Home Salud Na Aruba ta diagnostica 44 caso nobo di cancer di prostaat bao...

Na Aruba ta diagnostica 44 caso nobo di cancer di prostaat bao di hende homber

19
0
SHARE
- Advertisement -

Un promedio pa aña

ORANJESTAD   (AAN): Fundacion Contra Cancer di Prostaat, cu ta atende primordialmente cu malesanan di hende homber, e luna aki, cual ta November, caminda cu mundialmente ta wordo reconoci pa atende cu malestarnan di hende homber, kier a sali e siman aki cu duna pueblo mas informacion pa concientisa, vooral nos hendenan homber, riba e tema di cancer di prostaat, cual na Aruba ainda ta un tema hopi tabu y no ta wordo papia hopi riba dje.

E siman aki tin un serie di entrevista cu diferente media, caminda cu kier sali como fundacion pa papia riba e topico aki pa haci e hende homber mas conciente riba e topico di cancer di prostaat, segun Jurgen Benschop, presidente di Fundacion contra cancer di prostaat.

Por mira cu riba un averahe pa aña tin 44 caso diagnostica nobo di cancer di prostaat bao di hende homber. Esaki ta entre 2009 pa 2013 segun cifranan di Directie Volksgezondheid. Esey ta haci cu e hendenan ta mas conciente cu nan ta bay dokter y ta bay haci nan testnan. Edad ta varia entre 45 pa 60 y tambe 65 plus. E factornan di risico mayoria biaha ta hende hombernan cu tin e malestar di cancer di prostaat den famia ta core risivonan mas halto. Locual kier haci como fundacion ta pidi tur hende homber cuminsa test na edad hoben. Edad hoben ta referiendo na minimo 40 aña bay ariba.

Segun Benschop, Aruba tin hopi fundacion cu ta traha pa hende muhe manera Stichting Bob, Mary Joan Foundation. E fundacion ta traha hopi di cerca cu nan, tambe cu Wilhelmina Kanker fonds, caminda ta purba di duna e pashentnan informacion. Mayoria di e pashentnan ta esnan cu a pasa den e proceso, cada un cu nan experiencia.

E lema principal di e fundacion ta, crusando e brug hunto. Como hende homber, si mester di sosten, un hende pa papia cun’e, cu por duna splicacion di e proceso con e ta bay, si tin cu bay tratamento afo, si e ta haci dolor of no. Tur esakinan ta informacionnan valioso cu ta sinti como fundacion cu kier comparti eyfo cu e hende hombernan pa hacinan mas trankil si nan tin cu bay pasa den un proceso dificil asina.

Nos tur sa cu ora cu bo wordo diagnostica cu cancer, no matter si bo ta hende homber of hende muhe, tin un impacto grandi riba bo bida personal. E tin un impacto riba bo famia, e tin un impacto riba bo amigo y famianan. Kier yuda como fundacion pa haci e momento aki mas trankil pa duna e persona e peace of mind cu e por prepara su mes pa pasa den un proceso dificil asina den su bida, segun Benschop.

Benschop a sigui splica cu no necesariamente ora cu haci testnan di prostaat, ta nifica cu bo tin cancer di prostaat, pero bisando si, cu si bo PSH ta riba un nivel mas halto cu normal, cu tin algo fout cu bo prostaat y bo tin cu bay un dokter pa haci mas investigacion. Esey ta situacionnan di cancer cu a wordo diagnostica. Kiermen cu hendenan cu a haci nan test, cu a bin find out cu nan tabata tin cancer y cu nan por tuma e accion necesario y no kiermen necesariamente bo ta muri di dje, pero bo ta tumando accion pa yuda bo mesun curpa deal cu e malesa aki.

Hopi hende no sa cu bo tin alternativa. Tur aña ta bon por lo menos pa bay bo dokter di cas, pa mira si bo por haci PSH test cu ta un simpel test di sanger. Haciendo e PSH test bo ta haya un indicacion si bo score ta entre 0 y 4, ta indica cu e ta relativamente bon. Si bo PSH sali un tiki mas halto cu esey, ta indica cu tin algo fout cu bo prostaat. Tin algo ta molestiando bo prostaat. Esey no kiermen cu bo tin cancer. Pero esey si ta duna indicacion cu bo tin cu bay sigui haci test pa bay dokter, pa wak kico por ta pasando cu bo prostaat y si ta asina e ora, busca e tratamentonan necesario.

E test di dede, ta un di e testnan cu e dokter ta uza pa verifica si bo prostaat ta hincha. Basa riba esey, bo por haci un biopsia y otro tipo di testnan, caminda cu nan ta stel vast pa mira si di berdad bo tin cancer of no.

 

- Advertisement -

DUNA COMENTARIO

Please enter your comment!
Please enter your name here