Home Hudicial Mayornan di Zinnia Croes ta sigui pidi pa Husticia prevalece

Mayornan di Zinnia Croes ta sigui pidi pa Husticia prevalece

88
0
SHARE
- Advertisement -

ORANJESTAD (AAN) — Dialuna a tuma luga den Corte, e caso cu mayornan di Zinnia Croes a entama contra di e decision di Fiscal, pa no persigui e agente policial cu a dal e mucha cu auto causando su morto. Abogado mr. S. Faarup ta amplia riba e caso aki.

“Mayornan di Zinnia a cuminza un procedure den Corte y a pidi hof pa tira un bista riba e caso, pa wak si enberdad Fiscal por a keda sin persigui e señora of no. E caso a wordo trata caba na Hof y aki a pidi pa, basicamente,  scucha e señora su banda di medaya, hunto cu su abogadonan. Corte a scucha e banda di medaya di señora pa despues di haci algun pregunta chikito, cera e caso” segun Abogado Faarup.

Dia 19 di Januari lo dicidi e ora si Fiscal tabata den su derecho di no persigui e señora cu a causa e accidente of no. Esey lo keda pendiente, segun mr. Sven Faarup. E caso ta basicamente sera, esaki ta un caso unda a wordo pidi pa hof instrui Fiscal pa toch persigui e persona cu a causa e accidente y esey ta loke ta loke a pidi den Corte y hof lo dicidi dia 19 di Januari, 2019.

FAMIA CROES:

E caso aki, pa e famia di e hobencita, ya ta hopi pisa, door cu ta nan yiu a bay laga bida prome cu su mayornan.

Tambe, mr. Faarup a bisa cu ta duidelijk for di e file cu hopi cos a bay malo den e investigacion. “Bo no por tin mala suerte como famia, pero hopi cos a bay fout y fiscal a admiti esaki tambe. Pero nan kier toch pa e caso bin dilanti, no cu kier un castigo pa e persona, pero nan kier pa e caso wordo trata. Nan kier pa e caso bin den Corte y ta na Huez pa dicidi si e persona ta culpable of no” e abogado a indica.

Por ultimo, mr. Faarup a bisa cu ainda nan tin speranza, ya cu nan ta haya cu tin suficiente motibo pa persigui e persona aki y lague den man di huez si e persona ta culpable di algun delito of no.

E ACCIDENTE:

Dia 13 di Maart 2015, den oranan laat di atardi, a tuma luga un accidente na altura di Pos Chikito, ora cu un auto, maneha pa un dama polis na civil, a dal un mucha. E criatura, Zinnia Croes a fayece pa su mañan siguiente, na hospital, debi na e slanan cu el a ricibi. Investigacion na e lugar mes a demostra cu e chofer, e dama polis na civil, y den su tempo liber, tabata bou influencia di alcohol. Na momento cu a haci test cun’e na e lugar y tambe despues, na warda di polis, e nivel di alcohol tabata pasa e nivel di permisible pa ley.

Despues di esey, fiscal a desisti di persigui e agente policial pa cu e caso aki, pa cual mayornan di Zinnia a entama un caso contra di e decision aki y esaki a wordo trata awe dialuna, den oranan di merdia den Corte, tras porta cera.

 

 

- Advertisement -

DUNA COMENTARIO

Please enter your comment!
Please enter your name here