Home Comentario Nunca lo mi stop di gradici Toty Arends cu a habri e...

Nunca lo mi stop di gradici Toty Arends cu a habri e porta di periodismo na Aruba pa mi!

41
0
SHARE
- Advertisement -

Comentario:

Pa Mercedes Monge

Di man di Shon Pe Krozendijk, un dia 1 di September mi a bati porta di Corant di Nos. Mesora cu Shon Pe a presenta mi cu Toty, director di Di Nos y cu nos a combersa un rato, no obstante mi mal Papiamento e momento ey, el a tuma mi den servicio mesora.

El a laga mi ser conoci cu su staf, entre nan su yiu Vivian y sr. Percy Jeandor, encarga cu Lay Out. Ta mitad di dia so mi tabata traha debi cu mi yiunan tabata chikito ainda, y mi no tabata tin ken pa take care di nan pa mi por traha mas ora.

Conforme tempo a pasa mi a tuma mas y mas cariño pa Toty. Un persona hopi cariñoso y trankil, y sumamente sonriente. E tabata gusta laga nos hari, manera un terapia meymey di e stress cu e trabao periodistico ta trece cune.

Trahando cu Di Nos mi a cuminza cu e columna: “Nos hendenan muher” cu despues mi a continua den DIARIO pa cierto temporada.

Pa mi mehora mi Papiamento, Toty a laga mi participa den un curso di Periodismo Basico, organiza pa un organizacion di prensa cu tabata existi te ainda, na aña 90.

Toty a tuma mi casi como otro miembro di su famia. Mi ta corda den e temporada di December, el a invita ami y mi yiuchinan pa un Programa na Tele Aruba. E mesun aña el a haci un cena di Pasco den cas di su yiu Vivianne y mi a bay cu mi yiuchinan.

Mi ta corda cu ora nos tabata come mi yiu homber a haya harimento. El a dal un poco biña cu a subi su cabes. El a kere cu ta juice y nos mes no a ripara. Toty a hala e mucha su atencion pasobra el a hari na mesa, pasobra e tabata hopi stricto cu disciplina.

E noticia di su partida mi a sintie den mi curazon. Mi ta sinti asina un duele, pasobra un dia Vivianne a puntra mi pa mi entrevista su tata y traha su biografia. Mi a yega di papia cu Toty riba esey, pero e factor tempo a stroba esaki pasobra ora mi a drenta den DIARIO, mi tempo a bira mas limita door cu mi mester a cuminza traha tempo completo.

Un entrevista masha bunita cu, trahando den DIARIO mi a haci cu Toty, como musico, como pianista, ta ora el a produci su CD prome cu el a sali riba mercado. Flor di Cadushi, si mi no ta hera. E ta forma parti di mi coleccion.

Muy buen jefe. Incapaz di ofende un trahador, y sumamente flexible. Semper cu mi ta skirbi tocante mi experiencia den prensa na Aruba, aña aden aña afo, Toty ta e prome persona cu mi ta gradici. Recuerdonan masha bunita y un gratitud eterno mi ta keda cune. Toty sosega den Paz di Señor, y danki pa a habri pa mi e porta di periodismo na Aruba.

 

- Advertisement -

DUNA COMENTARIO

Please enter your comment!
Please enter your name here