Home Cultura Recordando fecha natal di Doctor Britten

Recordando fecha natal di Doctor Britten

77
0
SHARE
- Advertisement -

Parti historia di Lorenzo Victoriano Britten (Dr. Britten) recordando su fecha natal 10 december 1916.

Diadomingo dia 10 di December 2017 ta recorda e fecha natal di mi kerido tata Sr. Lorenzo Victoriano Britten ( Dr.Britten ) miho conoci como Victoriano den pueblo.

Den un cas humilde den Oranjestad su mama a trece na mundo na aña 1916 cu Amor y alegria.

Victoriano a sigui su estudio na Aruba pa despues a bay studia na Curaçao pa el a logra su titulo como boekhouder den administrashon como poco di Arubianonan cu por a bay studia afo e tempo eynan. Despues a sigui su estudio di abogado ( pesey e nomber abogado di pueblo ) pa termina como politico. E tabata miembro di Staten y como Arubiano a lucha pa su Isla Natal.

Cla pa yuda tur hende semper disponibel cu su porta di cas hancho habri pa ken cu mester di ayudo. Prome riba lista di PPA cu Sr.Juancho Irausquin dfm despues den AVP cu Sr.Albert Eman dfm.

Victoriano tabata e persona den AVP cu tabata skirbi tur carta pa Gobierno, pero tur hende a lubida kico el a haci, sikiera a gradicie pa su trabao boluntario cu e tabata eherce den e partido.

Tempo cu e tabata miembro di partido PPA como un persona fuerte den su pensamento y envidia pa hopi hende den e partido nan a disidi di mande cu su famia pa Boneiro pa bay traha pero como cu e no a acepta pa ningun hende mishi cu su famia a disidi di bandona e partido.

Despues a worde acerca pa drenta AVP y mescos pa envidia a worde bisa den seno di partido cu Victoriano no por ta un Statenlid mas pa un miembro di famia di partido tuma su lugar usando cu Victoriano ta un bastardo y como persona respeta el a disidi di bandona e partido.

Hunto cu defunto Betico Croes tabata tin planea pa e lanta su propio partido bou e nomber “ADA”

ACCION DEMOCRATICO ARUBIANO:

Pero Dios tabata tin mester di su yiu y prome cu el a lanta su propio partido el a bin fayece na aña 1973 lagando su esposa, 6 yiunan y 3 nieto.

Victoriano tabata un homber cu a nace cu un Don di Papa Dios como escritor y filosofo.

Semper bisti na blanco intachabel cu su sombre di banda tabata bishita su hendenan cu tabata tin respet pe. Den su saco di carson tabata cana cu placa los pa momento e topa cu muchanan o hende den necesidad tabata regala nan placa y hopi tabata trece recibo di awa y coriente pa e paga pa nan. Ainda por corda con e tabata skirbi carta pa esnan cu no por a paga un abogado y semper nos tabata biba cu jen di hende na cas den su oficina den Boliviastraat despues prome cu el a fayece den Dominicanessenstraat unda el a yuda hopi studiante pa bay Hulanda e tempo ey e tabata traha na Onderwijszaken cu tabata su ultimo trabao prome cu el a fayece. Tambe el a traha na Voogdijraad. Si por corda Victoriano tabata Presidente di Club Holandia den Rancho tambe el a funda Club Gardenia na Noord cu e nomber a worde cambia despues pa Centro di Barrio Noord.

E nomber el a bautisa e club na nomber di su yiu muhe mas chikito cu yama Gardenia.

Victoriano tabata e persona cu a boga pa lusnan den rancho dilanti famia Palm, Madiki y Socotoro. Despues a sigui Sabana Liber vecindario den Noord como e politico stima den e pueblo di Noord. Su clientenan cu semper el a yuda tabata e Chinesnan, Portuguesnan y Colombianonan cu e tempo aya tabata bin establece nan mes como estranhero na Aruba.

Como yiu mi a conoce un tata di bon curason pero semper el a worde humiya pa su sabiduria cu Dios a dune como regalo.

Con mi por lubida mi tata Dr. Britten, Lorenzo Victoriano Britten cu a stima su Isla Aruba su pueblo humilde cu tabata para semper su tras.

Papai awe bo 6 yiunan y 12 nietonan ta orguyoso di un tata y welo cu a significa hopi pa Aruba.  Por wel di ta lubida pero pa su yiunan semper recorda.

Awe felis den brasa di Señor uni na nos mama Dona Esperanza Farrayans de Britten den Paraiso Eterno.

 

Autor: Omaira I. Rodriguez-Britten

 

- Advertisement -

DUNA COMENTARIO

Please enter your comment!
Please enter your name here