Home Gobierno Premier Wever-Croes mustrando con nan a hereda e reto financiero

Premier Wever-Croes mustrando con nan a hereda e reto financiero

54
0
SHARE
- Advertisement -

ORANJESTAD (AAN): Prome Minister di pais Aruba, señora Evelyn Wever-Croes, den su prome discurso den reunion publico pa trata e presupuesto supletorio, a menciona diferente retonan cu Gabinete Wever-Croes a hay’e confronta cu n’e na inicio di nan entrada den e gobernacion di coalicion aki.

E prome reto grandi cu Gabinete Wever-Croes a hay’e confronta cu n’e ta e crisis financiero di nos pais. Una bes cu e cifranan real a keda conoci y cu no por a sconde mas e embarcadura di e problema financiero cu gobierno anterior a causa, e realidad amargo a bira conoci di e deficit nacional gigantesco cua ta worde trata den Parlamento e siman aki prome cu ciere di aña.

Gobierno di Aruba kier cumpli cu e trayectoria pa bay na un presupuesto balancia y cu e normanan cu ta poni den e ley di LAFT. Gobierno kier sanea e situacion financiero. Pero nos tin un dilema pasobra nos ta na haltura cu lo no ta facil. Pero nos ta trahando riba un plan y pronto Gobierno lo presenta na Parlamento e vision di Gabinete Wever-Croes tin pa yega back na un presupuesto balancia a base di cifranan realistico.

Compromiso di Gobierno ta pa sanea e situacion financiero sinembargo manera cu Gabinete Wever-Croes a indica cu manera cu a drenta den gobierno, nos a worde confronta cu un otro crisis cu a pone henter e pueblo realisa cu e ser humano no por sigui worde neglisha. Un crisis cu a laga un dolor grandi atras cu e morto di dos criatura Rishandroh y Eugene causa door di abuso fisico.

Desde e momento di e acto horibel aki, henter e enfasis di atencion di henter Aruba a cambia. E gobierno anterior a kere cu financieramente por a atende cu e retonan di nos pais, pero awo e pueblo henter sa cu nos mester atende cu e ser humano prome. E plan di gobernacion di Gabinete Wever-Croes ta pa yega na un presupuesto balancea creando espacio pa atende cu e ser humano y e retonan nos dilanti.

E tema di problemanan social ya no por worde yama asina sino awo nos ta trata cu un explocion social. Den Conseho di ministronan esaki a worde trata di inmediato bou guia di Minister di Asuntonan Social y Minister di Husticia. Hunto a bin cu un “task force” pa un plan di emergencia cu ta cay bou di Minister President pa enfatisa e seriedad cu esaki tin pa Gabinete Wever-Croes.

Prome Minister ta bisa cu apesar di tur e retonan aki, e pueblo por a sinti e biento di cambio den tur skina. E ser humano ta hayando mas atencion. Orden y respet ta worde implementa. Speranza y confianza ta worde fomenta. Y ta e bientonan di aire fresco aki ta loke lo crea e fundeshi pa e cambionan grandi cu mester bin den e proximo añanan.

- Advertisement -

DUNA COMENTARIO

Please enter your comment!
Please enter your name here