Home Deporte Pova y Venum campeonnan di Campeonato Volleyball 2017

Pova y Venum campeonnan di Campeonato Volleyball 2017

31
0
SHARE
- Advertisement -

ORANJESTAD (AAN) – Aruba Volleyball Association a conoce den Centro Deportivo Betico Croes su Campeonnan di Campeonato Nacional di Volleyball pa 2017 den e Categoria Damas U-16, Open Klasse Damas y Open Klasse Cabayeros.

Prome cu a cuminsa cu e parti di entrega medaya y trofeo na e atletanan y teamnan ganador Presidente di Aruba Volleyball Association sra. Filomena Daniel-Curiel den presencia di Miembronan di Directiva, Lider di Campeonato Medelin Sapuana y Referee-nan a gradici tur presente, tur atleta, tur dirigente, tur organisacion afilia na A.V.A. pa haci e campeonato nacional uno exitoso.

Presidente a enfatisa cu e ta hopi contento di weita hobennan den e teamnan actual y cu e nivel di volleyball ta desaroya y creciendo. El a encurasha tur dirigente, organisacionnan y muy especialmente e atletanan pa sigi entrena, crece den conocimento di e wega di volleyball pa asina hunto hisa y hiba e nivel di volleyball na un etapa mash alto. Na final Presidente a expresa palabranan di gratitud na e Cuerpo di Referee-nan, na Lider di e campeonato y palabranan di elogio na sra. Cheddy Lopez Henriquez na kende e campeonato 2017 a wordo dedica.

Den categoria Damas U-16 e Team di Britannia cu Coach Selma “Cheddy” Lopez Henriquez na kende e Campeonato di Volleyball pa 2017 a wordo dedica a bira Campeon mientras cu e Team di Gazelles bao Coach Junny y Julisa Jones a bira Sub-Campeon. Britannia gana tanto diabierna (2-0) y diasabra anochi (2-0) for di Gazelles

Den Categoria Open Klasse Damas, POVA Volleyball Team cu Coachnan Irald Phelipa y Micheangelo Boekhoudt, a retene nan titulo Campeonil invicto ganando Centro di Bario Noord Total Finance 3-0 y 3-1. POVA tawata superior ariba e anochinan final pero e Damasnan di CBN a sa di wanta e wega balansa y a duna bon wega di volleyball.

Y finalmente e Teamnan cu a yega final den Open Klasse Cabayeros esta La Fama SPARTANS y VENUM, unda VENUM un bes mas ta retene su titulo campeonil ganando LF SPARTANS den tur dos salida. E prome wega di final entre VENUM y LF SPARTANS tawata un wega yen di suspenso y di un nivel superior. Ambos Team a bin bon prepara y ningun di dos no kier a baha cabes pa otro. Atletanan a demostra nan talentonan, atake y defensa a surpasa expectativanan y sigur sin lubida e añanan di experiencia cu algun di e atletanan tin. E score final ariba e prome anochi tawata 3 -2 pa VENUM unda e ultimo set a bay 15-13 pa VENUM.

Ariba e di dos anochi, ambos Team a duna bataya pero finalmente VENUM cu Coach Erro Yrausquin a demostra pakico nan merece e titulo campeonil y a gana LF SPARTANS 3-1. Un Brassband completo a presenta na Centro Deportivo Betico Croes pa duna VENUM e apoyo durante e wega.

- Advertisement -

DUNA COMENTARIO

Please enter your comment!
Please enter your name here