Home Social Proyecto cuido informal di nos grandinan a bira un realidad

Proyecto cuido informal di nos grandinan a bira un realidad

18
0
SHARE
- Advertisement -

ORANJESTAD(AAN)— Recientemente a tuma luga un encuentro entre dr. Horacio E. Oduber Hospital, SABA y Wit Gele Kruis, na unda a firma un protocol di cooperacion pa crea un ‘helpdesk’ pa conseha y educa cuidadonan informal na Aruba.

E protocol aki ta e resultado di varios reunion entre dicho instancianan, cual conhuntamente a desaroya e proyecto. CEDE Aruba tambe tabata presente na e firmamento, mirando cu CEDE Aruba a tuma e iniciativa pa e proyecto y a guia e proceso ta na e firmamento di e protocol.

E cuido informal den famia ta un balor grandi den e comunidad di Aruba. E gran mayoria di hende ariba 60 aña ta desea pa biba na cas, hopi biaha cu sosten di famia. E desaroyo economico y demografico durante e ultimo 35 aña a trece cu e cuido den famia ta mas y mas bou presion.

E cantidad di hende ariba 60 aña ta subiendo, mientras cu e famia tin menos tempo pa yuda cu e cuido den famia. Na e mesun momento e deseo y disponibilidad di e famia pa yuda t’ey ainda y mester haci tur cos posibel pa conserva esaki. P’esey den e siguiente añanan lo mester haci mas esfuerso pa sostene e cuido den famia y e cuido na cas.

E cooperacion entre Hospital, SABA y Wit Gele Kruis ta enfoca ariba educacion di e cuidado informal na cas. Durante e siguiente tres aña lo organisa un cantidad grandi di programanan educativo den e diferente barionan di Aruba pa duna informacion tocante cuido na cas.

Esaki lo wordo coordina dor di e tres instancianan aki, pero lo envolve hopi mas organisacion cu lo por contribui na esaki. Lo duna informacion den bario, lo crea informacion ‘online’, lo crea un ‘helpdesk’ na unda hende por yama cu pregunta tocante e cuido na cas y lo enfoca tambe ariba educacion di e cuidado profesional con pa anda miho cu e famia cu ta duna cuido. E proyecto lo duna bista tambe ariba otro necesidad cu e cuidadonan informal tin y lo por traha ariba mas proyecto pa fortifica esaki.

E ‘helpdesk’ pa e cuidadonan informal lo wordo crea na SABA, den e mesun infrastructura di Centro di Memoria, cual tambe ta un proyecto di cooperacion. Hospital tin un contribucion pa loke ta personal di e ‘helpdesk’ y SABA ta pone su infrastructura na disposicion di e proyecto.

Wit Gele Kruis lo contribui cu su experticio den cuadro di cuido na cas y tambe e programanan educativo cu nan ta duna caba. E proyecto a wordo stimula pa CEDE Aruba y ta wordo financia pa CEDE Aruba y Samenwerkende Fondsen Caribisch Deel van het Koninkrijk. E proyecto lo cuminsa na 2018 y comunidad lo ricibi mas informacion concreto tocante esaki.

- Advertisement -

DUNA COMENTARIO

Please enter your comment!
Please enter your name here