Home Hudicial Mañan sentencia ta cay pa Jamaiquino sospecha di a hinca homber 4...

Mañan sentencia ta cay pa Jamaiquino sospecha di a hinca homber 4 biaha dilanti Carnival Village

145
0
SHARE
- Advertisement -

Fiscal a exigi 5 aña di prison

ORANJESTAD (AAN): Diabierna  mainta Corte den Promer Instancia ta dicta sentencia den e caso penal cu Ministerio Publico a cuminsa contra e homber N.G. di Jamaica, acusa di intento asesinato riba 31 Augustus 2017 den dia cla riba Lagoweg na altura di Carnival Village.

Pa puro casualidad un unidad di Polis a pasa, y mesora multitud di hende a mustra Polis kende e agresor ta cu tabata coriendo na pia rumbo panort.  El a wordo gara mesora!

Fiscal a exigi 5 aña di prison pa N.G. pasobra e ta haya cu intencionalmente N.G. a hinca e homber B., 4 biaha cu cuchiu.

HINCAMENTO:

Tratamento di e caso aki a sosode dia 17 di November 2017, caminda Hues a bisa cu e victima B. a declara na Polis cu e tabata sinta den auto y diripiente N.G. a presenta riba dje y a atak’e. Segun N.G., no ta asina. El a bisa Hues cu ora el a yega na e auto, B. tabata busca algo den auto y a sali for di e auto y a cuminsa bringa cun’e. Hues a puntra N.G. pakico e tabata cu cuchiu. N.G. a bisa Hues cu semper ora e bay San Nicolas e ta bay cu un cuchiu y B. ta di San Nicolas. Segun N.G., B. ta acus’e di a kibra e relacion cu su muher. Hues a bisa cu pakico N.G. no a core bay. E tabatin tur e momento pa a core bay.

Hues a mustra cu N.G. a admiti na Polis cu a hinca B. como 4 biaha cu cuchiu. Hues a puntra pakico a hinca 4 biaha y a actua asina agresivo. Segun N.G., nunca e tabatin problema y cu e y B. tabata amigo pero B. ta acus’e di lo tabatin relacion cu su amiga.

EXIGENCIA DI FISCAL:

Fiscal ta haya cu riba 31 Augustus 2017, diferente biaha N.G. a hinca B. cu un cuchiu. Fiscal a bisa Hues cu diferente hende a mira y tambe tabatin camera di seguridad cu a graba tur cos. Fiscal a sigui bisa cu B. a worde hiba cu urgencia den ambulance pa hospital.

Na opinion di Fiscal, e pregunta ta si por papia di premedita y intento di mata. El a mustra cu N.G. ta bisa awor den Corte cu el a worde ataca promer door di B. Ariba video por mira con e victima tabata hala su curpa atras pa N.G. no hink’e. Na dado momento por mira un persona ta kita e cuchiu for di N.G. pa e no sigui hinca B. Fiscal ta kere cu aki por papia di intento di mata. For di investigacion por saca afor premedita. Fiscal a mustra cu tin testigo a graba con N.G. ta hinca, e victima ta los y core bay. N.G. a sigui su tras, bolbe gar’e y bolbe hinca.

Na opinion di Fiscal, esaki ta mustra bon cla premeditacion. Fiscal a mustra cu e victima B. a bisa cu promer N.G. a hink’e na pecho ora e tabata sinta den auto y e ora ey el a sali for di auto. Fiscal a bisa cu e ta kere cu N.G. kier a mata e victima B. Na opinion di Fiscal, e forma con intencional N.G. tabata hinca den bariga ta mustra cu e tabata kier a mata. Danki Dios cu B. no a fayece. Esaki no ta door di N.G. sino door di hendenan valiente cu a bay hala N.G. for di B.

Fiscal ta haya esaki un caso hopi serio y pa cu e castigo, e ta tene cuenta cu ta promer biaha N.G. ta cay sera. Tambe Fiscal ta tene cuenta cu door di hendenan, N.G. a stop y cu N.G. no ta lamenta di loke el a haci. Fiscal a exigi 5 aña di prison y pa destrui e cuchiu.

DIARIO lo informa lectornan kico Hues su decision ta den e caso aki.

 

- Advertisement -

DUNA COMENTARIO

Please enter your comment!
Please enter your name here