Home Impuesto Ley di Asistencia Internacional den Asuntonan di Impuesto a keda aproba unanimamente

Ley di Asistencia Internacional den Asuntonan di Impuesto a keda aproba unanimamente

28
0
SHARE
- Advertisement -

ORANJESTAD   (AAN)  –Parlamento di Aruba a aproba e ley di cooperacion y asistencia internacional den asuntonan di impuesto, unanimamente. “Di e manera aki Aruba ta cumpli un biaha mas cu su obligacionan internacional di cooperacion y asistencia mutuo,” miembro di fraccion di AVP den Parlamento Richard Arends a informa.

E ley aki a wordo presenta na Parlamento di Aruba pa tratamento door di Gabinete Mike Eman II prome cu esaki a  finalisa su mandato. E ley aki lo drenta na vigor dia prome di januari 2018.

“E ley aki ta resultado di globalisacion y nos economia habri,” sr. Arends a splica. “Tin biaha como gobierno di un pais – ni maske con chikito e ta – bo mester premira riba e desaroyonan aki y  fiha e marconan legal pa cumpli cu acuerdonan internacional.”

Den e caso specifico aki ta trata di e Acuerdo Multilateral entre Autoridadnan Competente (MCAA), como tambe e Standard Comun di Informenan (CRS) stipula pa OECD, e Organisacion pa Cooperacion y Desaroyo Economico, cual Aruba ta parti di dj’e como miembro di Reino Hulandes.

Den su declaracion sr. Richard Arends, alaves vice-presidente di Comision Fiho di Parlamento pa Finansa Publico y Asuntonan Economico, ta haci comparacion cu e leynan di FATF cu a wordo introduci pa Gabinete Mike Eman I. Ta trata aki di regulacionan riguroso bou supervision di Banco Central cu hopi biaha ta causa molester den mundo financiero.

“Tin biaha e regulacionnan asina por wordo considera desproporcional den capital humano, tecnnico y administrativo pa un pais di e tamaño di Aruba cu un sector financiero relativamente chikito,” sr. Arends a ilustra.“Pero e ausencia di esakinan lo por a hiba Aruba den un isolacion bancario indesea,” e parlamentario ta sigui splica.

“Paisnan den Centro-America como tambe den Caribe cu no a implementa e direccionan di FATF algun aña atras, tin problemanan serio awor den nan sector bancario unda banconan local lo por perde e aliansa cu nan banconan coresponsal Mericano of Canades haciendo cualkier transaccion financiero internacional imposibel.”

E ley aki ta resultado concreto di e trabou diligente cu a wordo desplega door di su ex-colega di Finansa, Sr. Angel Bermudez y su departamentonan. E parlamentario a sigui splica di ta contento cu e gobierno nobo a opta pa sigui cu tratamento di e ley.

“Si bo kier hunga den liganan mayor, bo mester hunga manera un big-leaguer,” e parlamentario a bisa durante tratamento di e ley den Parlamento. “Regulacion di asistencia internacional siguramente ta haci Aruba un biaha mas OECD-compliant, mehorando asina e competititvidad di nos isla pa inversionistanan di afo.”

 

 

 

- Advertisement -

DUNA COMENTARIO

Please enter your comment!
Please enter your name here