Home Parlamento Parlamentario Richard Arends mustrando cu lo por tin tercer partido pa cumpra...

Parlamentario Richard Arends mustrando cu lo por tin tercer partido pa cumpra ‘fuel and marketing and supply’ di RDA

31
0
SHARE
- Advertisement -

ORANJESTAD (AAN): Awe Parlamento lo trata Presupuesto supletorio 2017 caminda pa medio di un nota di cambio di gobierno di coalicion MEP-POR-PAR, a aumenta e deficit for di 0.5% te cu 130 miyon Florin.

Miembro di fraccion di AVP, sr Richard Arends a mustra cu siman pasa Parlamento a ricibi e presupuesto supletorio 2017 identico  cu Gabinete Mike Eman II a lage y a entrega esaki na Raad van Advies, cumpliendo cu e normanan di un deficit di 0.5%  of 25 miyon Florin, conforme e normanan prescribi pa e ley di supervision financiero temporario.

“Sinembargo nos a ricibi den fin di siman un nota di cambio, cu ta aumenta e deficit aki cu 130 miyon Florin, un aumento segun nos, artificial y a base di experencia cu nos tin den gobernacion, nos por bisa tambe cu e aumento aki a worde maniobra.

No mester lubida cu Gabinete Mike Eman II a sa di reduci e deficit for di 9.4% na 2014 pa 0.5% y esaki no ta algo cu nos ta bisa, pero ta algo cu CFT tambe den ultimo presupuestonan a sa di cumpli cu e normanan.

Pues ponencianan caminda ta bisa cu Gabinete Mike Eman II a percura pa un desaster financiero, ta contrario na loke expertonan di CFT ta indica.

Mescos cu tabata e casonan anterior, e presupuesto supletorio cu nos a laga atras, tabata  cumpli cu e normanan y awor nos a ricibi  un nota di cambio cu ta aumenta e deficit aki te cu 155 miyon Florin.

E nota di cambio aki tin algun mutacionnan cu no necesariamente ta na su luga den e nota di cambio aki, no necesariamente mester forma parti di e presupuesto 2017.

Como algun ehempel mi por menciona caminda prome cu tur cos tin e entradanan cu mester bin for di Refineria di Aruba, cu ta un total di 67 miyon Florin, cu ta 40 miyon pa loke ta trata e adkisicion di e accionnan di ‘Fuels Marketing & Supply’  como tambe 27 miyon pa loke ta trata e resto di e ‘settlement sum’ cu Refineria di Aruba mester transferi pa pais Aruba.

En todo caso ta conoci cu Refineria di Aruba a paga 32 miyon cu ta contrario na ponencianan cu tabatin ultimo dianan aki cu e Refineria di Aruba lo no a paga, esey a worde confirma tambe door di e nota di cambio entrega.

Sinembargo nos a tuma nota cu ta kita e sumanan aki como posibel entradanan pa 2017 y nos tur sa y a worde indica caba, cu Refineria di Aruba tin un atraso pa loke ta trata financiamento di e suma aki,  sinembargo e transaccion por worde ‘geboek’, mester worde ‘geboek’ na aña 2017 pasobra ta un ‘vordering’, un debe,  cu Refineria di Aruba tin cu pais Aruba pa aña 2017 y ta un debe cu Refineria di Aruba a confirma di lo cumpli cu’ne.

Cu e placa den cash no ta drenta prome cu 31 di December, ta drenta na Januari, esey no ta haci un diferencia, ya cu nos sistema di presupuesto ta traha a base di transaccion, a base di cash y a base di transaccion,  tin e ‘vordering’ pendiente pa loke ta trata aña 2017 cu ta haci cu ta innecesario pa kita esaki for di presupuesto 2017.

Den pasado esaki tambe a sosode, por ehempel cu benta di edificionan cu di berdad na final no a tuma luga y a worde kita, e pregunta a surgi si a kita e entradanan aki di refineria di Aruba, si refineria di Aruba ainda tin intencion di adkiri e accionnan di Fuel Marketing and Supply,  y  si no, si lo tin un tercer partido cu si lo cumpra e sumanan aki.

Pues e afvoering di e sumanan aki ta innecesario y ta aumenta e deficit innecesariamente cu 67 miyon ta incorecto na nos parecer, ya cu ta un transaccion cu ta forma parti di presupuesto 2017 y e tin pa keda aden.

Nos a mira tambe cu gastonan adicional pa loke ta trata reparacion di Bestuurskantoor pa un suma di 6 miyon Florin  cual a laga nos un tiki asombra pa motibo cu Bestuurskantoor ta un monumento, y den dos siman di tempo caminda awe 18 di December, ta practicamente imposibel pa un contratista responsabel por entrega un ‘kostenramming’ pa drecha un monumento den dos siman, loke ta gastonan adicional cu imposiblemente por worde gasta responsabel den un edificio cu ta un monumento y nos ta cuestiona esaki totalmente.

Atrobe e presupuesto aparte di e 67 miyon Florin di e refineria, tin casi 6 miyon cu ta un aumento ficticio atrobe pa loke ta reparacion di Bestuurskantoor cu imposiblemente por worde haci den dos siman di tempo,” Parlamentario Richard Arends a mustra.

 

- Advertisement -

DUNA COMENTARIO

Please enter your comment!
Please enter your name here