Home Gobierno Refineria di Aruba no tin e 50 pa 70 miyon cu mester...

Refineria di Aruba no tin e 50 pa 70 miyon cu mester a paga gobierno di Aruba

296
0
SHARE
- Advertisement -

Prome Minister Wever-Croes:

ORANJESTAD (AAN) — Gabinete Wever-Croes tambe a keda conta riba e 50 pa 70 miyon florin cu Citgo mester a paga Aruba, y esaki ta algo cu e compania a expresa tempo cu gobierno actual tabata den formacion.

Asina Prome Minister mr. Evelyn Wever-Croes a menciona den encuentro cu prensa despues cu el a sali di Gabinete di Gobernador, y e dama a menciona esey a base di un pregunta di prensa.

No obstante, e dignatario a subraya, dia pa dia ta mas duidelijk cu e placa aki lo no drenta mas, y esaki pa varios motibo. El a splica cu esaki ta un suma cu e Refineria di Aruba (RdA) mester paga na gobierno. Pero e instancia aki no tin e placa aki y nan kier a bay fia placa pa haci e pago aki.

E dama a agrega cu e fianza ta andando, pero esaki a para na momento cu a detene e top di Citgo. RDA por fia placa pero despues con e ta pagu’e? E mandatario ta puntra. Pasobra RDA por paga bek solamente si e refineria ta draai. Banco a bisa cu si e refineria no ta draai Citgo tin cu hacie, pero e top di e compania ta deteni y bao e circunstancia aki, e mandatario a subraya, e no ta kere lo tin un banco na mundo cu ta bay duna e fianza.

Esaki ta e motibo pa cual e placa aki lo no drenta caha di gobierno y esaki ta haci e buraco financiero mas grandi. E deficit, a base di djis operacion, ta 50 miyon florin y ta bin awor acerca 50 pa 70 di Citgo cu ta algo cu ningun hende por a premira pero cu ta un situacion sumamente delicado.

E mandatario a wordo puntra si e ta na haltura cu e trabaonan a keda para, y cu e top di Citgo a wordo cambia, na momento cu e otronan a keda deteni. E dama a contesta cu e sa kico ta “going on” cu Citgo pero no tur cos e por comenta facilmente.

Na Aruba mes RdA ta haci e trabao di supervision pa gobierno y Citgo ta cumpliendo cu algun di e trabaonan cu nan a bisa cu nan ta realizando, no tin hopi trahador eyriba pero tin hende, y e trabao no a para door cu e top a wordo deteni. E mandatario a señala cu na dado momento gobierno lo mester sinta cu Citgo y nan ta haciendo un assessment al respecto y haya sa con hopi por conta cu e compania pa e aña cu ta bin.

- Advertisement -

DUNA COMENTARIO

Please enter your comment!
Please enter your name here