cu ta cera. El a touch e fibranan di nos tur, y esaki ta un refuerzo pa nos mision”, Claudia a expresa, yamando danki tambe na tur e publico cu a bishita e expo.

“Esaki ta e mision y proposito di bida pa cual mi a yega Aruba. Y mi tin un grupo hopi fuerte y valioso di boluntario y ‘assistant teachers’ cu ta pone nan talento na servicio di e Fundacion y nan tur tin e curazon pa Aruba y pa e cursistanan. Nan ta e promenan cu ta kere den e mision aki”, sra. Nooren Ruiz- Vasquez a señala, agregando cu e proyecto di graduadonan di Rancho ta un plataforma positivo pa nan reintegra den nos sociedad.

Fundacion Arte Sano por worde sigui via facebook y via instagram.

- Advertisement -

DUNA COMENTARIO

Please enter your comment!
Please enter your name here