Home Cultura “Minister Xiomara Ruiz-Maduro presente na celebracion di e talentoso hoben Steve Geerman!”

“Minister Xiomara Ruiz-Maduro presente na celebracion di e talentoso hoben Steve Geerman!”

69
0
SHARE
- Advertisement -

ORANJESTAD– Recientemente Minister di Finansas, Economia y Cultura tabata presente na celebracion y exposicion di e talentoso hoben Steve Geerman. E evento aki a tuma lugar na Cas di sra Titi Tromp na Alto Vista, kende porcierto ta un pilar di nos cultura arubano.

Riba e atardi aki a wordo presenta den lineanan grandi e trayectoria musical di e hoben Steve Laurence Geerman cu 17 aña di edad ya caba a logra hopi exito y a participa den diferente competencia di canto manera di Himno y Bandera, Dande y tambe di Gospel.

Banda di su pasion como cantante Steve ta toca varios instrumento e.o. cuarta, piano y accordion. Otro pasion di Steve ta e musica di caha di orgel, cual tambe e ta toca. Steve a haya les con ta claba clabo riba cilinder di caha di orgel cerca sr. Seferino Gomes, kende tambe a dune les di accordion.

Steve ta un hoben multifacetico ademas di su bida musical, riba tereno social y religioso e ta hopi activo y ta haci varios trabao boluntario y a forma parti di varios organisacion.

Durante e evento Minister Ruiz-Maduro a admira un exposicion cu a ser crea pa e ocasion aki na cas di sra. Titi Tromp, Pilar Cultural na Alto Vista. Asina e mandatario a haya un impresion di tur loke Steve tin na trahe, trofeo y potret.

Minister di Finansas, Economia y Cultura Sra. mr. Xiomara Ruiz-Maduro a felicita e hoben Steve Geerman pa su aporte na nos cultura,  y tambe su mayornan pa e apoyo y sosten. Sigur Steve ta un ehempel pa tur nos hobennan pa desaroya nan talento y contribui na mantene nos cultura arubano cual ta un di metanan primordial den e maneho di e mandatario.

- Advertisement -

DUNA COMENTARIO

Please enter your comment!
Please enter your name here