Home Suceso Mama ta suplica esnan cu tin su yiu di 14 aña teni...

Mama ta suplica esnan cu tin su yiu di 14 aña teni pa debolbe

6515
0
SHARE
— Eugelisa Martis tin di wordo hiba Bonaire pa tratamento!
- Advertisement -

ORANJESTAD(AAN)— Tin un teenager cu pa varios dia caba ta perdi.  E famia sa cu intencionalmente e mucha muher a huy di cas, y awor e mama ta haciendo un suplica pa e regresa cas!  Un suplica fuerte tambe na esnan cu por tine scondi, pa trece cas.

E mama Donalisa Croes ta haci suplica na pueblo, pa esnan cu sa algo, cu a mire, of cu tine wanta na cas, pa por fabor trece bek.  Of sikiera dune un lift y lage baha na cas.

— Lisette Gomes y Donalisa Croes.

Tabata Diahuebs merdia cu Cuerpo policial a emiti boletin pa buskeda di un hoben perdi pa basta dia caba. Su nomber ta Eugelisa Martis.

E sa huy caba den pasado na varios ocasion, pero e biaha aki e tin basta dia y no a bolbe. Su mama ta hopi preocupa.

Si cualkier hende sa algo por fabor contact central di polis na 100, e tiplijn di polis na 111-41 of e mama na 563-0211.

Fundacion Lisette Gomes contra Abuso Sexual di Mucha tambe ta dunando un man.  E directora Lisette Gomes durante un encuentro urgente cu prensa Diahuebs anochi na Hooiberg Kavel, a splica cu e conoce e mama di Eugelisa ya pa mas di 7 aña.  A yude diferente biaha cu e caso aki.  E mucha ta sufri di un trauma basta pisa cu el a sufri di dje 7 aña pasa.

A ser splica na DIARIO, cu e mama ta buscando yudanza pa su yiu muher, y awor a keda cla pa e haya yudanza.  Pero esaki lo bay ta den exterior!

E lo tin di bay haya tratamento na Bonaire, y e lo ta na bienestar di e teenager.

“Bonaire ta man habri pa duna Eugelisa e tratamento cu a wordo nenga aki na Aruba,” e mama a declara na DIARIO.

Pero e mucha muher Eugelisa a huy di cas protestando pa e no wordo hiba e siman aki pa exterior.

Pesey awor famianan ta haci un yamada na esnan cu tine, pa trece cas bek pa asina famia por ta trankil.

E mama a haci suplica, cu bo por yama su 563-0211 y e ta bay mantene bo informacion confidencial y anonimo.  Of bahe un caminda pa asina pasa buske.

Eugelisa mester di tratamento!  E ta bayendo di malo pa peor, y nan a trata di dune tratamento riba e isla caba.  Psicologo di Scol a mustra cu Eugelisa tin di wordo trata.  El a wordo pasa pa Kinder Psychatrie y nan a trate na 3 ocasion, y finalmente conclui cu nan no ta mira nada fout cune, y como cu e mucha no kier tratamento, nan a cera e caso.

Varios instancia a wordo acerca, pero nan ta splica cu nan no por dune yudanza.  Como cu e mama ta buscando ayudo riba vrijwillige kader, pesey nan no por yude.

Voogdijraad tambe ta na altura di e caso, pero nan tambe no por haci mucho pa yuda e mama.  A trata na forza e mucha pa bay keda interna den O.C., pero a base di ‘vrijwillige kader” e ayudo ta bira mas dificil pa haya.

E ultimo biaha cu nan a mire tabata Diasabra 7’or.  Tin di warda 24 ora prome cu raporta su paradero.

Diasabra anochi famianan mes a pasa rond mira si nan por localize na lugarnan di “trip”, pero no a mire ningun caminda.

A contact cu mayoria amiga di Eugelisa, y nan no sa di dje.

Si bo no kier problema cu Husticia, por fabor entrega Eugelisa bek.  Djis hibe cualkier Warda di Polis y lage cana bay paden.  Corda cu si autoridad garabo cu e mucha aki scondi den cas, bo por haya problema.

Ban duna un man pa asina Eugelisa por viaha pa Bonaire pa asina cuminza cu e mihor tratamento pa su bienestar.

- Advertisement -

DUNA COMENTARIO

Please enter your comment!
Please enter your name here