Home Gobierno Prome Minister ta hasi un apelacion na esnan cu tin propiedad di...

Prome Minister ta hasi un apelacion na esnan cu tin propiedad di Gobierno pa bin dilanti

1170
0
SHARE
- Advertisement -

ORANJESTAD   (AAN): Durante e conferencia di prensa semanal di Gobierno, Prome Minister Evelyn Wever Croes a papia tocante e investigacion pa loke ta e equiponan cu a desaparece for di Bestuurskantoor.

El a indica cu e ta papia riba esaki, despues cu varios medio di prensa a pidi pa un reaccion.

“Mi tin cu bisa cu una vez cu e investigacion ta den man di instancianan hudicial, e investigacion ta bay na un manera imparcial”.

“Ningun di nos tin algo di bisa of algo di hasi den e investigacion di nos institutonan”.

“Loke si a pasa ta cu nos a entrega keho y esaki no ta un sorpresa, pasobra mi ta papiando di e tema aki durante 2 siman continuamente”.

Esaki segun e Prome Minister, kende a sigui bisa cu for di dia cu e Gobierno nobo a drenta e edificio, tabata obvio cu tabata falta hopi equipo y material, esta tur cos cu tabata tin mester pa hasi un traspaso responsabel di un Gobierno pa otro.

“E equiponan cu falta ya caba ta na un balor di 100.000 florin y como un mandatario responsabel mester atende cu esaki, pasobra ta placa di pueblo”.

“E ta 100.000 florin cu no a bay por ehempel na muchanan cu tin mester di un desayuno prome cu nan bay school, na mamanan soltero pa mas onderstand, of na cuido medico”.

“Nos a bisa cu e Gobierno aki ta para pa orden y respet y ora cu bo yega topa cu e situacion unda cu mas di 100.000 florin na equipo valioso ta perdi, bo tin cu hasi trabao di dje”.

“Mi ta hasi un apelacion na tur cu ta scuchando nos: si abo tambe tin equiponan cu por ta di Gobierno, por fabor trece nan bek”.

“Si bo sa cu ta equiponan cu ta pertenece na Gobierno y bo no trece nan bek, nos por ta papiando di ladronicia”.

Esaki segun Mr. Croes, kende a pidi hefenan di departamento cu por a haya mueble of equiponan regala for di e ministernan anterior pa duna Gobierno actual un señal cu nan tin nan pa Gobierno sa cu nan ta un caminda den un departamento di Gobierno.

“Esaki ta importante, pasobra hopi cos a desaparece for di e edificio aki sin cu nan  a wordo registra”, segun e Prome Minister.

Minister di Husticia Andin Bikker tambe a trece dilanti cu e investigacion aki ta uno corecto y no ta trata na ningun momento di persecusion politico.

“Nos mester por wak pa nos haya e propiedadnan di pais Aruba bek, pa nan ta caminda cu nan mester ta”.

“Los di esey no por ta asina cu un Gobierno saliente cu no a percura pa salvaguardia e propiedad di pais Aruba na un manera ordena, diripiente ta bin papia di persecusion politico, pasobra e sospechoso ta un persona yega na nan”, segun Bikker.

 

- Advertisement -

DUNA COMENTARIO

Please enter your comment!
Please enter your name here