Home Salud Problemanan psicologico ta desemboca den otro tipo di malesanan

Problemanan psicologico ta desemboca den otro tipo di malesanan

31
0
SHARE
- Advertisement -

Dr. Myron Genser, docter di control SVb:

ORANJESTAD (AAN) — Den entrevista cu e docter di control di SVb Myron Genser, Matutino DIARIO a puntre ki otro problemanan di salud, apart di e parti mental cu e ta duna hopi enfasis, ta mas relevante cerca e pacientnan cu ta yega SVb pa control.

E medico jong, cu por cierto a adkiri hopi experiencia na Costa Rica, entre otro den e practica di servicio social, ta convenci cu e aspecto mental ta causa tambe di otro factornan fisico.

Na Aruba hopi pacient ta keda di dolor lomba, nek, schouder cu ta wordo causa mayoria di biaha door di stress. Esaki generalmente ta bin door di no por procesa e problemanan di bida diario.

Otro factor cu e ta mira na Aruba, mescos cu den hopi otro pais, ta e problema di sobrepeso (pa no bisa obesidad). Esaki ta un problema hopi grandi pasobra alavez e ta causa di Diabetes, cu den nan control di tur dia nan ta wak cu esaki por tin origen den un problema psicologico.

“Loke mi ta haya mas importante y, nos kier pusha mas di e banda aki, pa haci un trabao mas integral. Esaki kiermen traha hunto cu diferente departamento, docter di cas, specialista, y nos tambe pa yega pa prevencion y promocion cu ayuda falta den salud en general”, dr. Genser a expresa.

Esaki ta un manera multidisciplinario di traha. Refiriendo na e raiz di mayoria di malesa, pues e problemanan psicologico, esaki ta hiba e persona na sea no come bon of come di mas.

“Si por evita esey, pakico no? Si e pacient mester di wordo scucha, un rato so di papia cu e docter ta trece un cambio. Tin ora un rato so papiando cu mi e pacient ta bisa mi ‘danki pa a scucha mi un rato, mi ta sinti mi mihor’. Ami ta gusta hopi traha cu comunicacion habri, y un bez cu e pacient firma cu e kier comunica cu su psicologo pa papia over di su caso, ami kier wak solucion. Mi kier wak ki nos tin cu haci pa hiba e pacient na prome na recupera; y di dos, pa e recupera mas lihe posible. Nos kier’e bek den bida y na trabao. Nos kier logra pa e ta bon den su funcionamento diario. Pesey nos ta bezig pa wak con e lo bay”, dr. Genser a duna di conoce. Ta secreto publico cu na Aruba nos ta wordo expone na hopi stress. Dr. Genser a acentua cu e necesidad tey, den nos comunidad, pa ayudo psicologico. Mientras tanto e trahadornan di sector publico lo wordo yuda cu consulta cu Psicologo mucho mas lihe.

Papiando di e factornan cu ta causa stress den e trahador e docter a amplia y por lesa riba esaki den otro articulo.

 

- Advertisement -

DUNA COMENTARIO

Please enter your comment!
Please enter your name here